YAP Sabirabad rayon təşkilatında tədbir keçirilib

​Bu gün Yeni Azərbaycan Partiyası Sabirabad rayon təşkilatının Ulacalı kənd ərazi partiya təşkilatında partiyanın sədri, cənab Prezident İlham Əliyevin YAP-ın VIII qurultayındakı tarixi çıxışının mahiyyətinə həsr olunmuş tədbir keçirilib.
​Tədbir müasir müstəqil Azərbaycan dövlətinin banisi, Ümummilli Lider Heydər Əliyevin və ölkəmizin ərazi bütövlüyü, suverenliyi uğrunda canlarından keçmiş əziz şəhidlərimizin xatirəsinin 1 dəqiqəlik sükutla yad edilməsi ilə başlayıb.
​Tədbirdə çıxış edən YAP Sabirabad rayon təşkilatının sədri Varis Rüstəmov bildirib ki, cənab Prezident İlham Əliyevin YAP-ın VIII qurultayındakı dərin məzmunlu nitqi partiyamızın gələcək fəaliyyət istiqamətlərini və dövlətimizin strateji inkişaf hədəflərini müəyyən edən mühüm yol xəritəsidir. O qeyd edib ki, Müzəffər Ali Baş Komandanın rəhbərliyi ilə qazanılan tarixi zəfər və azad olunmuş torpaqlarımızda aparılan genişmiqyaslı bərpa-quruculuq işləri hər bir partiya fəalının üzərinə böyük məsuliyyət qoyur. Rayon təşkilatının sədri vurğulayıb ki, Vətən uğrunda canlarını fəda etmiş şəhidlərimizin xatirəsini uca tutmaq, onların ailələrinə və qazilərimizə qayğı göstərmək partiyamızın və hər bir vətəndaşımızın ən müqəddəs borcudur.
​Daha sonra çıxış edən şəhid ataları Etibar Muradov və Ziyadxan Gözəlov cənab Prezident İlham Əliyevin və Birinci vitse-prezident Mehriban xanım Əliyevanın şəhid ailələrinə göstərdiyi yüksək diqqət və qayğıya görə dərin minnətdarlıqlarını bildiriblər. Onlar dövlətimizin qüdrətlənməsi və milli həmrəyliyimizin möhkəmlənməsi naminə həyata keçirilən siyasəti hər zaman yekdilliklə dəstəklədiklərini vurğulayıblar.
​YAP-ın VIII Qurultayında Sabirabad rayon təşkilatının nümayəndələrindən biri olmuş Ulacalı kənd ərazi partiya təşkilatının sədri Natiq Xanməmmədli də öz çıxışında Qurultayın tarixi əhəmiyyətindən və cənab Prezidentin nitqindən irəli gələn vəzifələrdən bəhs edib. O, yerlərdə bu tövsiyə və tapşırıqların uğurla icra edilməsi üçün ərazi partiya təşkilatının fəallarının öz güclərini səfərbər etdiklərini diqqətə çatdırıb.
​Tədbirin sonunda xatirə şəkli çəkdirilib.