"XX əsrdə transmilli erməni terrorizmi. Tarixi-kriminoloji tədqiqat" kitabının bölgələrdə təqdimatı keçirilib

Fevralın 5-dən başlayaraq, Azərbaycan Respublikasının Prezidenti yanında Bilik Fondunun Lektorlar qrupunun üzvü, rusiyalı politoloq, hüquqşünas-alim Oleq Yuryeviç Kuznetsovun müəllifi olduğu "XX əsrdə transmilli erməni terrorizmi. Tarixi-kriminoloji tədqiqat" kitabının bölgələrdə və paytaxtda təqdimatı keçirilir, alimin iştirakı ilə bilik evlərində "dəyirmi masalar", mühazirələr, görüşlər təşkil olunur.

Bilik Fondunun hazırladığı proqrama əsasən, O.Kuznetsovun ilk görüşü Şəmkir rayonu Heydər Əliyev Mərkəzində olub. Rusiyalı alim Bilik Evinin təşkilatçılığı ilə ictimaiyyət nümayəndələri - təhsil işçiləri, tarixçilər, rayonun fəal gəncləri ilə görüşüb.

Mərkəzin və Bilik Evinin direktoru, millət vəkili Sona Əliyeva O.Kuznetsovun araşdırmaları barədə məlumat verərək, ermənilərin xalqımıza qarşı törətdiyi cinayətləri əhatəli işıqlandırdığına görə müəllifə təşəkkürünü bildirib.

Rusiyada yaratdıqları "armenian-terrorism.com" saytının fəaliyyətinə diqqət çəkən O.Kuznetsov deyib ki, dünya ictimaiyyəti bu saytın köməyi ilə erməni vəhşiliyindən daha dəqiq xəbərdar olacaq.

Fevralın 7-də Bilik Fondunun təşkilatçılığı ilə Gəncə Dövlət Universitetində də O.Kuznetsovun "XX əsrdə transmilli erməni terrorizmi. Tarixi-kriminoloji tədqiqat" kitabının təqdimatı keçirilib.

Mərasimdə müəlliflə yanaşı, Gəncə şəhər icra hakimiyyəti başçısının müavini Sevda Qurbanəliyeva, Milli Məclisin deputatı Pərvin Kərimzadə, təhsil və mədəniyyət işçiləri, tarixçilər, şəhərin fəal gəncləri iştirak ediblər. S.Qurbanəliyeva O.Kuznetsovun beynəlxalq terrorizm mövzusunda araşdırmaları ilə MDB məkanında tanınmış mütəxəssislərdən biri olduğunu deyərək, erməni millətçilərinin törətdiyi cinayətlərin təhlili və dəyərləndirilməsi zamanı müəllifin beynəlxalq hüququn terrorizmə qarşı mübarizəyə yönələn normalar sistemini əsas götürdüyünü vurğulayıb.

Kitabda erməni terroruna sistemli şəkildə yanaşıldığını deyən "Novosti Qyandji" qəzetinin baş redaktoru İrina Kalaşnikova diqqətə çatdırıb ki, azərbaycanlılar dəfələrlə erməni terrorizmi ilə üz-üzə qalıb. Ermənilər Dağlıq Qarabağ və ətraf əraziləri işğal edərək, əhaliyə qarşı qırğınlar törədib. Xocalı soyqırımı isə bunların kulminasiya nöqtəsi olub.

Növbəti görüş Naftalan şəhərində keçirilib. Qonaqlar Ümummilli Lider Heydər Əliyevin adını daşıyan parkda Ulu Öndərin xatirəsinə ucaldılmış abidəni ziyarət edib, Naftalan şəhər Heydər Əliyev Mərkəzində Ulu Öndərin həyat və fəaliyyətini əks etdirən foto-stendlərlə tanış olublar.

Naftalan şəhər S.Vurğun adına 2 nomrəli tam orta məktəbdə keçirilən tədbirdə şəhər icra hakimiyyətinin nümayəndələri, təhsil işçiləri, tarixçilər, fəal gənclər iştirak ediblər.

Fevralın 8-də Mingəçevirdə yerli ziyalılarla görüşən O.Kuznetsov apardığı araşdırmada erməni terrorunun tarixi, mahiyyəti barədə geniş faktlar əldə etdiyini, ermənilərin 1988-1994-cü illərdə Azərbaycanda həyata keçirdikləri terror aktlarını dərindən araşdırdığını bildirib.

Qeyd olunub ki, rusiyalı alimi Azərbaycan Respublikasının Millətlərarası, Multikulturalizm və Dini Məsələlər üzrə Dövlət müşaviri Kamal Abdullayev qəbul edəcək. Həmçinin, O.Kuznetsovun Azərbaycan Dillər Universitetində və AMEA-nın Hüquq və İnsan Haqları İnstitutunda yerli ictimaiyyətin nümayəndələri, gənclər və ziyalılarla görüşləri nəzərdə tutulur.

A.SƏMƏDOVA