Füzuli – qayıdışın qürur salnaməsi, zəfərin əbədi izi - ŞƏRH

​Azərbaycanın tarixi taleyində elə şəhərlər var ki, onların adı çəkiləndə insanın qəlbində həm nisgil, həm qürur, həm də sonsuz sevinc hissi baş qaldırır. Füzuli də məhz belə şəhərlərimizdəndir. Bu şəhərin taleyi xalqımızın torpağa bağlılığının, doğma yurda sədaqətinin və ən çətin sınaqlar qarşısında belə sınmayan iradəsinin parlaq ifadəsidir. Füzulinin adı bu gün yalnız bir yaşayış məntəqəsinin deyil, həm də milli yaddaşın, qəhrəmanlığın və Böyük Qayıdışın rəmzi kimi səslənir.
​17 oktyabr Azərbaycan tarixində xüsusi əhəmiyyət daşıyan günlərdən biridir. 1993-cü ildə Ermənistan silahlı qüvvələri tərəfindən işğal edilmiş Füzuli şəhəri 2020-ci il oktyabrın 17-də, Vətən müharibəsinin gedişində Azərbaycan Ordusunun qəhrəmanlığı və Müzəffər Ali Baş Komandan İlham Əliyevin rəhbərliyi ilə işğaldan azad edildi. Bu tarixi hadisə uzun illər doğma yurd həsrəti ilə yaşayan insanların qəlbində yeni ümidlər oyatdı, xalqımızın qələbə əzmini daha da gücləndirdi.
​ ​İllərlə davam edən həsrət xalqımızın torpaqlarını azad etmək əzmini zəiflətmədi. Əksinə, bu həsrət milli birliyə, mübarizə ruhuna və qələbə iradəsinə çevrildi.
​2020-ci ilin payızında başlayan Vətən müharibəsi Azərbaycanın müasir tarixində yeni bir səhifə açdı. Azərbaycan Ordusu döyüş meydanında göstərdiyi misilsiz şücaətlə xalqımızın illərlə gözlədiyi qələbəyə doğru inamla irəlilədi. Hər azad edilən kənd və şəhər Böyük Qayıdışa gedən yolun mühüm mərhələsinə çevrildi.
​Oktyabrın 17-də Füzuli şəhərinin azad edilməsi bu baxımdan xüsusi tarixi əhəmiyyət daşıdı. Şəhərin azadlığı uğrunda döyüşlər Azərbaycan əsgərinin cəsarətini, peşəkarlığını və Vətən sevgisini bir daha nümayiş etdirdi. Bu qələbə uğrunda canından keçən şəhidlərimizin xatirəsi xalqımızın yaddaşında əbədi yaşayacaq. Qazilərimizin göstərdiyi fədakarlıq isə gələcək nəsillər üçün mərdlik və vətənpərvərlik nümunəsidir.
​Füzuli şəhərinin azad olunması Azərbaycanın hərbi qüdrətini, xalqın iradəsini və dövlətin qətiyyətli siyasətini bütün dünyaya nümayiş etdirdi. Bu qələbə bir daha sübut etdi ki, xalqın milli birliyi, ordunun gücü və Vətənə bağlılıq ən çətin sınaqları belə aşmağa qadirdir.
​ ​Bu prosesdə Füzuli Beynəlxalq Hava Limanının xüsusi yeri var. 2021-ci il yanvarın 14-də hava limanının təməli qoyuldu, 2021-ci il oktyabrın 26-da isə Azərbaycan və Türkiyə prezidentlərinin iştirakı ilə onun rəsmi açılışı həyata keçirildi. Füzuli Beynəlxalq Hava Limanı işğaldan azad edilmiş ərazilərdə qurulan ilk beynəlxalq hava limanı kimi regionun nəqliyyat imkanlarının genişləndirilməsində mühüm rol oynayır. O, Qarabağın və Şərqi Zəngəzurun ölkənin digər bölgələri və beynəlxalq nəqliyyat marşrutları ilə əlaqələrinin inkişafına xidmət edir.
​İnsan üçün doğulduğu torpaqdan əziz məkan yoxdur. İllərlə uzaqda yaşamaq, doğma evinin həsrətini çəkmək, uşaqlıq xatirələrini yalnız yaddaşında yaşatmaq asan deyil. Buna görə də Füzuliyə qayıdışın mənası təkcə ünvan dəyişməkdən ibarət deyil. Bu, illərlə yarımçıq qalmış həyatın yenidən qurulması, ailələrin öz köklərinə qovuşması və itirilmiş doğmalıq hissinin bərpasıdır.
​ ​ ​17 oktyabr – Füzuli Şəhəri Günü xalqımızın yaddaşında daim yaşayacaq. Bu tarix Azərbaycan əsgərinin qəhrəmanlığını, dövlətimizin qətiyyətini, xalqımızın birliyini və doğma torpağa sonsuz bağlılığını özündə birləşdirir.
​Füzuli bu gün yalnız azad edilmiş şəhər deyil, həm də Azərbaycanın yenilməz iradəsinin canlı təcəssümüdür. Onun hər yeni küçəsi, hər bərpa olunan evi və hər qayıdan sakini xalqımızın gələcəyə inamını gücləndirir.
​Füzulinin taleyi bir daha sübut edir ki, doğma yurda sevgi zamanla silinmir, milli yaddaş unudulmur, azadlıq arzusu isə gec-tez gerçəyə çevrilir. Bu gün Füzuli azad nəfəs alır, yenidən canlanır və Azərbaycanın parlaq gələcəyinə doğru inamla addımlayır.
​17 oktyabr münasibətilə Füzuli sakinlərini, bütün Azərbaycan xalqını təbrik edir, bu müqəddəs torpağın azadlığı uğrunda canından keçən şəhidlərimizin əziz xatirəsini ehtiramla yad edirik.

​Turanə Baxşəliyeva
Şahbuz Rayon Mərkəzləşdirilmiş Kitabxana Sisteminin direktoru, Naxçıvan Regional Mədəniyyət İdarəsinin Şahbuz Rayon Sektoru ərazi partiya təşkilatının sədr müavini