31mart soyqırımı – tarixin qanla yazılmış yaddaşıdır - FOTOLAR

29 mart 2024-cü il tarixdə YAP Samux rayon təşkilatında 31 mart soyqırımına həsr edilmiş “31mart soyqırımı- tarixin qanla yazılmış yaddaşıdır” mövzusunda partiya fəallarının iştirakı ilə yığıncaq keçirildi.Əvvəlcə 31 mart soyqırımı zamanı qətlə yetirilmiş həmvətənlərimizin, əziz xatirəsi bir dəqiqəlik sükutla yad edildi.

Yığıncağı açıq elan edən YAP Samux rayon təşkilatının sədri Gündüz Bayramov erməni millətçiləri tərəfindən 1918-ci ilin mart-aprel aylarında xalqımıza qarşı həyata keçirilən soyqırımı siyasətinin əsl mahiyyətindən danışdı. Qeyd etdi ki, azərbaycanlılara qarşı törədilmiş bu soyqırımı xalqımızın XX əsr tarixinin ən qanlı səhifələrindən biridir. Həmin hadisələr zamanı 50 min azərbaycanlı qətlə yetirilib. Gündüz Bayramov bildirdi ki, erməni millətçiləri tərəfindən azərbaycanlılara qarşı məqsədyönlü şəkildə törədilən bütün soyqırımları, o cümlədən 31 mart soyqırımını xalqımız heç vaxt unutmadı, mənfur düşmənə qarşı mübarizə əzmini artırmaqla, bu gün Müzəffər Ali Baş Komandan cənab İlham Əliyevin rəhbərliyi ilə qüdrətli ordumuz parlaq qələbələrə imza atdı, torpaqlarımızı işğaldan azad etməklə, şəhidlərimizin, bütün soyqırım qurbanlarının qanını yerdə qoymadı.

Yığıncaqda iştirak edən Samux rayon İcra Hakimiyyəti Başçısı Aparatının müavini,ictimai-siyasi və humanitar məsələlər şöbəsinin müdiri Kəmalə Xəlilova çıxış edərək Azərbaycan xalqına qarşı yüz illər boyu davam edən soyqırımı və təcavüz siyasətinin məqsədi, mahiyyəti və tarixi barədə məlumat verib, ermənilərin azərbaycanlılara qarşı zaman-zaman həyata keçirdikləri soyqırımı, törətdikləri vəhşiliklər barədə danışdı.

Daha sonra yığıncaqda iştirak edən Samux rayon İcra Hakimiyyəti aparatının ictimai-siyasi və humanitar məsələlər şöbəsinin baş məsləhətçisi Elnaz Cəfərova, Samux rayonu üzrə Gənclər və İdman sektorunun müdiri Rasim İmamquliyev, partiya fəallarından Sevinc Məmmədova, Dilarə Əsgərova erməni millətçilərinin əsrlər boyu azərbaycanlılara qarşı törətdikləri kütləvi qırğınlar, həyata keçirdikləri soyqırımı və deportasiya siyasətinin acı nəticələrindən söz açdılar. Bildirdilər ki, o faciələrdən əsrlər, illər keçsə də, xalqımız baş verənləri unutmur, soyqırımı qurbanları olmuş günahsız insanların xatirəsini dərin ehtiramla yad edir.