Zərifə xanım Əliyevanın zəngin elmi irsi bu gün də öz aktuallığını itirmir

Zərdabda Zərifə xanım Əliyevanın doğum günü münasibətilə tədbir keçirilib

Dünən Zərdab rayon icra hakimiyyəti, Yeni Azərbaycan Partiyası Zərdab rayon təşkilatının birgə təşkilatçılığı və səhiyyə işçilərinin iştirakı ilə Heydər Əliyev Mərkəzində Azərbaycanda oftalmologiya elminin inkişafında müstəsna xidmətləri olan əməkdar elm xadimi, tibb elmləri doktoru, görkəmli alim və akademik Zərifə xanım Əliyevanın anadan olmasının 94-cü ildönümü münasibətilə tədbir keçirilib. Tədbir iştirakçıları öncə Ümummilli Lider Heydər Əliyevin abidəsi önünə gül dəstələri düzüblər, Zərifə xanım Əliyevanın əziz xatirəsi bir dəqiqəlik sükutla yad edilib. Tədbiri giriş sözü ilə açan mərkəzi xəstəxananın baş həkimi Ruslan Nemətov Zərifə xanım Əliyevanın oftalmologiya elminin inkişafındakı xidmətlərindən danışıb, alimin bu sahədə apardığı elmi-tədqiqat işlərinin böyük səmərə verdiyini diqqətə çatdırıb.

Tədbirdə çıxış edən YAP Zərdab rayon təşkilatının sədri Pərvin Mahmudova, rayon icra hakimiyyəti başçısının müavini, ictimai-siyasi və humanitar məsələlər şöbəsinin müdiri Ramo Hacıyev və digərləri bildiriblər ki, görkəmli elm xadimi, dünya şöhrətli oftalmoloq-alimin anadan olmasının 94-cü ildönümü, nəinki rayonumuzda, ölkəmizdə, hətta onun hüdudlarından kənarda da silsilə tədbirlərlə qeyd edilir, sonsuz məhəbbətlə anılır: "Tanınmış alim, böyük insan, görkəmli ictimai xadim, dəyərli pedaqoq, gözəl həyat yoldaşı və ana, akademik Zərifə xanım Əliyevanın həyat və fəaliyyətinin müasir gənclər üçün də bir örnəkdir".

Sonda Yeni Azərbaycan Partiyasına yeni qəbul olunmuş bir qrup gəncə partiya vəsiqələri təqdim edilib.

Qismət ZƏNGİBASARLI