Etibarlı tərəfdaşlıq portfeli və təhlükəsizlik strategiyası - ŞƏRH

Müasir beynəlxalq iqtisadi münasibətlər sistemində ölkələrin qlobal kapital axınından pay almasını şərtləndirən ən mühüm meyar rəsmi institutların etibarlılığı və dövlətin hüquqi öhdəliklərinə nümayiş etdirdiyi sadiqlikdir. Azərbaycan Respublikasının Prezidenti cənab İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə proqram xarakterli çıxışı ölkəmizin bu müstəvidə son onilliklər ərzində formalaşdırdığı və qoruduğu "mütləq etibarlı tərəfdaş" imicini bir daha qlobal birliyə bəyan etdi. Ölkəmizin enerji müstəqilliyinin bünövrəsini qoyan, neft və qaz resurslarının kəşfiyyatı, hasilatı və dünya bazarlarına təhlükəsiz nəqlinə yol açan, təxminən otuz il bundan əvvəl imzalanmış transmilli müqavilələrin şərtləri bu günə qədər tamamilə toxunulmaz olaraq qalmışdır. Keçən dövr ərzində dünyada baş verən siyasi, hərbi və iqtisadi kataklizmlərə baxmayaraq, həmin tarixi müqavilələrin mətnində bircə sözün belə dəyişdirilməməsi Azərbaycan dövlətinin öz imzasına verdiyi ali dəyərin ən bariz nümunəsidir. Müqavilə və qanunların bu cür sabitliyi xarici investorlar üçün ən arzuolunan hüquqi qalxandır və kapitalın qorunmasına yüz faiz təminat verir.

Dövlətimizin biznes mühitində tətbiq etdiyi konseptual yanaşmanın əsas xüsusiyyəti ondan ibarətdir ki, beynəlxalq öhdəliklər və tərəfdaşlıq məsuliyyəti hər növ konyunktur maraqlardan və müvəqqəti iqtisadi mənfəətlərdən uca tutulur. Zaman keçdikcə qlobal bazarlarda qiymətlərin, şərtlərin dəyişməsi fonunda ilkin müqavilə parametrlərinin bəziləri cari dövrün tələbləri ilə və ya dövlətin daxili iqtisadi gözləntiləri ilə yüz faiz tam uzlaşmaya bilər. Lakin belə vəziyyətlərdə belə, Azərbaycan respublikası imzalanmış sənədlərə birtərəfli müdaxilə etmir, qlobal iş dünyası qarşısındakı mənəvi və hüquqi məsuliyyətini hər şeydən üstün tutur. Məhz bu prinsipial duruş və institusional dözümlülük investorların ölkəmizə uzunmüddətli strategiyalarla gəlməsini, milyardlarla dollar həcmində vəsaiti tərəddüd etmədən yerli layihələrə yönəltməsini təmin edən ən cəlbedici amillərdən biri kimi çıxış edir.
Digər tərəfdən, qlobal geosiyasi xaosun, regional münaqişələrin və beynəlxalq təhdidlərin pik həddə çatdığı müasir dünyada hər bir biznes subyekti üçün ən həlledici və ilkin ehtiyac fiziki və hüquqi təhlükəsizlik mühitidir. Təhlükəsizliyin təmin olunmadığı heç bir coğrafiyada iqtisadi tərəqqidən və ya investisiya sabitliyindən danışmaq mümkün deyildir. Bu mənada, Azərbaycan bu gün planetin ən dinc, sabit və təhlükəsiz məkanlarından biri statusunu daşıyır. Ölkədə daxili asayiş, ictimai sabitlik və kriminogen vəziyyət müvafiq dövlət orqanları tərəfindən tamamilə və qətiyyətlə nəzarət altında saxlanılır. Xarici vətəndaşların, diplomatik korpus nümayəndələrinin və biznes rəhbərlərinin ölkə ərazisində tam təhlükəsiz şəraitdə fəaliyyət göstərməsi, respublikanın daxili idarəetmə sisteminin və hüquq-mühafizə mexanizmlərinin yüksək peşəkarlığından xəbər verir. Beynəlxalq arenada "etibarlı tərəfdaş portfeli" ilə bu cür "sarsılmaz daxili təhlükəsizlik" mühitinin unikal sintezi, Azərbaycanı Avrasiya məkanında uzunmüddətli transmilli layihələrin həyata keçirilməsi üçün ən ideal və rəqabətədavamlı mərkəzə çevirir.

Kinəxanım Əliyeva
YAP Masallı rayon təşkilatı Mahmudavar ərazi partiya təşkilatının sədri