ADP sədri yenə AXCP-ni "vurdu"

"AXCP-nin konkret ideologiyası, siyasi palitrada özünəməxsus bir yeri yoxdur"

AXCP-də cərəyan edən istefalar dalğası yenidən baş qaldıra bilər. Bunu partiyada müxtəlif cinahlarda qruplaşmış mənbələr də istisna etmirlər. Xüsusilə qeyd edilir ki, son bir neçə ayda Əli Kərimlinin ən yaxın çevrəsinin partiyanın qurultayından sonra oranı tərk etmələri artıq "Yurd" şefinin çarəsiz duruma doğru sürükləndiyini kifayət qədər ehtiva edir. Daha bir maraqdoğurucu məqam isə Əli Kərimlinin ən yaxın adamı kimi tanınan Fuad Qəhrəmanlının həbs olunduqdan sonra "Azadlıq" qəzetində müdafiəsinin olduqca zəif qurulmasıdır. Məhz bu məsələ daha çox diqqət çəkməkdədir. Yəni bu amil də belə deməyə əsas yaradır ki, Əli Kərimli onun yerini tuta biləcək istənilən şəxsi özündən kənarlaşdırır.

Məsələ ilə bağlı ADP sədri Sərdar Cəlaloğlunun da fikirləri maraqdoğurucudur. Zaman-zaman Cəbhə sədrini "vuran" partiya sədri burada ilk məsələni müxalifətin parçalanması və liderlik ambisiyaları ilə əlaqələndirib. Sərdar Cəlaloğlu son zamanlar AXCP-də baş verən istefalara münasibətini bildirərkən deyib. Partiya sədri qəzetimizə verdiyi açıqlamasında Cəbhədəki istefaların səbəbini özünəməxsus şəkidlə analiz edərək deyib ki, əslində dünyada gedən dəyişikliklər ölkədəki siyasi qüvvələrin həmin yeniliklərə adaptasiya ola bilməməsi ilə nəticələnir: "Məsələn, beynəlxalq aləmə baxdıqda görürük ki, vaxtilə "İŞİD"-i dəstəkləyən qüvvələr indi bu qruplaşmanı məhv etmək üçün bir araya gəlirlər. Digər tərəfdən, Suriyadakı kürdlərin müstəqillik tələblərindən narahat olan Türkiyə bu gün onları qaçqın kimi qəbul edir, onlara sığınacaq verir. Yəni bu gün dünyada, həqiqətən də sürətli dəyişikliklər gedir. Amma bəzi siyasi qüvvələrin siyasi adaptasiya qabiliyyəti zəifdir, ya da yox dərəcəsindədir. Belə qüvvələr dəyişikliyə uyğunlaşa bilmir. Ona görə də belə qüvvələr köhnə siyasətini davam etdirəndə indiki situasiya ilə uzlaşa bilmir, ziddiyyətlər yaranır, nəticədə həmin qüvvələr itkilərə məruz qalır. Bu mənada, siyasi adaptasiyası zəif olan, fərqli prosesləri düzgün dəyərləndirə bilməyən, məntiqi nəticə çıxara bilməyən tərəflərin parçalanmasını real hadisə kimi qiymətləndirirəm".

"Əli Kərimlinin proqnozları heç vaxt özünü doğrultmayıb"

Sərdar Cəlaloğlu AXCP-yə yaxınlığı ilə seçilən "Azadlıq" qəzetində Əli Kərimlinin verdiyi proqnozların heç birinin özünü doğrultmadığına da diqqət çəkib: "Məsələn, götürün "Azadlıq" qəzetində gedən proqnozları. Baxaq Yaxın Şərqlə bağlı, eləcə də Ukrayna hadisələri ilə bağlı, Rusiyada baş verənlərlə bağlı proqnozlara. Onların heç biri gerçəkləşmədi. O cümlədən, "Azadlıq" qəzetinin vaxtilə İsmayıllı və Quba hadisələri ilə bağlı verilən proqnozlarına da baxanda orada deyilən, yazılan heç bir fikrin özünü sübuta yetirmədiyinin şahidi olduq. Bu baxımdan, AXCP-nin qüsurlarının olmasını inkar edə bilmərik".

"Elə deyirlər ki, hər şeydə birinciyik"

AXCP-nin daxili fəaliyyəti ilə bağlı geniş bilgiyə malik olmadığını deyən ADP sədri bunu adıçəkilən siyasi təşkilatın ideologiyasının olmaması ilə əlaqələndirib: "Mən, ümumiyyətlə AXCP-nin daxili fəaliyyəti ilə bağlı çox az məlumata malikəm, təmaslarım yoxdur, təşkilatın böyük əksəriyyətinin üzvlərini tanımıram. Sadəcə, bir neçə funksionerini tanıyıram. Eyni zamanda, təşkilatın ideologiyasına yaxından bələdçiliyim yoxdur. Birgə əməkdaşlığımız da çox qısa müddətlərdə olub. O zamanlarda da AXCP-nin fəaliyyətindən heç nə anlaya bilməmişəm. Nə Əli Kərimlinin özündən, nə onun apardığı siyasətdən, nə onun partiyasının siyasi dəst-xəttindən, ümumiyyətlə, heç nə anlaya bilməmişəm. AXCP-nin gizli, örtülü bir siyasəti var. Nəyə görə oradakı insanlar oranı tərk edir, bütün bunlar müəmmadır. Çünki AXCP-nin konkret ideologiyası, siyasi palitrada özünəməxsus bir yeri yoxdur. Məsələn, biz ADP olaraq demokratik dəyərlərə üstünlük veririk, digərləri də öz mövqelərini müəyyən dəyərlər üzərində açıqlayırlar. Ancaq AXCP-nin nəyə prioritet verdiyi, nəyə xidmət etdiyi məlum deyil. Elə deyirlər ki, hər şeydə birinciyik. Amma faktiki olaraq hər şeydən uzaqdadır. Ümumiyyətlə, keçmiş sistem üzərində siyasi partiyanı idarə etmək mümkün deyil. Qurularsa, onda bugünkü AXCP olar. Ona görə də bu gün AXCP-nin ciddi problemləri var".

Göründüyü kimi, ortada olan ambisiyasını səviyyəsiz fəaliyyəti ilə sərgiləyən Əli Kərimli bununla çox da uzağa gedə bilməyəcək. Proseslər də belə qənaətə gəlməyə əsas verir.

Rövşən RƏSULOV