Başqanlıq postu uğrunda mübarizə qızışmaqdadır

Arif Hacıyev:

İndi Müsavatda hörmət itəcək,

Hər bir iddiaçı məni didəcək,

Başqanlıq postundan İsa gedəcək,

Yeganə namizəd, sözsüz, mənəm mən.

Arzu Səmədbəyli:

Məni sevməyənin kor olsun gözü,

Burda görmüşəm çox simasız üzü,

Məni dəstəkləyir İsanın özü,

Gərək hər rəqibi udam, yenəm mən.

Nüşabə Sadıxlı:

Vəzifə bəxtimə tuş gələn kosdu,

Ətrafa yığaram düşməni, dostu,

Heç kəsə vermərəm müqəddəs postu,

Çətin məqsədimdən geri dönəm mən.

Arif Hacıyev:

Sonda möhkəm durar çoxu hinində,

Hamısı partlayır nifrət-kinində,

Bir yetkili durmaz nitqim önündə,

Sənə kömək edər möhkəm çənəm, mən.

Arzu Səmədbəyli:

Yoxdu başqanlıqda kimsənin yeri,

Arif dərhal küsər, mən desəm kiri,

Heç kəs bu məqamda qayıtmaz geri,

Məcbur eyləsələr, gərək dinəm mən.

Nüşabə Sadıxlı:

Arzuya, Arifə yalan qənimdir,

Müsavat yurdumdu, "İP" vətənimdir,

Bu post heç kəsin yox, yalnız mənimdi,

Aşıq Qərib İsa, bir Şahsənəm mən.

Arif Hacıyev:

Başqan mən olacam, qoy gülən gülsün,

İsanı sevməyən yanıma gəlsin,

Qoy qəti fikrimi İsa da bilsin,

Sanma, başqası tək çökəm, enəm mən.

Arzu Səmədbəyli:

Yoxdu bəzisinin bir manat pulu,

Belində hiss edib bir ulaq çulu,

Çoxu posta gedir gözüyumulu,

Arxam çox böyükdü, beş yüz, minəm mən.

Nüşabə Sadıxlı:

Namizədin çoxu fitnə-felində,

Üzür gecə-gündüz xülya gölündə,

Zülmətə gedənlər Ağ Qoç belində,

Postu Bozat bilib gərək minəm mən.

Arif Hacıyev:

İsa avazıyıb sərin yuxuda,

Nüşabə Sadıxlı şirin yuxuda,

Arzu Səmədbəyli dərin yuxuda,

Arzu-istəyində haqlı, çinəm mən.

Arzu Səmədbəyli:

Rəqiblər önündə baryer tin kimi,

Posta oturaram İblis, Cin kimi,

Uzağa gedərəm, iti şin kimi,

İçi dəmir hava möhkəm şinəm mən.

Nüşabə Sadıxlı:

Arif də, Arzu da çox dayaz çaydı,

Bu ona, o buna yaraşan taydı,

Rəqib qaranlıqda görünən Aydı,

Gözlərə sancıllam, gündüz Günəm mən.

Arif Hacıyev:

Arzu olmamışdır İsanın dostu,

Bu posta yerləşməz Nüşabə mostu,

Bir mənə layiqdi başqanlıq postu,

Rəqiblər önündə bağlı tinəm mən.

Arzu Səmədbəyli:

Bədxah tapılmadı tuta qolumdan,

İmtina etmərəm öz titulumdan,

Bir kimsə sapdırmaz məni yolumdan,

İntiqam eşqilə coşan kinəm mən.

Nüşabə Sadıxlı:

Əhliləşdirərlər yüz bayquşu da,

Deyil başlarında huşu-guşu da,

Başıma qonmaqda şahlıq quşu da,

Əyləşə biləcək nazlı sənəm mən.

Arif Hacıyev:

Arzu çarpayıya çöküb yatacaq,

Nüşabə bu fikri başdan atacaq,

Başqanlıq, şübhəsiz, mənə çatacaq,

Gözə görünməyən Divəm, Cinəm mən.

Arzu Səmədbəyli:

Onların cibində yoxdu bir quruş,

İstəkləri isə qalmaqal, vuruş,

Heç biri önümdə gətirməz duruş,

Hər bir namizəddən başam, önəm mən.

Nüşabə Sadıxlı:

Sizə geri getmək, mənə irəli,

Sözsüz ki, gedirəm yenə irəli,

Həmişə baxmışam önə, irəli,

Sanma, öləziyib, sonra sönəm mən.

Arif Hacıyev:

Bağlamasın köhnə nəsil uğura,

Arzu, səni qənim kəsil uğura,

Mən çox inanıram əsil uğura,

Elə sifətdən də xeyli şənəm mən.

Arzu Səmədbəyli:

Qorxuram rəqibin gözü qamaşa,

Mən tamarzı qalam bozbaşa, xaşa,

Post mənə etməkdə gendən tamaşa,

Postdan əl çəkmərəm, qalın gönəm mən.

Nüşabə Sadıxlı:

Başqanın olmalı cüt aslan dişi,

Bir mən bacararam yaxşı bu işi,

Bu işi bacarmaz, əlbət, heç kişi,

Bu posta çox yaxın, sözsüz, tənəm mən.

Arif Hacıyev:

Mənə yol göstərir həm məntiqim də,

Yoluna qoyulub min təqibim də,

Sözsüz, mənə çatmaz bir rəqim də,

Eşidilə bilən səsəm, ünəm mən.

MİRZƏ QƏRƏNFİL