Regional əməkdaşlıq, sülh və həmrəylik çağırışı - ŞƏRH

Müasir beynəlxalq münasibətlər sistemində informasiya məkanı, media diplomatiyası və qlobal siyasi proseslər dövlətlər arasında əməkdaşlığın inkişafında mühüm rol oynayır. Bu baxımdan, Azərbaycanın ev sahibliyi etdiyi IV Şuşa Qlobal Media Forumu beynəlxalq media nümayəndələrinin, ekspertlərin və siyasətçilərin bir araya gəldiyi nüfuzlu platforma kimi xüsusi əhəmiyyət daşıyır. Forum qlobal informasiya təhlükəsizliyi, media mühitində yeni çağırışlar, regional əməkdaşlıq və beynəlxalq münasibətlərdə aktual məsələlərin müzakirəsi üçün geniş imkanlar yaradır.

Forum çərçivəsində Azərbaycan Respublikasının Prezidenti İlham Əliyevin çıxışı ölkənin xarici siyasət kursu, regional sabitliyin təmin olunması, beynəlxalq əməkdaşlığın inkişafı və sülh təşəbbüslərinə dair mühüm mesajlarla yadda qaldı. Dövlət başçısı çıxışında Azərbaycan–Türkiyə qardaşlığının strateji əhəmiyyətini, müsəlman ölkələri arasında həmrəyliyin möhkəmləndirilməsinin vacibliyini, Azərbaycanın beynəlxalq münasibətlərdə konstruktiv və nəticəyönümlü rolunu, eləcə də Cənubi Qafqazda davamlı sülh və əməkdaşlıq mühitinin formalaşdırılması istiqamətində ölkəmizin mövqeyini ətraflı şəkildə ifadə etdi. Səsləndirilən fikirlər Azərbaycanın milli maraqlara söykənən, eyni zamanda regional və qlobal sabitliyə töhfə verməyi hədəfləyən xarici siyasət strategiyasının əsas istiqamətlərini bir daha nümayiş etdirdi.

Prezident İlham Əliyev çıxışında vurğuladı ki, Türkiyə və Azərbaycan kimi iki ölkəyə verilə biləcək əsas mesaj yalnız dostluq və qardaşlıqdır. Bu fikir iki dövlət arasında uzun illər ərzində formalaşmış strateji tərəfdaşlığın və qarşılıqlı etimadın ifadəsidir. Azərbaycan və Türkiyə siyasi, iqtisadi, hərbi, enerji, nəqliyyat və humanitar sahələrdə uğurla əməkdaşlıq edir. İki ölkənin münasibətləri ortaq tarix, dil, mədəniyyət və milli-mənəvi dəyərlər üzərində qurulub. "Bir millət, iki dövlət" prinsipi bu əməkdaşlığın ideoloji əsasını təşkil edir və regional sabitliyin mühüm amillərindən biri hesab olunur. Son illərdə həyata keçirilən birgə enerji layihələri, beynəlxalq nəqliyyat dəhlizlərinin inkişafı, müdafiə sənayesində əməkdaşlıq və qarşılıqlı siyasi dəstək Azərbaycan-Türkiyə münasibətlərini dünya miqyasında uğurlu strateji müttəfiqlik nümunəsinə çevirib.

Prezident İlham Əliyev çıxışında Azərbaycanın hər zaman müsəlman ölkələri arasında həmrəyliyi güclü təşviq etdiyini xüsusi vurğuladı. Azərbaycanın xarici siyasətində İslam dünyası ilə əməkdaşlıq mühüm yer tutur. Ölkəmiz İslam Əməkdaşlıq Təşkilatı və digər beynəlxalq platformalarda müsəlman dövlətlərinin birliyini, qarşılıqlı dəstəyini və ortaq maraqlarını müdafiə edən fəal ölkələrdən biridir. Azərbaycan müxtəlif dövrlərdə islamofobiyaya qarşı mübarizə, dini tolerantlığın təşviqi və mədəniyyətlərarası dialoqun inkişafı istiqamətində mühüm təşəbbüslərlə çıxış edib. Eyni zamanda, Azərbaycan müxtəlif dinlərin və mədəniyyətlərin dinc yanaşı yaşadığı tolerant cəmiyyət modeli təqdim edir. Bu xüsusiyyət ölkənin beynəlxalq nüfuzunun artmasına da mühüm töhfə verir.

Prezident İlham Əliyev qeyd etdi ki, Azərbaycanın rolu hər zaman konstruktiv və nəticəyönümlü olub, gərginliyin azaldılmasına hesablanıb. Bu yanaşma ölkənin beynəlxalq münasibətlərdə balanslaşdırılmış siyasət aparmasının göstəricisidir. Azərbaycan müxtəlif beynəlxalq təşkilatlarda fəal iştirak edir, dialoqu və qarşılıqlı anlaşmanı dəstəkləyir, münaqişələrin siyasi və diplomatik yollarla həllinə üstünlük verir. Son illərdə ölkəmiz bir çox beynəlxalq tədbirlərə ev sahibliyi edib, müxtəlif dövlətlər arasında dialoqun qurulmasına töhfə verib. Azərbaycanın təşəbbüsləri regional sabitliyin möhkəmlənməsinə və əməkdaşlığın genişlənməsinə xidmət edir.

Müasir beynəlxalq münasibətlər sistemində böyük dövlətlərin sülh təşəbbüsləri qlobal təhlükəsizliyin təmin olunmasında mühüm rol oynayır. Dünyada davam edən silahlı münaqişələr, regional qarşıdurmalar və geosiyasi gərginliklər fonunda dialoq, diplomatiya və qarşılıqlı əməkdaşlıq daha da aktuallaşır. Prezident İlham Əliyev çıxışında ABŞ Prezidenti Donald Tramp barədə də danışaraq onu sülhsevər və dünyanın müxtəlif bölgələrində sülhün bərqərar olunmasına çalışan lider kimi xarakterizə etdi. Azərbaycan da sülh təşəbbüslərini dəstəkləyərək beynəlxalq münasibətlərdə hüquqa, suverenliyə və dövlətlərin ərazi bütövlüyünə hörmət prinsiplərinin qorunmasını vacib hesab edir.

Prezident İlham Əliyev çıxışında region ölkələrinin maraqlarının nəzərə alınmasının vacibliyini də diqqətə çatdırdı. Dövlət başçısı bildirdi ki, bütün regionun – Rusiya, İran, Türkiyə, Ermənistan və Azərbaycanın – məsələlərinə bərabər hüquq prinsipi əsasında yanaşılmalıdır. Bu da Cənubi Qafqazda davamlı sülh və uzunmüddətli sabitliyin təmin olunmasına yönəlmiş baxışı əks etdirir. Regionun inkişafı yalnız qarşılıqlı hörmət, suverenliyə ehtiram, iqtisadi əməkdaşlıq və siyasi dialoq şəraitində mümkün ola bilər. Nəqliyyat dəhlizlərinin açılması, ticarət əlaqələrinin genişləndirilməsi, enerji əməkdaşlığının inkişafı və humanitar münasibətlərin möhkəmləndirilməsi region xalqlarının rifahına xidmət edə bilər. Bu baxımdan Azərbaycan əməkdaşlıq platformalarının yaradılması və etimad mühitinin formalaşdırılması istiqamətində öz təşəbbüslərini davam etdirir.

Şuşa Qlobal Media Forumu yalnız siyasi dialoq platforması deyil, həm də media nümayəndələrinin peşəkar təcrübə mübadiləsi apardıqları beynəlxalq tədbirdir. Müasir dövrdə informasiya müharibələrinin geniş vüsət aldığı bir zamanda obyektiv jurnalistika, etibarlı informasiya və peşə etikası xüsusi əhəmiyyət daşıyır. Forum çərçivəsində aparılan müzakirələr göstərir ki, media cəmiyyətlərin düzgün məlumatlandırılması, dezinformasiyaya qarşı mübarizə və beynəlxalq əməkdaşlığın inkişafında mühüm rol oynayır.

IV Şuşa Qlobal Media Forumunda Prezident İlham Əliyevin çıxışı Azərbaycanın xarici siyasət kursunun əsas istiqamətlərini bir daha ortaya qoydu. Türkiyə ilə strateji qardaşlıq münasibətlərinin möhkəmləndirilməsi, müsəlman ölkələri arasında həmrəyliyin təşviqi, beynəlxalq münasibətlərdə konstruktiv yanaşmanın davam etdirilməsi, sülh təşəbbüslərinin dəstəklənməsi və Cənubi Qafqazda əməkdaşlığın genişləndirilməsi çıxışın əsas məzmununu təşkil etdi. Bu da Azərbaycanın regional və beynəlxalq səviyyədə etibarlı tərəfdaş kimi mövqeyini gücləndirməklə yanaşı, sülh, sabitlik və qarşılıqlı əməkdaşlığa əsaslanan gələcəyin formalaşdırılmasına xidmət edən siyasi xəttini də əks etdirir. Şuşa Qlobal Media Forumu isə bu ideyaların beynəlxalq ictimaiyyətə çatdırılması və müxtəlif ölkələr arasında dialoqun genişləndirilməsi baxımından mühüm əhəmiyyət daşıyan platforma kimi öz rolunu davam etdirir.

Samir Qocayev,

YAP Goranboy rayon təşkilatının sədri