Akademik Kamal Talıbzadənin kitablarının təqdimatı olub

AMEA Nizami adına Ədəbiyyat İnstitutunda Azərbaycan ədəbiyyatşünaslıq elminin görkəmli nümayəndəsi, əməkdar elm xadimi, akademik Kamal Talıbzadənin "Azərbaycan ədəbi tənqidinin tarixi (1800-1920-ci illər)" və "Seçilmiş əsərlər" kitablarının təqdimat mərasimi keçirilib.

Tanınmış elm və mədəniyyət nümayəndələri, Ədəbiyyat İnstitutunun, AR Mədəniyyət və Turizm Nazirliyinin, Mədəniyyətşünaslıq üzrə Elmi-Metodiki Mərkəzin və Abdulla Şaiqin Ev Muzeyinin əməkdaşlarının iştirakı ilə keçirilən tədbiri giriş sözü ilə AMEA-nın vitse-prezidenti, institutun direktoru, akademik İsa Həbibbəyli açaraq, Kamal Talıbzadənin həyat və yaradıcılığı barədə ətraflı məlumat verib. İ.Həbibbəyli qeyd edib ki, XX əsr Azərbaycan ədəbiyyatşünaslıq elminin ən görkəmli nümayəndələrindən biri olan akademik Kamal Talıbzadə Azərbaycan ədəbi tənqidinə, onun tarixi və nəzəriyyəsinin öyrənilməsinə bütöv bir ömür sərf etmişdir: "Yaradıcılığında ədəbi əlaqələrə böyük önəm vermiş görkəmli alim bu istiqamətdə görülən işləri daha da zənginləşdirmişdir. O, həmişə gəncliyə açıq olmuş, zəhmətkeş və istedadlı gənclərə diqqət və qayğısını əsirgəməmişdir. Akademik Kamal Talıbzadə iyirminci yüzillik Azərbaycan ədəbiyyatının və ədəbiyyatşünaslığının geniş elmi portretini yaratmışdır. Onun qiymətli elmi əsərləri müstəqillik dövrü Azərbaycan ədəbiyyatşünaslıq elminin müasir inkişaf yollarına işıq salır".

Təqdim olunan nəşrlərin əhəmiyyətindən danışan AMEA-nın vitse-prezidenti bildirib ki, kitablarda akademik K.Talıbzadənin tənqidi görüşləri, Azərbaycan ədəbi tənqidinin tarixi kökləri, ədəbi tənqidin əsas cərəyanları olan realist və romantik tənqid, Azərbaycan şeirinin dramaturgiyasının inkişaf mərhələləri haqqında araşdırmaları öz əksini tapıb. Zəngin arxiv materialları və ədəbi-tarixə əsaslanan bu əsərlərdə müxtəlif tənqidi cərəyanların ideya-estetik özünəməxsusluqları dövrün ümumi ədəbi prosesi fonunda və müasirlik işığı altında izah olunur.

Ədəbiyyat İnstitutunun şöbə müdiri, filologiya üzrə elmlər doktoru Vaqif Yusifli "Görkəmli tənqidçi ədəbiyyatşünas Kamal Talıbzadə" mövzusunda məruzə ilə çıxış edərək, bildirib ki, ədəbiyyat tarixçiliyi Kamal Talıbzadənin tənqidçi təfəkkürünün möhkəm dayaqlarıdır:"Ədəbi prosesin təqdimatında ədəbiyyat tarixinin faktlarına və hadisələrinə əsaslanmaqla, ədəbi gedişata istinad etməklə fikir və mülahizə yürütmək, dərin elmi ümumiləşdirmələr aparmaq alimin tənqidçi kimi münasibətini ifadə edən baxışlarının təzahürüdür".

Tədbirdə digər çıxış edənlər XX əsr Azərbaycan ədəbi tənqidinin görkəmli nümayəndəsi Kamal Talıbzadənin ənənəvilik və müasirlik məsələlərinə xüsusi əhəmiyyət verdiyini bildirərək, onu Azərbaycan ədəbiyyatşünaslıq elminin formalaşmasında mühüm rol oynamış cəsarətli və obyektiv tənqidçi kimi səciyyələndiriblər.

ZÜMRÜD