Zəfərdən yeni siyasi mərhələyə: güclü Azərbaycanın qarşısında yeni hədəflər - ŞƏRH

Yeni Azərbaycan Partiyasının VIII Qurultayında Prezident İlham Əliyevin nitqi Azərbaycanın qarşıdakı inkişaf mərhələsinin əsas istiqamətlərini müəyyənləşdirən mühüm siyasi proqram kimi diqqəti cəlb etdi.

Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, dövlətimizin tarixində yeni mərhələnin siyasi mahiyyətini ortaya qoyan əlamətdar platforma kimi yadda qaldı. Oktyabrın 2-də Heydər Əliyev Mərkəzində keçirilən Qurultay Azərbaycanın ərazi bütövlüyünü və suverenliyini tam bərpa etdiyi, regionda yeni reallıqlar yaratdığı bir dövrdə baş tutdu. Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin Qurultaydakı nitqi isə keçmişin uğurlarına nəzər salmaqla yanaşı, gələcək hədəfləri müəyyən edən strateji məzmunu ilə seçildi.

Prezident İlham Əliyev çıxışının əvvəlində Yeni Azərbaycan Partiyasının ölkənin ictimai-siyasi həyatındakı xüsusi rolunu qeyd edərək bildirdi ki, Yeni Azərbaycan Partiyası “nəinki Azərbaycanın, Cənubi Qafqazın ən böyük siyasi qüvvəsidir”. Otuz ildən artıq müddətdə iqtidarda olan partiyanın Azərbaycanın uğurlu və şərəfli inkişaf yolunda böyük töhfəsi olduğu vurğulandı. Bu fikir həm də Yeni Azərbaycan Partiyasının keçdiyi tarixi yolun nəticələrinin qiymətləndirilməsi baxımından mühüm əhəmiyyət daşıyır.
Prezidentin nitqində xüsusi yer tutan məsələlərdən biri Azərbaycanın bugünkü Zəfərə gedən yolunun tarixi-siyasi əsaslarının təhlili oldu. Dövlət başçısı Ulu Öndər Heydər Əliyevin siyasi hakimiyyətə qayıdışının xalqın tələbi olduğunu bir daha vurğuladı. Çünki həmin dövrdə Azərbaycan ciddi siyasi, iqtisadi və hərbi böhranla üz-üzə idi. Dövlətçiliyin qorunması, müstəqilliyin möhkəmləndirilməsi və ölkənin beynəlxalq təcriddən çıxarılması qarşıda duran ən mühüm vəzifələr idi.

İllər keçdikcə taktiki və hətta müəyyən strateji məqsədlər dəyişə bilər, lakin siyasi kursun ana xətti dəyişməz olaraq qalır. Bu xəttin mahiyyətini isə dövlət başçısı belə ifadə edib: “müstəqillik, dövlətçilik, iqtisadi müstəqillik, güclü hərbi potensial və öz imkanlarımızdan maksimum istifadə etmə imkanları”.

Məhz bu ardıcıl siyasətin nəticəsində Azərbaycan əvvəlcə iqtisadi və siyasi baxımdan gücləndi, sonra isə qarşıya qoyduğu tarixi məqsədə – ərazi bütövlüyünün və suverenliyin bərpasına nail oldu.

Prezident İlham Əliyev 2020-ci il Vətən müharibəsinin və 2023-cü ilin sentyabrında həyata keçirilən antiterror tədbirlərinin Azərbaycan tarixindəki müstəsna əhəmiyyətini xüsusi qeyd etdi. Dövlət başçısı 8 Noyabrı əbədi Zəfər günü kimi xarakterizə etməklə yanaşı, 20 Sentyabrın da eyni dərəcədə mühüm tarixi hadisə olduğunu bildirdi. Çünki məhz həmin gün Azərbaycan separatizmə və işğala son qoyaraq öz ərazi bütövlüyünü və suverenliyini tam bərpa etdi.

Bu Zəfərlərin ən böyük mənası isə ondan ibarətdir ki, Azərbaycan öz haqqını təkbaşına, böyük geosiyasi təzyiqlər və ciddi müqavimət şəraitində təmin etdi. Prezidentin vurğuladığı kimi, Azərbaycan xalqı “yumruq kimi birləşərək öz haqqını tələb edirdi” və dövlət rəhbərliyi bu şərəfli missiyanı yerinə yetirdi.

Qurultaydakı nitqin mühüm istiqamətlərindən biri Azərbaycanın hərbi gücünün daha da artırılması ilə bağlı idi. Prezident İlham Əliyev açıq şəkildə bildirdi: “Əsas vəzifələrdən biri hərbi gücümüzün artırılmasıdır.”

Bu yanaşma Azərbaycanın sülh siyasəti ilə tam uzlaşır. Azərbaycan müharibə istəmir, əksinə, əldə etdiyi Zəfərdən sonra sülh və əməkdaşlıq gündəliyini ön plana çəkir. Lakin dünyanın müxtəlif bölgələrində münaqişələrin artdığı, beynəlxalq hüququn ciddi sınaqlarla üzləşdiyi bir vaxtda dövlətin təhlükəsizliyinin yalnız siyasi bəyanatlarla təmin olunmasının mümkün olmadığı da reallıqdır.

Bu baxımdan güclü ordu, müasir silahlanma, müdafiə sənayesinin inkişafı və yüksək döyüş qabiliyyəti Azərbaycanın dövlət müstəqilliyinin etibarlı təminatlarından biri olaraq qalır. Prezidentin mesajı aydındır: sülhü qorumağın ən mühüm şərtlərindən biri dövlətin öz təhlükəsizliyini təmin etmək imkanına malik olmasıdır.

Prezidentin nitqində müasir dövrdə ideoloji təhlükəsizlik məsələsinə də xüsusi diqqət yetirildi. Dünyada informasiya texnologiyalarının sürətlə inkişaf etdiyi, sosial şəbəkələrin və süni intellektin həyatın bütün sahələrinə nüfuz etdiyi bir şəraitdə milli informasiya məkanının qorunması mühüm dövlət vəzifəsinə çevrilir.

Azərbaycanın qazandığı tarixi Zəfər yalnız hərbi meydanda əldə olunmayıb. Bu Zəfərin arxasında xalqın milli birliyi, dövlətə inamı, siyasi iradə və milli maraqlar ətrafında həmrəylik dayanır. Buna görə də əldə edilmiş nailiyyətlərin qorunması üçün cəmiyyətin ideoloji baxımdan sağlam və milli dəyərlərə bağlı olması xüsusi əhəmiyyət kəsb edir.
Prezidentin çıxışından irəli gələn əsas mesajlardan biri də budur ki, Azərbaycan həqiqətləri müasir informasiya imkanlarından istifadə etməklə daha fəal şəkildə dünya ictimaiyyətinə çatdırılmalıdır.

Müstəqil xarici siyasət – Azərbaycanın beynəlxalq nüfuzunun göstəricisi
Prezident İlham Əliyevin nitqində Azərbaycanın xarici siyasətinin uğurları da geniş şəkildə diqqətə çatdırıldı. Azərbaycan müxtəlif dövlətlərlə qarşılıqlı hörmət və milli maraqlar əsasında münasibətlər quraraq müstəqil xarici siyasət kursunu davam etdirir.
Dövlət başçısı Çin və ABŞ-la strateji tərəfdaşlıq münasibətlərinin qurulmasını xüsusi tarixi hadisə kimi qiymətləndirdi. Çinlə hərtərəfli strateji tərəfdaşlıq haqqında bəyannamənin, ABŞ-la isə Strateji Xartiyanın imzalanması Azərbaycanın beynəlxalq münasibətlər sistemində artan rolunun göstəricisi kimi təqdim olundu. Eyni zamanda, Azərbaycanın Avropa İttifaqına üzv 10 ölkə ilə strateji tərəfdaşlıq formatında münasibətlərə malik olduğu bildirildi.
Bütün bunların əsasında isə Azərbaycanın etibarlı tərəfdaş imici dayanır. Prezident bu məqamı çox dəqiq ifadə edib: “Artıq dünyada bilməyən yoxdur ki, sözümüz imzamız qədər dəyərlidir.”

Bu, əslində, Azərbaycanın xarici siyasət fəlsəfəsinin əsas prinsiplərindən biridir. Azərbaycan verdiyi sözə sadiqdir, öz milli maraqlarını qoruyur, eyni zamanda tərəfdaşlarına hörmətlə yanaşır. Dövlət başçısının qeyd etdiyi kimi, siyasətdə emosiyalara deyil, uzaqgörənliyə və strateji düşüncəyə üstünlük verilir.

Siyasi müstəqilliyin və hərbi gücün davamlı olması üçün möhkəm iqtisadi baza da vacibdir. Bu baxımdan Prezidentin çıxışında iqtisadi inkişafın, maliyyə dayanıqlığının və sosial rifahın yüksəldilməsinin prioritet istiqamətlər olaraq qalması xüsusi əhəmiyyət daşıyır.
Azərbaycanın son illərdə həyata keçirdiyi iqtisadi siyasət ölkənin maliyyə imkanlarını genişləndirib, investisiya cəlbediciliyini artırıb və yeni iqtisadi layihələrin reallaşdırılması üçün əlverişli şərait yaradıb. Bu iqtisadi potensial həm də Azərbaycanın müstəqil qərarlar qəbul etmək imkanlarını gücləndirir.

Sosial siyasət də dövlət siyasətinin mühüm istiqamətlərindən biridir. Əhalinin gəlirlərinin artırılması, pensiya və sosial ödənişlərin yüksəldilməsi, yeni iş yerlərinin yaradılması və insanların həyat səviyyəsinin yaxşılaşdırılması dövlət siyasətinin əsas məqsədləri sırasında yer alır.

Azərbaycanın qarşısında duran ən mühüm vəzifələrdən biri işğaldan azad edilmiş ərazilərin bərpası və keçmiş məcburi köçkünlərin öz doğma yurdlarına qayıdışının təmin edilməsidir.
Qarabağ və Şərqi Zəngəzurda aparılan genişmiqyaslı quruculuq işləri Azərbaycanın hərbi Zəfərini sosial və iqtisadi dirçəlişə çevirən böyük dövlət layihəsidir. Burada yeni yaşayış məntəqələri salınır, yollar və kommunikasiya xətləri çəkilir, məktəblər, xəstəxanalar və digər sosial obyektlər inşa olunur.

“Böyük Qayıdış” yalnız insanların öz torpaqlarına dönməsi deyil, həm də həmin ərazilərin Azərbaycanın iqtisadi, sosial və mədəni həyatına yenidən inteqrasiyası deməkdir.
Prezident İlham Əliyevin Yeni Azərbaycan Partiyasının VIII Qurultayındakı nitqinin ümumi mahiyyəti ondan ibarətdir ki, Azərbaycan artıq yeni tarixi mərhələyə qədəm qoyub. Ərazi bütövlüyü və suverenlik bərpa olunub, ölkəmiz regionda yeni reallıqlar yaradıb. Lakin əldə olunan Zəfər son deyil, yeni hədəflər üçün möhkəm başlanğıcdır.

Bu gün qarşıda duran əsas vəzifələr Azərbaycanın gücünü daha da artırmaq, iqtisadi müstəqilliyi möhkəmləndirmək, hərbi potensialı yüksəltmək, milli həmrəyliyi qorumaq, beynəlxalq mövqeləri daha da gücləndirmək və azad edilmiş ərazilərin sürətli inkişafını təmin etməkdir.

Prezidentin nitqi bir daha göstərdi ki, Azərbaycanın uğurlarının əsasında ardıcıl və uzunmüddətli dövlət siyasəti, xalq-dövlət birliyi və milli maraqlara söykənən siyasi iradə dayanır.
Bu baxımdan Yeni Azərbaycan Partiyasının VIII Qurultayı yalnız bir siyasi partiyanın növbəti qurultayı deyil. Bu Qurultay Zəfər qazanmış, suverenliyini tam təmin etmiş Azərbaycanın yeni inkişaf mərhələsinin siyasi gündəliyinin ifadəsi kimi tarixə düşdü.
Azərbaycan bundan sonra da öz yolunu müstəqil müəyyən edəcək. Qarşıda daha böyük hədəflər, daha mühüm vəzifələr və daha geniş imkanlar var. Prezident İlham Əliyevin Qurultaydakı nitqinin ruhu isə bu fikri aydın şəkildə ifadə edir: güclü dövlət, güclü iqtisadiyyat, güclü ordu və milli birlik Azərbaycanın gələcək uğurlarının əsas təminatlarıdır.
Və bu yolun başlıca dayağı dəyişməz olaraq qalır: müstəqil Azərbaycan, möhkəm dövlətçilik və milli maraqlara əsaslanan siyasi iradə.

Sevda Quluyeva

YAP Kəngərli rayon təşkilatının sədri