"Azərbaycan ədəbiyyatında və mədəniyyətində 20 Yanvar faciəsi"

Bu mövzuda Milli Azərbaycan Ədəbiyyatı Muzeyində 20 Yanvar faciəsinə həsr olunmuş elmi sessiya keçirilib

Dünən AMEA Nizami Gəncəvi adına Milli Azərbaycan Ədəbiyyatı Muzeyində "Azərbaycan ədəbiyyatında və mədəniyyətində 20 Yanvar faciəsi" mövzusunda elmi sessiya keçirilib.

Tədbirdə muzeyin direktoru, akademik Rafael Hüseynov "Şəhidliyin ədəbi salnaməsi" mövzusunda məruzəsində 20 yanvar hadisələrinin elmi, siyasi, tarixi və fəlsəfi mahiyyətindən söz açıb. Bildirib ki, həmin gecə törədilmiş qanlı cinayət xalqımızın müstəqillik uğrunda mübarizə əzmini qıra bilməyib, əksinə, xalq yenilməzliyini və qəhrəmanlığını, Vətənə, torpağa sədaqətini, azadlıq uğrunda mübarizəsini bütün dünyaya bəyan edib. Məhz 20 yanvar hadisələri xalqımızın milli azadlığına qovuşmasına təkan verib.

R.Hüseynov vurğulanıb ki, qanlı hadisənin ertəsi günü xalqımızın böyük oğlu, Ümummilli Lider Heydər Əliyev Moskvada Azərbaycanın Daimi Nümayəndəliyinə gedərək mətbuat konfransında bu vəhşiliyi qətiyyətlə pisləyib, qətliamın başvermə səbəblərini açıqlayıb, təşkilatçıların, günahkarların adlarını cəsarətlə dünyaya bəyan edib.

R.Hüseynov bu dövrdə ədəbiyyatımızda yaranan Azərbaycan şəhidliyinin ədəbi salnaməsindən, 20 Yanvar və şəhidlər mövzusu ilə bağlı qələmə alınan nümunələrdən söz açıb. Qeyd edib ki, 20 Yanvar şəhidlərinin xatirəsinə həsr olunan əsərlər içərisində xalq şairləri Bəxtiyar Vahabzadənin, Qabilin, xalq yazıçısı Anarın, yazıçı-publisist Rafiq Səməndərin yaradıcılığı xüsusi məna daşıyır. Bu əsərlər ədəbiyyatımızda şəhidlik fəlsəfəsinin tarixi yolunu əks etdirən, bunun ədəbi salnaməsini yaradan sənədlər toplusudur və onların Azərbaycan şəhidliyinin ədəbi salnaməsində özünəməxsus yeri vardır. Vurğulanıb ki, ədəbiyyatımızda bu mövzuda müxtəlif janrlarda yazılan əsərlərin ardı davam etdirilməli və zənginləşdirilməlidir.

Tədbirdə muzeyin elmi işlər üzrə direktor müavini, filologiya üzrə elmlər doktoru Xatirə Bəşirlinin "Azərbaycan poeziyasında 20 Yanvar mövzusu", muzeyin şöbə müdiri, filologiya üzrə elmlər doktoru Şəfəq Əlibəylinin "Rusdilli Azərbaycan poeziyasında 20 Yanvar faciəsi", professor Kamil İbrahimovun "Qəhrəmanlıq tarixinin parlaq səhifəsi" mövzularında məruzələri dinlənilib.

NƏZAKƏT