Bir bayrağın kölgəsində bütün bir vətən var - ŞƏRH

Bəzən bir rəmz minlərlə sözün ifadə edə bilmədiyi həqiqətləri özündə birləşdirir. Azərbaycan bayrağı da belə rəmzlərdəndir. Onun dalğalanan hərəkətində Vətənin nəfəsi, hər rəngində xalqın mənəvi dünyası, hər yüksəlişində isə müstəqil yaşamaq əzmi duyulur. Bayraq bir millətin özünü dünyaya təqdim etdiyi ən möhtəşəm simvollardan biri olmaqla yanaşı, həm də onun kim olduğunu, nəyə inandığını və hansı dəyərlər uğrunda yaşadığını göstərir.
Tarixin müxtəlif mərhələlərində Azərbaycan xalqı ağır sınaqlarla üzləşib. Lakin milli varlığını qorumaq, özünəməxsusluğunu yaşatmaq və müstəqil dövlət qurmaq arzusu heç vaxt itib-batmayıb. 1918-ci ildə Azərbaycan Xalq Cümhuriyyətinin yaradılması ilə üçrəngli bayrağımız ilk dəfə dövlətçilik zirvəsinə yüksəldi. Bu, sadəcə yeni dövlət rəmzinin qəbul edilməsi deyildi. Bu, xalqın öz taleyinə sahib çıxmaq, dünyaya müstəqil dövlət kimi tanınmaq iradəsinin nümayişi idi. 1920-ci ildə Cümhuriyyət süqut etsə də, bayrağın ifadə etdiyi ideallar xalqın yaddaşında yaşamaqda davam etdi.
Üçrəngli bayrağımızın yenidən dövlətçilik həyatımıza qayıdışı milli düşüncənin və azadlıq istəyinin gücünü nümayiş etdirdi. Bu qayıdışın arxasında illərlə qorunan bir arzu, müstəqilliyə inam və milli irsə bağlılıq dayanırdı. Beləliklə, bayrağımız yalnız keçmişin yadigarı deyil, müasir Azərbaycan dövlətinin də əsas rəmzlərindən birinə çevrildi.
Bayrağın əsl böyüklüyü bəzən onun harada dalğalanmasında deyil, hansı hissləri oyatmasındadır. Bir azərbaycanlı dünyanın hansı ölkəsində yaşamasından asılı olmayaraq üçrəngli bayrağımızı gördükdə özünü Vətəninə daha yaxın hiss edir. Xarici ölkələrdə keçirilən idman yarışlarında idmançılarımızın qələbəsi zamanı bayrağımızın yüksəlməsi milyonlarla insanın sevincinə çevrilir. Çünki həmin an bir idmançının uğuru bütöv bir xalqın uğuru kimi yaşanır.
Bayrağımızın taleyində şəhidlərimizin qanı ilə yazılmış səhifələr də var. Onu qorumaq və yüksəltmək naminə canından keçən qəhrəmanlarımızın xatirəsi qarşısında hər birimiz mənəvi məsuliyyət daşıyırıq. Xüsusilə 2020-ci ildə Vətən müharibəsində qazanılan tarixi Qələbə, daha sonra dövlət suverenliyimizin tam bərpası üçrəngli bayrağımızın mənəvi dəyərini daha da artırdı. Bu gün azad edilmiş torpaqlarımızda dalğalanan bayraq təkcə hərbi uğurun deyil, uzun illər gözlənilən ədalətin gerçəkləşməsinin də rəmzidir.
Lakin bayrağın ucalığı yalnız keçmişdə qazanılmış qələbələrlə ölçülməməlidir. Onun gələcəkdə də qürurla dalğalanması üçün güclü təhsil sistemi, inkişaf etmiş iqtisadiyyat, yüksək vətəndaş məsuliyyəti, milli birliyə sədaqət və sağlam cəmiyyət formalaşdırılmalıdır. Hər bir gənc bilməlidir ki, Vətənə xidmət yalnız döyüş meydanında deyil, elm, təhsil, əmək, yaradıcılıq və vicdanlı fəaliyyətlə də mümkündür.
Dövlət Bayrağı Günü bizə bir həqiqəti xatırladır: milli rəmzlərə sahib olmaq qədər onların ifadə etdiyi dəyərlərə layiq olmaq da vacibdir. Bayrağımızı qorumaq, onun şərəfini hər yerdə uca tutmaq və gələcək nəsillərə eyni ehtiramla ötürmək ümummilli məsuliyyətimizdir.
Bir gün gələcək, bugünkü uşaqlarımız da öz övladlarına üçrəngli bayrağımızın altında yaşamağın necə böyük xoşbəxtlik olduğunu danışacaqlar. O zaman bayrağımızın tarixini yalnız kitablardan deyil, qurduğumuz güclü dövlətin uğurlarından oxuyacaqlar.
Çünki bayraq sadəcə bir ölkənin rəmzi deyil, o ölkənin insanlarının ortaq taleyidir. Və bu taleyin ən böyük adı Azərbaycandır!

Məhəmməd Həsənov
YAP Sədərək rayon təşkilatının fəal üzvü