Silahlı hücumdan sonra 240 məhbus qaçıb

Nigeriyanın şimalındakı Koqi əyalətindəki həbsxanaya silahlı hücum nəticəsində ən az 240 məhbus qaçıb. SİA xəbər verir ki, bu barədə “Channels Television” Nigeriya İslah Xidmətlərinin sözçüsünə istinadən məlumat yayıb.

Bir qədər əvvəl isə "Punch" qəzeti qaçan 100 məhbus barədə məlumat vermişdi.

Telekanalın xəbərinə görə, naməlum silahlı şəxslər hücum edərək mühafizəçilərlə atışmaya giriblər. Hücum zamanı həbsxanada 294 nəfər saxlanılırdı. Qaçan məhbusların tutulması üçün əməliyyata başlanılıb və hadisə araşdırılır.

Kanalın bildirdiyinə görə, həbsxana 2008-ci ildə qurulub və 200 nəfər üçün nəzərdə tutulub.