Ağdam yenidən qurulur, Ağdam inkişaf edir!

Bu gün erməni işğalından azad edilmiş ərazilərimizdə quruculuq və yenidənqurma işləri uğurla davam etdirilir. Dövlətimizin başçısı Prezident İlham Əliyevin xüsusi əməyi və diqqəti ilə doğma Qarabağımızın hər guşəsində quruculuq və inkişaf prosesi bu gün dünyanın heyrətlə izlədiyi tarixi hadisəyə çevrilib. Bu inkişaf və tərəqqi bir zamanlar “ruhlar şəhəri” kimi xatırlanan, Otuz ilə yaxın davam edən işğal dövründə xarabalığa çevrilmiş və “Qafqazın Xirosiması” adlandırılan Ağdam şəhərinin bu günkü dirçəlişində özünü əyani şəkildə büruzə verir. Ağdam artıq bölgənin gələcək inkişafı üçün misilsiz nümunə olmağa hazırlaşır!

Ağdamın azad edilməsi, həm də Azərbaycanın müharibə ilə bərabər, sülh prosesinə sadiqliyini göstərən bir addım oldu. Azərbaycanın rəhbərliyi, müharibənin bitməsindən sonra bölgədə sülhün bərqərar olması və erməni tərəfi ilə yeni diplomatik münasibətlərin qurulması istiqamətində addımlar atmağa başladı. Ağdamın işğaldan azad edilməsi, sülh prosesinin mühüm bir hissəsi kimi, Azərbaycanın ərazi bütövlüyünü bərpa etmə məqsədinin yalnız hərbi əməliyyatlarla deyil, həm də diplomatik səylərlə əldə edildiyini göstərdi. Bu gün artıq doğma Ağdam 44 günlük müharibədən sonra dirçəlişin növbəti ünvanı sayılır.

Prezident İlham Əliyev və birinci xanım Mehriban Əliyeva martın 27-də Ağdam rayonunun Sarıcalı kəndinin birinci mərhələsinin və Sarıcalı kəndində yerli icra strukturları üçün inşa olunmuş çoxfunksiyalı inzibati binanın açılışında iştirak ediblər. Kəndin girişində inşa edilmiş bu binada bir sıra qurumlar fəaliyyət göstərəcək. Bu isə öz növbəsində əhaliyə göstəriləcək xidmətlərin vahid məkandan təqdim olunmasına və vətəndaş məmnunluğunun təmin edilməsinə imkan yaradacaq. Binada müxtəlif iclas və iş otaqlarında işçilərin yüksək səviyyədə fəaliyyət göstərmələri üçün bütün şərait mövcuddur. Qeyd edək ki, Ağdam rayonunda quruculuq işlərinin geniş vüsət aldığı yerlərdən biri də Sarıcalı kəndidir.

Öncə qeyd edək ki, bu kənd Birinci Qarabağ müharibəsində Ermənistan silahlı qüvvələri tərəfindən 1993-cü il iyulun 23-də işğal olunmuşdu. İşğal dövründə kənd viran qoyularaq xarabalığa çevrilmişdi, burada evlərlə yanaşı, məktəb, uşaq bağçası, səhiyyə, ticarət, iaşə obyektləri də vəhşicəsinə məhv edilmişdi. Vətən müharibəsində Ordumuzun şanlı Qələbəsindən sonra üçtərəfli Bəyanata əsasən, Ağdam rayonu noyabrın 20-də Azərbaycana qaytarılıb. Sarıcalı kəndi işğaldan azad edildikdən sonra burada azərbaycanlılara aid kütləvi məzarlıq aşkarlanıb. İşğaldan əvvəl kənddə 239 ailə, ümumilikdə 1024 nəfər əhali yaşayıb. Ağdam şəhərinin mərkəzindən 6 kilometr məsafədə yerləşən bu kəndin təməlini 2022-ci il oktyabrın 4-də Prezident İlham Əliyev qoyub. Sarıcalı kəndi 1873 nəfər (425 ailə) əhali üçün planlaşdırılıb. Layihələndirilən ümumi ərazi 123 hektardan çoxdur. Ümumilikdə kənddə 2 mərhələ üzrə 425 fərdi evin inşası nəzərdə tutulub. Burada əhalinin məşğulluğunun təmin edilməsi üçün hər cür şərait yaradılıb, təhsil, iqtisadi, sosial və məişət təyinatlı müxtəlif müəssisələr, klub-icma və mədəniyyət mərkəzləri tikilib. Burada sosial məsələlər də öz həllini tapıb. Kənddaxili yollar, elektrik, rabitə, su xətləri çəkilib, qaz təchizatı təmin olunub.

Dövlətimizin başçısı və birinci xanım Mehriban Əliyeva Sarıcalı kəndində yeni inşa edilmiş fərdi yaşayış evlərində yaradılan şəraitlə tanış olublar.

Qeyd edək ki, birinci mərhələ üzrə buraya 895 nəfərin (203 ailə) köçürülməsi planlaşdırılır. Artıq 203 fərdi ev inşa olunub. Evlər iki, üç, dörd və beşotaqlıdır. Məskunlaşdırılacaq əhalinin gələcək sayı nəzərə alınaraq, kəndin salınmasının birinci mərhələsi üçün 54 hektar torpaq sahəsi ayrılıb.

Bəli, Azərbaycan öz qətiyyəti, öz gücü hesabına erməni separatizminin kökünü kəsdi. Müzəffər Ali Baş Komandan İlham Əliyev işğaldan sonra ilk dəfə Ağdamda ağdamlılarla görüşəndə və yeni şəhərin təməlini qoyanda da “elə bir şəhər quracağıq ki, bütün dünya bizə həsəd aparacaq” söyləmişdi. Ağdamın hər yerində həqiqətən də yeni inkişaf mərhələsi başlayıb. Şəhərlə yanaşı Ağdamın kəndlərində də yüksək səviyyəli quruculuq işləri aparılır. Xaçınçay su anbarının bərpa olunması sayəsində Suqovuşandan gələn kanal vasitəsilə Ağdamın bütün ərazisi və qonşu rayonların əraziləri su ilə təmin olunacaq. Bu da işğal dövründə Ermənistan tərəfindən süni yaradılan su probleminin birdəfəlik həlli deməkdir.

Xüsusi bir məqama diqqət edək. Bu həmin Ağdamdır ki, mənfur düşmən tərəfindən tamamilə dağıdılmışdı, bir dənə də salamat bina qalmamışdı. İşğal nəticəsində 128 min nəfər doğma ev-eşiyindən didərgin düşmüşdü. Şübhəsiz, bütün bunlar Azərbaycanın erməni işğalçılarının 27 il ərzində viran qoyduqları bir məmləkətdə quruculuq işlərinə necə önəm verdiyinin daha bir bariz nümunəsidir. Son illərdə Ağdamda həyata keçirilən bərpa işləri həm də Azərbaycanın gücünü və qətiyyətini göstərir. Bu gün işğaldan azad edilmiş ərazilərdə artıq iki sənaye parkı fəaliyyət göstərir. Ağdam şəhərində yaradılmış sənaye parkının məhsulları artıq xarici ölkələrə ixrac edilir.

Prezident İlham Əliyev Ağdamın Sarıcalı kəndində yeni mənzillərə köçən sakinlərlə görüşdə çıxışında bildirib ki, “Biz Ağdamı yenidən qururuq və quracağıq, indi genişmiqyaslı quruculuq işləri aparılır.”

Dövlətimizin başçısı, həmçinin qeyd edib: “İşğaldan sonrakı dövrdə bir çox önəmli infrastruktur obyekti istifadəyə verilib, ilk növbədə, yollar. Ağdam-Bərdə yolu yenidən quruldu. Heç sovet dövründə bu gözəllikdə yol olmamışdır. Ağdam-Xankəndi yolu inşa edilir. Bu da Bərdə-Ağdam yolu kimi dördzolaqlı olacaq. Dəmir yolu çəkilir, yəqin ki, bu il istifadəyə veriləcək. Yəni, Ağdama dəmir yolu ilə rahat gəlmək mümkün olacaq. Vağzal kompleksi inşa edilir. Ağdam məscidi bərpa edilmişdir”.

Dövlətimizin başçısı bəyan edib ki, ikinci Qarabağ müharibəsi təbii olaraq, tarixdə bizim şanlı tariximiz kimi, şanlı səhifəmiz kimi əbədi qalacaq. Müharibə zamanı Ağdam istiqamətində fəal hərbi əməliyyatların keçirilmədiyini vurğulayan dövlətimizin başçısı qeyd edib ki, düşmən güclü istehkamlar qurmuşdu və hər tərəf minalanmışdı. SİTAT: “Ona görə biz Ağdam istiqamətində artıq Hadrut, Cəbrayıl, Füzuli, Şuşa azad olunandan sonra hərəkət etməyə başlamışdıq və faktiki olaraq düşmənin qüvvələri mühasirədə qalmışdı. Azərbaycan yenə də humanistlik göstərdi və düşmənə şans verdi ki, öz xoşu ilə bu torpaqlardan çıxsın”.

Dövlət başçımız 14 sinif otağından ibarət olan Sarıcalı kənd orta məktəbinin açılışında da iştirak edib. Məktəbdə tədrislə bağlı hər cür şərait yaradılması “Azərbaycan Respublikasının işğal¬dan azad edilmiş ərazilərinə “Böyük Qayıdışa dair I Dövlət Proqramı”nın uğurla davam etdirildiyinin təs¬diqidir.

Beləliklə, bu səfər zamanı dövlət başçımızın və birinci vitse-prezidentin yeni mənzilə köçən sakinlərlə görüşləri, onlara evlərinin açarlarının təqdim etmələri doğma yurda qayıdan bu insanlarda Ramazan ayında böyük könül xoşluğu yaşadıb. Qarabağ bizimdir, Qarabağ AZƏRBAYCANDIR!

ZƏRİFƏ QULİYEVA,

YAP Veteranlar Şurasının üzvü, «Modern ailə və inkişaf» İctimai Birliyinin sədri