Milli qürurumuzun, dövlətçiliyimizin və müstəqilliyimizin rəmzi - ŞƏRH

Dövlət rəmzləri hər bir xalqın tarixini, milli kimliyini, müstəqillik iradəsini və gələcəyə baxışını özündə birləşdirən müqəddəs dəyərlərdir. Azərbaycan Respublikasının Dövlət Bayrağı da xalqımızın azadlıq arzularının, dövlətçilik ənənələrinin və milli birliyinin ən parlaq ifadəsidir. Üçrəngli bayrağımıza baxarkən yalnız mavi, qırmızı və yaşıl rənglərdən ibarət parçanı deyil, əsrlər boyu yaşadılmış milli idealları, müstəqillik uğrunda mübarizəni, xalqımızın zəngin mədəniyyətini və dövlətimizin suverenliyini görürük. Buna görə də Dövlət Bayrağı Günü hər bir azərbaycanlı üçün xüsusi mənəvi əhəmiyyət daşıyır.
Azərbaycanın üçrəngli bayrağının tarixi XX əsrin əvvəllərində milli oyanış və istiqlal hərəkatının gücləndiyi dövrə gedib çıxır. 1918-ci il mayın 28-də Azərbaycan Xalq Cümhuriyyətinin yaradılması xalqımızın dövlətçilik tarixində mühüm dönüş nöqtəsi oldu. Şərqdə ilk demokratik respublikalardan biri kimi tanınan Azərbaycan Xalq Cümhuriyyəti qısa müddət ərzində dövlət quruculuğu, təhsil, mədəniyyət, ordu və diplomatiya sahələrində mühüm addımlar atdı. Yeni dövlətin milli rəmzlərinin müəyyənləşdirilməsi də bu quruculuq prosesinin ayrılmaz hissəsi idi. 1918-ci il noyabrın 9-da üçrəngli Dövlət Bayrağı qəbul edildi və Azərbaycan Xalq Cümhuriyyətinin rəsmi dövlət rəmzinə çevrildi.
Bayrağımızın hər bir rəngi dərin məna daşıyır. Mavi rəng Azərbaycan xalqının türk mənşəyini, türk dünyası ilə tarixi və mədəni bağlılığını ifadə edir. Qırmızı rəng müasir cəmiyyət qurmaq, inkişaf etmək, tərəqqiyə və demokratik dəyərlərə qovuşmaq ideyasını simvolizə edir. Yaşıl rəng isə İslam sivilizasiyasına və mənəvi-mədəni irsimizə bağlılığımızı göstərir. Qırmızı zolağın ortasında yerləşən ağ aypara və səkkizguşəli ulduz bayrağımızın kompozisiyasını tamamlayır. Bu rəmzlər bütövlükdə xalqımızın tarixi köklərini, müasirlik arzusunu və mənəvi dəyərlərini vahid ideyada birləşdirir.
Azərbaycan Xalq Cümhuriyyətinin ömrü uzun olmadı. 1920-ci il aprelin 27-də ölkəmizin müstəqilliyi itirildi və üçrəngli bayrağımız dövlət rəmzi kimi rəsmi istifadədən çıxarıldı. Lakin bayrağın ifadə etdiyi azadlıq ideyası xalqın yaddaşından silinmədi. Nəsillər dəyişsə də, müstəqil dövlət qurmaq arzusu yaşamaqda davam etdi. Xalqımızın istiqlal düşüncəsi müxtəlif dövrlərdə özünü göstərdi və XX əsrin sonlarında milli azadlıq hərəkatının güclənməsi ilə yenidən geniş vüsət aldı. Bu proses üçrəngli bayrağın yenidən dövlət rəmzi kimi qəbul olunmasına aparan tarixi zəmin yaratdı.
1990-cı il noyabrın 17-də Ulu Öndər Heydər Əliyevin təşəbbüsü və sədrliyi ilə Naxçıvan Muxtar Respublikası Ali Məclisinin keçirilən sessiyasında üçrəngli bayraq Naxçıvanın dövlət bayrağı kimi qəbul edildi və Azərbaycan SSR-in dövlət rəmzlərinə münasibətdə mühüm siyasi qərar verildi. Bu hadisə müstəqilliyə aparan yolda tarixi addım oldu. 1991-ci il fevralın 5-də Azərbaycan Respublikasının Ali Soveti üçrəngli bayrağı dövlət bayrağı kimi qəbul etdi. Beləliklə, Azərbaycan Xalq Cümhuriyyətinin yadigarı olan müqəddəs rəmz yenidən müstəqil dövlətimizin başlıca atributlarından birinə çevrildi. Bu fakt Naxçıvanın və onun siyasi rəhbərliyinin müstəqillik tariximizdəki rolunu da aydın şəkildə göstərir.
Azərbaycan Respublikasının Dövlət Bayrağı mavi, qırmızı və yaşıl rəngli, eyni enli üç üfüqi zolaqdan ibarətdir. Bayrağın eninin uzunluğuna nisbəti 1:2-dir. Qırmızı zolağın ortasında ağ aypara və səkkizguşəli ulduz təsvir olunur. Bu quruluş dövlət bayrağımızın rəsmi görünüşünü müəyyən edir və onun hər yerdə vahid formada istifadəsini təmin edir. Bayrağa hörmət yalnız onu ucaltmaqla məhdudlaşmır; onun təsvirinə, rənglərinə, ölçülərinə və istifadə qaydalarına düzgün yanaşmaq da dövlət rəmzinə ehtiramın göstəricisidir.
2007-ci il noyabrın 17-də Bakıda Dövlət Bayrağı Meydanının yaradılması haqqında sərəncam imzalandı. Sonrakı illərdə meydan paytaxtın mühüm rəmzi məkanlarından birinə çevrildi. Dövlət Bayrağı Meydanı ölkəmizin müstəqilliyini, suverenliyini və milli qürurunu nümayiş etdirən məkan kimi böyük ictimai əhəmiyyət daşıyır. 2009-cu il noyabrın 17-də imzalanmış sərəncamla noyabrın 9-u Azərbaycan Respublikasının Dövlət Bayrağı Günü elan edildi. Həmin tarixdən etibarən bu gün ölkəmizdə dövlətçilik ənənələrinə ehtiramın, milli həmrəyliyin və vətənpərvərlik duyğularının ifadəsi kimi qeyd olunur.
Bayrağımızın mənəvi dəyəri xüsusilə çətin tarixi sınaqlarda daha aydın görünür. Müharibə illərində əsgərlərimizin döyüş mövqelərində, azad edilən yaşayış məntəqələrində və dövlət sərhədlərində üçrəngli bayrağımızı ucaltması xalqımıza böyük qürur yaşadıb. 2020-ci il Vətən müharibəsində qazanılan tarixi Zəfərdən sonra bayrağımızın işğaldan azad edilmiş torpaqlarda dalğalanması müstəqilliyimizin və ərazi bütövlüyümüzün rəmzinə çevrildi. Şuşada, Cəbrayılda, Füzulidə, Zəngilanda, Qubadlıda və digər yaşayış məntəqələrində bayrağımızın ucaldılması illərlə davam edən həsrətin sona çatmasının, tarixi ədalətin bərpasının ifadəsi oldu.
Dövlət Bayrağı Günü bizə şəhidlərimizin fədakarlığını, qazilərimizin qəhrəmanlığını və müstəqilliyimizin hansı böyük mübarizə nəticəsində qorunub saxlandığını xatırladır. Bayraq uğrunda canından keçən insanların xatirəsi daim ehtiramla yad edilməlidir. Vətənə sevgi yalnız bayram günlərində səsləndirilən şüarlarla ölçülmür. Bu sevgi gündəlik əməkdə, qanunlara hörmətdə, dövlət əmlakına qayğıda, cəmiyyət qarşısında məsuliyyətdə və ölkənin inkişafına verilən töhfədə özünü göstərir. Hər bir vətəndaş bayrağın təmsil etdiyi dəyərləri davranışında yaşatmalıdır.
Məktəblərdə Dövlət Bayrağı Gününün qeyd olunması gənc nəslin vətənpərvərlik ruhunda tərbiyəsi baxımından xüsusi əhəmiyyətə malikdir. Şagirdlərə bayrağın yaranma tarixi, rənglərinin mənası, Azərbaycan Xalq Cümhuriyyətinin fəaliyyəti və müstəqilliyimizin bərpası haqqında dolğun məlumat verilməlidir. Sinif saatları, açıq dərslər, ədəbi-bədii kompozisiyalar, rəsm və inşa müsabiqələri vasitəsilə uşaqlarda dövlət rəmzlərinə sevgi və hörmət formalaşdırıla bilər. Müəllimlər izah etməlidirlər ki, bayrağa ehtiram onu yalnız mərasimlərdə dalğalandırmaq deyil, həm də onun təmsil etdiyi dövlətə, xalqa və milli dəyərlərə sədaqətlə xidmət etməkdir.
Bu gün Azərbaycan bayrağı beynəlxalq tədbirlərdə, idman yarışlarında, diplomatik görüşlərdə, dövlət qurumlarında və ölkəmizin müxtəlif guşələrində dalğalanır. Hər dəfə bayrağımız yüksəklərə qalxanda milyonlarla insan özünü vahid xalqın, müstəqil dövlətin və böyük tarixi ənənələrin daşıyıcısı kimi hiss edir. Bayrağımızın beynəlxalq arenada nümayiş olunması Azərbaycanın nüfuzunun, uğurlarının və müstəqil siyasətinin rəmzi ifadəsidir. Bu rəmzin ucalığı həm də hər birimizin məsuliyyətini artırır: ölkəmizi bilik, əmək, dürüstlük və birliklə daha da gücləndirmək lazımdır.
Üçrəngli bayrağımız keçmişimizlə bu günümüzü, milli köklərimizlə müasir inkişaf yolumuzu birləşdirən müqəddəs dövlət rəmzidir. Onun hər dalğalanışında istiqlal mübarizəsinin izləri, şəhidlərimizin qanı, xalqımızın birliyi və gələcəyə inamı yaşayır.

Vəli Sərxanlı

YAP Culfa rayon təşkilatının fəalı