Sərhəd nəzarət məntəqələrində 590 nəfər saxlanılaraq barələrində müvafiq tədbir görülmüşdür

Dövlət Sərhəd Xidməti tərəfindən 2016-cı ilin aprel ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilmiş, qaçaqmalçılığa, qeyri-leqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilmişdir.

Ay ərzində dövlət sərhədini pozduqlarına görə 26 halda 39 nəfər saxlanılmış, onların 12 nəfəri Azərbaycan Respublikası, 8 nəfəri Banqladeş, 5 nəfəri Nigeriya, 4 nəfəri İran İslam Respublikası, 3 nəfəri Özbəkistan, 2 nəfəri Gürcüstan, hər ölkədən bir nəfər olmaqla Əfqanıstan, Tacikistan, Fransa, Syerra-Leone və Moldova vətəndaşı olmuşdur.

Sərhəd rejim qaydalarını pozarkən yaşıl sərhəddə 9 halda 15 nəfər, Xəzər dənizində 42 halda 68 nəfər, Sərhəd nəzarət məntəqələrində 469 halda 590 nəfər saxlanılaraq barələrində müvafiq tədbir görülmüşdür.

Cinayətkarlığa qarşı mübarizə tədbirləri nəticəsində Azərbaycan Respublikası hüquq-mühafizə orqanları tərəfindən axtarışda olan 342 nəfər aşkarlanaraq aidiyyəti orqanlara təhvil verilmişdir.

Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 13 halda 506 kiloqram 183,5 qram narkotik maddənin dövlət sərhədindən keçirilməsinin qarşısı alınmışdır.

Aprel ayının 20-də Biləsuvar rayonunun Biləsuvar kənd ərazisindəki zastavanın xidməti sahəsində rayon sakinləri Əsgərov Mübariz Müqabil oğlu və Məmmədzadə Anar Qurbanəli oğlu 1010 qutu "DC", 490 qutu "MM" markalı siqaret və 1 kq qurudulmuş marixuana ilə yaxalanmışlar.

Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 116 halda ümumi dəyəri təqribən 20 milyon 401 min manat olan qaçaqmal, o cümlədən 1 ədəd tapança, 1 ədəd pnevmatik tüfəng, 17 000 Azərbaycan manatı , 29988 qutu siqaret, 600 qram civə, 92 ədəd mobil telefon, müxtəlif növ dərman preparatları, spirtli içki və sənaye malları saxlanılmışdır.

Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.

RƏFİQƏ