Azərbaycanın qlobal enerji diplomatiyası - ŞƏRH

Azərbaycan Respublikasının Prezidenti İlham Əliyevin rəhbərliyi ilə Bakıda keçirilən Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclası ölkəmizin dünya enerji bazarındakı həlledici rolunu bir daha nümayiş etdirdi. Bu gün Azərbaycan artıq sadəcə neft və qaz ixrac edən ölkə deyil, həm də Avropanın enerji təhlükəsizliyinin əsas sütunlarından biridir. Prezidentin çıxışında vurğuladığı kimi, Azərbaycanın enerji diplomatiyasının miqyası durmadan genişlənir və biz hazırda 12 ölkəyə qaz tədarük edirik. Bu göstərici ölkəmizə olan beynəlxalq etimadın və Azərbaycanın enerji resurslarına olan yüksək tələbatın bariz nümunəsidir. Təchizat coğrafiyasının bu dərəcədə böyüməsi Azərbaycanın qlobal iqtisadiyyatda strateji əhəmiyyətini artırmaqla yanaşı, regionun geosiyasi mənzərəsini də müsbət istiqamətdə dəyişir. Enerji təhlükəsizliyi məsələləri müasir dövrün ən aktual çağırışlarından biridir. Dövlət başçısının qeyd etdiyi kimi, məhz birlikdə toplaşmağın və enerji təhlükəsizliyinə dair mühüm məsələləri müzakirə yolu ilə həll etməyin nə dərəcədə vacib olduğunu indi daha aydın şəkildə anlayırıq. Dünyada baş verən mürəkkəb siyasi proseslər fonunda enerji marşrutlarının təhlükəsizliyi və davamlılığı hər bir dövlət üçün prioritetə çevrilib. Bu baxımdan, Azərbaycan sadəcə bir mənbə deyil, həm də enerji ehtiyatlarının etibarlı tranziti ölkəsi rolunu da oynayır. Xəzər dənizinin resurslarının dünya bazarlarına çatdırılmasında Azərbaycanın yaratdığı infrastruktur qitələr arası körpü funksiyasını yerinə yetirir. Bu nəhəng layihələrin icrasında beynəlxalq dəstək də həlledici amildir. Dünyanın ən qüdrətli dövləti Amerika Birləşmiş Ştatlarının strateji tərəfdaşımız kimi çıxış etməsini nəzərə alaraq bizim planlarımızın gerçəkləşməsi tamamilə real görünür. ABŞ ilə qurulan bu sarsılmaz əməkdaşlıq enerji layihələrinin həm siyasi, həm də iqtisadi dayanıqlığını təmin edən ən mühüm faktorlardan biridir. Azərbaycanın enerji strategiyası həm də şaxələndirmə prinsipinə əsaslanır. Qaz təchizatının şaxələndirilməsi hər bir ölkə kimi, bizim üçün də xüsusi əhəmiyyət daşıyır. Biz yalnız mövcud bazarları qorumaqla kifayətlənmir, həm də yeni imkanlar axtarırıq. Biz Avropanın enerji bazarında mövcudluğumuzu genişləndirmək niyyətindəyik və bu istiqamətdə atılan hər bir addım həm ölkəmizin milli gəlirlərinin artmasına, həm də Avropa ölkələrinin enerji ehtiyaclarının sabit şəkildə ödənilməsinə xidmət edir. Lakin Azərbaycanın hədəfləri bununla bitmir. Müasir dövrün tələblərinə uyğun olaraq, Məşvərət Şurası çərçivəsində müzakirə olunan məsələlərin bir hissəsi də yaşıl gündəlikdir. Azərbaycan artıq ənənəvi enerji ilə yanaşı, bərpa olunan enerji sahəsində də regional liderə çevrilmək əzmindədir. Bizim gələcəyə baxışımız ekoloji cəhətdən təmiz və dayanıqlı enerji istehsalına söykənir. Bu istiqamətdə konkret hədəflər müəyyən edilmişdir və biz 2032-ci ilə qədər alternativ enerji mənbələrindən 6-8 giqavat elektrik enerjisi əldə etməyi gözləyirik. Bu, ölkəmizin bərpa olunan enerji potensialının nə dərəcədə böyük olduğunu və dövlətin bu sahəyə verdiyi strateji önəmi göstərir. Külək və günəş enerjisi sahəsində həyata keçirilən layihələr Azərbaycanı yaxın gələcəkdə "yaşıl enerji" ixracatçısına çevirəcəkdir. Bu siyasətin təməlində isə böyük bir bəşəri məqsəd dayanır: biz hamımız planetin təhlükəsiz və təmiz olmasını istəyirik. Azərbaycan həm qlobal enerji təhlükəsizliyinə verdiyi töhfələrlə, həm də yaşıl enerjiyə keçid sahəsindəki qətiyyətli addımları ilə bəşəriyyətin ortaq gələcəyi üçün məsuliyyətli tərəfdaş olduğunu sübut edir. Bakıdakı bu mötəbər toplantılar bir daha təsdiqlədi ki, Azərbaycanın təşəbbüsləri qlobal sülhə, rifaha və ekoloji tarazlığın qorunmasına yönəlmişdir.

İlqar İlyasov
Yeni Azərbaycan Partiyası Laçın rayon təşkilatının sədri