“Qidalarla bağlı neqativ hallar müşahidə olunur” - AİB SƏDRİ AÇIQLADI

“Uşaq bağçalarında daim problem olub. Çünki bura nisbətən qapalı bir müəssisə hesab olunur. Uşaqlarla davranış və onların qidalanması bağça müdriyyəti və oradakı işçilərin təsiri altındadır”. Bu sözləri SİA-ya açıqlamasında Azad İstehlakçılar Birliyinin (AİB) sədri Eyyub Hüseynov deyib.

Onun sözlərinə görə, Sovet vaxtından bəri bağçalarda problem olub: “Çox yaxşı haldır ki, bağçaların nəzarəti Təhsil Nazirliyinə həvalə olunub. Çünki əvvəllər İcra Hakimiyyəti orqanlarına tabe idi və qida məsələsi də orada həll olunurdu.

AİB 4 il əvvəl tele-layihə çərçivəsində uşaq bağçalarında monitorinqlər aparmış və qidaların anti-sanitar vəziyyətdə olduğu müşahidə edilmişdir. Biz bunu ictimailəşdirmişdik”.

Eyyub Hüseynov sözlərinə belə davam edib: “AQTA yarandıqdan sonra bu sahədə bağçalarda müəyyən işlər aparılır. AQTA və Təhsil Nazirliyi 1600-dən çox bağçaya öz sahəsi üzrə nəzarət edərək monitorinq aparır. Qidalarla bağlı neqativ hallar müşahidə olunur. Düşünürəm ki, bu işlərin nəticəsində bağçalarda vəziyyət yaxşılaşacaq. Lakin biz o zaman ən yüksək nəticələrə nail olarıq ki, burada KİV-in də iştirakı olsun. Həmçinin, valideyn təşkilatları da iştirak etsin.

Özəl bağçalarda isə qeyri-şəffaflıq mövcuddur. İctimaiyyətin buradan xəbəri yoxdur. Lakin AQTA-nın burada iş aparmaq hüququ var. AİB olaraq valideynləri fəal olmağa, problemlə qarşılaşdıqda 1003 AQTA "Qaynar xətti"nə məlumat verməyə çağırırıq”.

Ayşən Vəli