Milli Televiziya və Radio Şurasının növbəti iclası keçirilib

İclasda rəqəmli yayıma keçidlə bağlı mövcud vəziyyət müzakirə olunub

27 sentyabr 2016-cı il tarixdə Milli Televiziya və Radio Şurasının növbəti iclası keçirilmiş, rəqəmli yayıma keçidlə bağlı mövcud vəziyyət müzakirə olunmuşdur. İclasda Azərbaycan Respublikası Prezidentinin 20 sentyabr 2016-cı il tarixli Sərəncamı ilə təsdiq edilmiş "Azərbaycan Respublikasında informasiya cəmiyyətinin inkişafına dair Milli Strategiyanın həyata keçirilməsi üzrə 2016-2020-ci illər üçün Dövlət Proqramı"nın həyata keçirilməsi üzrə Tədbirlər Planının 5.1.7-ci bəndinə uyğun olaraq Bakı və Abşeron yarımadasında yerüstü yayımlanan ümumölkə TV proqramlarının analoq yayımının 1 noyabr 2016-cı il tarixdən, respublikanın digər bölgələrində yayımlanan TV proqramlarının yerüstü analoq yayımının 1 dekabr 2016-cı il tarixdən etibarən dayandırılması barədə qərar qəbul edilmişdir.Azərbaycan Respublikası ərazisində yerüstü yayımlanan TV proqramlarının analoq TV qəbulediciləri ilə izlənilməsi üçün DVB-T standartına uyğun olan dekoderlərin ("Set-Top-Box"-ların) istifadəsi ilə bağlı maarifləndirmə tədbirlərinin aparılması teleradio yayımçılarına və digər müvafiq qurumlara, eyni zamanda, Azərbaycan Respublikasında fəaliyyət göstərən sahibkarlara DVB-T standartına uyğun olan dekoderlərin ("Set-Top-Box"-ların) satışının təşkilinin təmin edilməsi tövsiyə edilmişdir.

Vətəndaşlara müraciət:

Azərbaycan Respublikası Milli Televiziya və Radio Şurasının 27 sentyabr 2016-cı il tarixli 10 saylı qərarına uyğun olaraq 1 noyabr 2016-cı il tarixdən Bakı şəhəri və Abşeron yarımadasında analoq TV yayımı dayandırılmışdır.

Növbəti mərhələdə – 1 dekabr 2016-cı il tarixdən digər bölgələrdə də analoq TV yayımının dayandırılması həyata keçiriləcəkdir.

Televiziya tamaşaçılarından mövcud analoq TV qəbulediciləri vasitəsilə rəqəmli TV yayımının izlənməsi üçün tələb olunan zəruri avadanlığın - dekoderlərin ("Set-Top-Box"-ların) əldə olunması xahiş olunur.

Azərbaycan Respublikası Milli Televiziya və Radio Şurası

Dünya ölkələrində rəqəmli TV yayımının tətbiqi haqqında qısa

MƏLUMAT

Azərbaycanda rəqəmli TV yayımının tətbiqinə 2004-cü ildən başlanmışdır. Bakı şəhəri və Abşeron yarımadası ərazisində "Elettronika" tipli İtalya istehsalı olan TV vericisi ilə sınaq verilişləri həyata keçirilmişdir. Şuranın Texniki şöbəsinin iştirakı ilə sınaq-ölçmə və subyektiv qiymətləndirmə işləri yerinə yetirilmişdir. Bu yayımın parametrləri aşağıdakı cədvəldə verildiyi kimi olmuşdur:

Daha sonra, 2010-cu ildə dörd rəqəmli TV vericisi istismara verilmişdir. Hazırda işlədilən TV yayım vericilərinin gücü artırılmış və parametrləri müasirləşdirilmişdir. Bu parametrlər aşağıdakı cədvəldə verilir.

Azərbaycan Respublikası əhalisinin 99%-i rəqəmli TV yayımı ilə əhatə olunmuşdur. Bu məqsədlə hazırda 103 TV yayım vericisi quraşdırılmışdır (Onlardan 97 ədədi yayım üçün, qalan 4 ədədi isə yayıma şərait yaratmaq üçün istifadə olunur). Daha 45 azgüclü TV vericisi sifariş edilmişdir.

Avropa Birliyi rəqəmli TV yayımının tətbiqi prosesinə 2005-ci ildən başlamışdır. Bu birliyə daxil olan ölkələr DVB-T sistemindən istifadə etmək üçün razılığa gəlmişlər. Rəqəmli TV yayımının tətbiqi cədvəldə verilmiş xronologiya üzrə yerinə yetirilmişdir.

Rəqəmli TV yayımının əsas aşağıdakı üstünlükləri vardır:

- Veriliş traktında və TV siqnallarının yazılışı zamanı maneə dayanıqlığının yüksək olması.

- TV vericisinin gücünün azaldılması imkanı.

- Eyni bir tezlik zolağında veriləcək TV proqramlarının sayının kəskin artması.

- Təsvirin və səsin canlandırılma keyfiyyətinin artması.

- Yeni açılış standartı (yüksək aydınlıqlı televiziya) üzrə TV sisteminin yaradılması.

- Studiya aparatlarının funksional imkanlarının genişləndirilməsi.

- TV yayım siqnalının tərkibində müxtəlif əlavə məlumatların verilməsi imkanı.

- İnteraktiv TV yayım sisteminin yaradılması. Bu zaman tamaşaçı veriləcək TV proqramlarına müdaxilə etmək imkanı qazanır.

- Verilişlərin arxivləşdirilməsi və yazılması imkanı.

- Verilişin dilinin və subtitrlərin seçilməsi imkanı.