Dağlıq Qarabağ münaqişəsinin həlli dövlətin prioritet siyasətilir

Ermənistan-Azərbaycan, Dağlıq Qarabağ münaqişəsinin Azərbaycan Respublikasının suverenliyinə və ərazi bütövlüyünə riayət edilməsi əsasında diplomatik vasitələrlə həlli, ölkə Prezidenti İlham Əliyevin xarici siyasətinin əsas prioritetidir.
Politoloq Rüstəm Məmmədov "Səs" qəzetinə açıqlamasında bildirdi ki, dünya birliyinin tanıdığı və qəbul etdiyi Azərbaycanın ərazi bütövlüyünü Ermənistan da tanımağa məcbur olacaq: "Qeyd edim ki, dövlət rəhbəri İlham Əliyev öz səlahiyyətlərinin icrasına başladığı ilk gündən bəyan etmişdir ki, biz informasiya hücumuna keçməliyik, beynəlxalq birliyin münaqişənin Azərbaycanın suverenliyinə və ərazi bütövlüyünə riayət edilməsi əsasında həlli variantını dəstəkləməsi və Ermənistanın Azərbaycan torpaqlarını işğal etməsi faktını pisləməsi istiqamətində səylər davam etdirilməlidir. Mübaliğəsiz demək olar ki, informasiya mübarizəsində Prezidentin fəal və hücumçu mövqeyi hamıya nümunə göstərilə bilər. İstər xarici ölkələrə rəsmi və işgüzar səfərlərində, istərsə də müxtəlif beynəlxalq təşkilatlar çərçivəsində keçirilən görüşlərində Prezident Azərbaycanın ağrılı problemi olan Dağlıq Qarabağ və qaçqın-köçkün məsələsinə diqqəti yönəldir. Azərbaycan Prezidentinin AŞPA-da, Avropa Birliyində, NATO-da, BMT Baş Assambleyasında çıxışlarında, nüfuzlu kütləvi informasiya vasitələrinə verdiyi müsahibələrində Ermənistanın işğalçılıq siyasəti önə çəkilir, Dağlıq Qarabağ və qaçqın-köçkünlər probleminin həllinə yönələn çağırışlar səslənir. Prezidentin özünün də qeyd etdiyi kimi, bu çıxışların məqsədi təkcə problem haqqında məlumat vermək yox, həm də Ermənistanın işğalçılıq siyasətinin doğurduğu təhlükəni bir daha diqqətə çatdırmaqdır".
R.Məmmədov Dağlıq Qarabağ münaqişəsinin BMT Təhlükəsizlik Şurasının gündəliyinə salınması ilə də bağlı məsələyə aydınlıq gətirərək bildirdi ki, bu, Azərbaycanın diplomatik uğurudur: "Bu gün Azərbaycan Prezidentinin Ermənistana qarşı diplomatik hücum siyasəti öz nəticələrini verməkdədir. Münaqişə ilə bağlı məsələnin BMT Təhlükəsizlik Şurasının gündəliyinə salınması aparılan düzgün, məqsədyönlü siyasətin nəticəsidir. Düşünürəm ki, Türkiyənin Təhlükəsizlik Şurasına sədrlik müddətində Dağlıq Qarabağ münqişəsinin həlli istiqamətində ciddi irəliləyişlərə nail olunacaqdır. Xatırlamaq lazımdır ki, dövlət rəhbəri İlham Əliyev ən yüksək səviyyələrdə, dəfələrlə bəyan etmişdir ki, Ermənistan-Azərbaycan, Dağlıq Qarabağ münaqişəsi yalnız və yalnız Azərbaycanın ərazi bütövlüyü çərçivəsində öz həllini tapa bilər. Bu, həm də prezidentlərin son görüşündə bir daha əyani şəkildə ortaya qoyuldu. Bu fakt Azərbaycan dövlətinin, onun Prezidentinin prinsipial mövqeyidir. Azərbaycan xalqı sülh tərəfdarıdır və problemi sülh yolu ilə həll etmək niyyətindədir. Amma Ermənistanın qeyri-konstruktiv mövqeyi problemin sülh yolu ilə həllinə imkan vermir, danışıqlar hər dəfə dalana dirənir".
Son günlər ATƏT-in Minsk Qrupunun fəaliyyəti ilə bağlı söylənilən tənqidi fikirlərlə razılaşan politoloq ATƏT-in Minsk Qrupunun nümayəndə heyətinin hələ də bu günə kimi heç bir uğurlu addım atmadığını vurğuladı: "Doğrudur, ATƏT-in Minsk Qrupunun həmsədrləri hər görüş zamanı münaqişə tərəflərin problemin həlli istiqamətində razılığa gəlməsinin vacibliyini qeyd edirlər. ABŞ, Rusiya və Fransa hökumətləri hesab edir ki, münaqişə yalnız sülh yolu ilə həll olunmalıdır. Buna görə də, Ermənistan prezidenti öz xalqını müharibəyə yox, sülhə çağırmalıdır. Qeyd edim ki, keçirilən hər bir görüş zamanı müəyyən müsbət nəticələrin əldə olunması, onu deməyə əsas verir ki, növbəti görüş də problemin mövcud olduğu dönəmdən bu günə qədər ilkin razılaşmanın əldə edilməsinə imkan yarada bilər. Artıq Rusiya da məsələnin tezliklə həllində maraqlıdır. Səbəb isə, ondan ibarətdir ki, Gürcüstan olaylarından sonra Rusiya dünyada itirilmiş olduğu imicini Ermənistan-Azərbaycan, Dağlıq Qarabağ münaqişəsini tənzimləməklə aradan qaldırmağa çalışır. Ümumiyyətlə, qeyd etməliyəm ki, biz nəyin bahasına olursa-olsun, istər sülh, istərsə də hərb yolu ilə torpaqlarımızı azad etməliyik. Belə vəziyyətdə, orduya, əsgərə qayğı dövlətin, hər bir vətəndaşın müqəddəs vəzifəsi olmalıdır. Çünki biz azərbaycanlılar üçün Ermənistan-Azərbaycan, Dağlıq Qarabağ probleminin həlli yalnız milli maraq yox, həm də milli qürur məsələsidir. Hər bir şüurlu və namuslu Azərbaycan vətəndaşının borcu Azərbaycanın haqq işinin qələbəsinə yönələn, ölkəmizin tam suverenliyinin, ərazi bütövlüyünün təmin olunmasına, onun gələcək siyasi və iqtisadi tərəqqisinə xidmət edən bu prosesdə Prezident İlham Əliyevə dəstək vermək, hər an Onun yanında olmaqdır".