ABŞ faizləri dünya bazarlarını silkələyə bilər -TƏHLÜKƏ

ABŞ-da bu həftə açıqlanacaq məşğulluq və inflyasiya göstəriciləri investorların Federal Ehtiyat Sisteminin (FED) faiz siyasəti ilə bağlı gözləntilərinə ciddi təsir göstərə bilər.

Reuters yazır ki, investorlar xüsusilə oktyabrın 2-də açıqlanacaq aylıq məşğulluq hesabatını izləyəcəklər. Eyni zamanda inflyasiyanın əsas göstəricilərindən biri olan şəxsi istehlak xərcləri (PCE) indeksinin nəticələri də FED-in gələcək qərarları ilə bağlı mühüm siqnal verəcək.

ABŞ Mərkəzi Bankı sentyabrın 16-da faiz dərəcəsini 0,25 faiz bəndi artırıb. Bu, FED-in üç ildən artıq müddətdə ilk faiz artımı olub. Bank yüksək inflyasiyanın qarşısını almaq məqsədilə ilin sonuna qədər daha bir faiz artımına işarə edib.

Reuters-in iqtisadçılar arasında keçirdiyi sorğuya əsasən, sentyabrda ABŞ iqtisadiyyatında 100 min yeni iş yerinin açılması və işsizlik səviyyəsinin 4,2 faiz olması gözlənilir. Güclü məşğulluq göstəricisi FED-in növbəti iclasda faizləri artıracağı ilə bağlı gözləntiləri daha da gücləndirə bilər.

Faiz artımları fond bazarları üçün də risk yaradır. Daha yüksək faiz dərəcələri borclanmanı bahalaşdırır, iqtisadi aktivliyi zəiflədə və istiqrazların gəlirliliyini yüksəldə bilər. Bu isə səhmləri investorlar üçün nisbətən daha az cəlbedici edə bilər.

ABŞ-ın dövlət istiqrazlarının gəlirliliyi də diqqət mərkəzindədir. 30 illik xəzinə istiqrazlarının gəlirliliyi son 20 ildən çox müddətin ən yüksək səviyyəsinə çatıb, 10 illik istiqrazların gəlirliliyi isə 5 faiz həddini keçib. Bu vəziyyət qlobal maliyyə bazarlarında borclanma xərclərinin artması ilə bağlı narahatlığı gücləndirir.

İnflyasiya göstəriciləri də bazarların əsas gündəmindədir. Son hesablamaya görə, ərzaq və enerji qiymətləri nəzərə alınmadan hesablanan baza PCE indeksi iyul ayına qədər olan 12 ayda 3,3 faiz artıb. Bu göstərici FED-in 2 faizlik inflyasiya hədəfindən xeyli yüksəkdir.

Beləliklə, ABŞ-da əmək bazarının vəziyyəti və inflyasiyanın dinamikası qarşıdakı günlərdə təkcə ölkə daxilində deyil, dünya maliyyə bazarlarında da əsas diqqət mərkəzində olacaq. İnvestorlar bu göstəricilərin FED-in növbəti faiz qərarlarına necə təsir edəcəyini qiymətləndirməyə çalışacaqlar.

Lalə Mehralı