Fransa ABŞ-a dəstək verir - FOTO

Fransa Prezidenti Emmanuel Makron Yaxın Şərqdəki iki Fransa bazasının "məhdud zərbələrə" məruz qaldığını və Fransanın müttəfiqlərinə qarşı İran hücumlarının dəf edilməsində iştirak etdiyini bildirib. BFMTV-nin məlumatına görə, o, bu açıqlamanı İsrail-ABŞ əməliyyatının başlaması ilə Yaxın Şərqdə başlayan müharibəyə cavab olaraq xalqa müraciətində edib. Makron bildirib ki, ABŞ və İsrail əməliyyatı başlatmaqla beynəlxalq hüququ pozublar, lakin İran rəhbərliyi "yas tutmayacaq" və Tehranın özü bu vəziyyətə görə məsul şəxsdir: “Biz regiondakı hərbi bazalarımızın müdafiəsini gücləndirmişik. Onlardan ikisi maddi ziyana səbəb olan məhdud zərbələrə məruz qalıb".

O, həmçinin bildirib ki, Fransa "ilk saatlardan" düşmən PUA-larını "qanuni müdafiənin bir hissəsi olaraq... müttəfiqlərimizin hava məkanını qorumaq üçün" vurmağa qoşulub, bunun dəqiq harada baş verdiyini göstərməyib.

Makron bu yaxınlara qədər Baltik dənizində olan "Şarl de Qoll" təyyarədaşıyan gəmisinin Aralıq dənizinə yerləşdirildiyini təsdiqləyib. O, həmçinin bölgəyə əlavə təyyarə və hava hücumundan müdafiə sistemlərinin yerləşdirildiyini, həmçinin Lanqedok freqatının göndərildiyini elan etdi.

Fransa prezidenti birləşmiş qüvvələr və resurslarla Yaxın Şərqdə dəniz nəqliyyatının bərpasını təmin edəcək koalisiya yaratmaq istəyini ifadə etdi.

Bundan əlavə, Makron İsraili Livandakı quru əməliyyatına görə tənqid edərək bunu "təhlükəli eskalasiya və strateji səhv" adlandırdı. Emmanuel Makron həmçinin müharibə səbəbindən Yaxın Şərqdə qalan Fransa vətəndaşlarını daşıyan iki təxliyə təyyarəsinin Parisə çatacağını açıqladı.

Xatırladaq ki, ABŞ ordusu çərşənbə axşamı əməliyyatın 28 fevralda başladığı gündən bəri İrandakı 1700-dən çox hədəfi vurduğunu bildirdi.

İlham