Hər sədr öz qurumunu mükəmməl hesab edir

Mirmahmud Fəttayev:

Yusif bəy, o gün də sənin tək Əli,

Yanıma gəlmişdi, üzü gülməli,

Dedi ki, etmişik "İP"-i ilməli,

Bütün radikallar axışır ora.

Yusif Bağırzadə:

Gedib sığallayıb Bonnda itini,

Etibar tökərək üzdə ətini,

Danışıb maliyyə vəsaitini,

Gido qoymayacaq biz düşək dara.

Mirmahmud Fəttayev:

Əli, İsa minsin "İP"-in atına,

Ensin ifratizmin yeddi qatına,

Girək "Müqavimət Hərəkat"ına,

Bizim dərdimizə bir Rəsul çara.

Yusif Bağırzadə:

Çox qurdalansa da, "İP" mata keçmir,

Bossun bir sözü də ifrata keçmir,

Heç bir tədbirləri həyata keçmir,

Bu qurum aparar onları gora.

Mirmahmud Fəttayev:

Qərbdən bu quruma çoxlu maq gəlir,

Uğur sindromu da "İP"-ə lağ gəlir,

Əli İsa bəyə badalaq gəlir,

İsa da Əlini dartmaqda tora.

Yusif Bağırzadə:

"İP"-ə əziyyəti qürbət göndərər,

Rəsul sizin üçün mürvət göndərər,

Bizə Vestervelle sərvət göndərər,

"İP"-i apararlar ən ucuz bara.

Mirmahmud Fəttayev:

Qərq edə bilərdi dənizlər bizi,

Çirk-pasdan çıxarıb təmizlər bizi,

Rəsul hərəkatda əzizlər bizi,

Qərb "İP"-i pisləyib gətirir zara.

Yusif Bağırzadə:

Kütlələr nə "İP"-ə, nə "VİP"-ə gəlsin,

Atıb "Moskviç"i, qoy cipə gəlsin,

Şəfa arzulayan AMİP-ə gəlsin,

Qərb "İP"-ə vuracaq hələ çox yara.

Mirmahmud Fəttayev:

Liderlər qışqırır quyu dibindən,

"İP" ayrıla bilmir Qərblə kəbindən,

Biz dollar qırarıq Rəsul cibindən,

"İP"-də Əli-İsa qazanmır para.

Yusif Bağırzadə:

Etibarla Rəsul mizləri açıq,

İsa da, Əli də dizləri açıq,

AMİP-də bizlərin gözləri açıq,

"İP"-in liderləri oxşayır kora.

Mirmahmud Fəttayev:

O da "Demkonqres" tək ən bica qurum,

Yeni yaransa da ən qoca qurum,

"İP" də gözlərində ən uca qurum,

İkisi də qalxıb oturub tara.

Yusif Bağırzadə:

Guya Qərb durubdu üst kult üstündə,

Narıncı geyim yox heç alt-üstündə,

Etibar gəzməkdə asfalt üstündə,

Əli də, İsa da oturub xıra.

Mirmahmud Fəttayev:

Onlarçün çox etdik gözümüzü ağ,

Biz elan etmədik özümüzü ağ,

Rəsul edəcəkdir üzümüzü ağ,

Hər iki "İP"-çinin çöhrəsi qara.

Yusif Bağırzadə:

"İP"-də edərdilər kirayə bizi,

Qərb baş əydirərdi kirvəyə bizi,

Gido aparacaq zirvəyə bizi,

"İP" keçməyəcəkdi ikinci tura.

Mirmahmud Fəttayev:

Cibə çox xeyirdi məsuldan müjdə,

Xoş nübar adlanar məhsuldan müjdə,

Gətirər hərəkat Rəsuldan müjdə,

Bunu təsdiq edər, əlbəttə, şura.

Yusif Bağırzadə:

Qızarıb yöndəmsiz, əyri nosları,

İsa da, Əli də ayaq kosları,

Diz çökər son anda Qərbin bossları,

Sonda Vestervelle verəcək fora.

Mirmahmud Fəttayev:

Moskva yaxşıdı bizim dom deyir,

Yusif Vestervelle və Gidom deyir,

Biri Qərb, biri boss, biri Tom deyir,

Etiqad edirik biz Tomas Mora.

Yusif Bağırzadə:

"İP"-in zəmiləri zəlidən bezar,

Hər bir qrantverən dəlidən bezar,

Qərbin bossları da Əlidən bezar,

Son anda İsanın ağzını cıra.

Mirmahmud Fəttayev:

Yelləməkdə Qərbin yeli İsanı,

Bir boss da bəyənmir dəli İsanı,

Qərbin pulverəni Əli, İsanı,

Səmaya buraxar bağlayıb şara.

Yusif Bağırzadə:

Bosslarda dərələr-düzlər mərhəmət,

"İP"-çilər də Qərbdən gözlər mərhəmət,

Gidodan gözlərik bizlər mərhəmət,

"İP"-də qoşulmarıq ümumi xora.

Mirmahmud Fəttayev:

Sözsüz, bizə Rəsul, Gido dədədi,

Bizlərdən onlara əta hədədi,

İsa da, Əli də vahimədədi,

"İP"-də məzhəb itib, qarışıb ara.

Yusif Bağırzadə:

Gəzirik İsa tək yağırdan uzaq,

"İP"-i cinləndirib bağırdan uzaq,

Gidodan qaçanlar uğurdan uzaq,

Cəbhə-Müsavatda pozulub sıra.

Mirzə Qərənfil