"İslam" partiyası hakimiyyətə gəlmək istəyir

Əvəz Temirxan:

Sevdiyim qrantı verən Sem olub,
Bir də fantastika yazan Lem olub,
"İslam" partiyası bir krem olub,
Yaxılıb bizlərin üz-gözümüzə,
İndi kütlə baxmır heç sözümüzə,
Əsla bənzəmirik biz özümüzə.

Çingiz Sadıxov:

Əlisi yanımda enir, alçalır,
İsası həmişə fikirə dalır,
Liderlər ayağım altında qalır,
Düşən də tapılmır nəhs izimizə.

Əvəz Temirxan:

Başları üstünü alıbdı duman,
Bağlayıb Tehrana hər biri güman,
"İslam" cızığından çıxıbdı yaman,
Bu qurum xoş gəlmir nədənsə bizə.

Çingiz Sadıxov:

Zaman-zaman biz aranı yaman qatdıq,
İsa ilə, Əli ilə şıllaq atdıq,
Avropadan qrant aldıq, yedik-yatdıq,
Bənzəmədi islamçılar bəzimizə.

Əvəz Temirxan:

İslamçılar danışırlar namus-ardan,
Tehran asır düz deyəni, sözsüz, dardan,
Deyirlər ki, Arazla Kür topuqlardan,
Xəzər çatmır bu gün bizim dizimizə.

Çingiz Sadıxov:

Onlar artıq öz yolunu seçib yəqin,
Liderləri spirti çox içib yəqin,
Gecimizin vaxtı çoxdan keçib yəqin,
İslamçılar əl atıblar tezimizə.

Əvəz Temirxan:

Əl atmaqda hər bir üzvü yağa-ətə,
İslamçılar pəl vururlar sükunətə,
Asi olmaq istəyirlər hökumətə,
Ancaq bu vaxt "no" demirlər "yes"imizə.

Çingiz Sadıxov:

Əvvəl-əvvəl yalquzaq tək hürürdülər,
Haralarda nəyi kimə verirdilər,
Dünən eşşək dərisinə girirdilər,
İndi tamah salır onlar xəzimizə.

Əvəz Temirxan:

İslamçılar şaqqanaqla gülməkdədi,
Xam xəyalda olduğunu bilməkdədi,
Yalanımız gözlərindən gəlməkdədi,
Bu gün qənim kəsiliblər düzümüzə.

Çingiz Sadıxov:

Stul keçib boğazlara masa kimi,
Deyirlər ki, qalib gəllik yaza kimi,
Hər birisi Əli kimi, İsa kimi,
İstərlər ki, tüpürələr üzümüzə.

Əvəz Temirxan:

Hər birisi olub İran köpəkləri,
Yal qismində Tehran atır kəpəkləri,
Ənzəlidən gəlməkdədi ipəkləri,
Onlar qənim kəsiliblər bezimizə.
Çingiz Sadıxov:

İşə düşsə iti xəncər və qayçılar,
Səhv yolları tezlik ilə lap açılar,
Həmzə ruhlu olduğuyçün islamçılar,
Hücüm etmir, əsla, bizim Həmzəmizə.

Əvəz Temirxan:

Qəhrəmandı İsa üçün bizim "Madam",
Əli bəyin süst halından özüm şadam,
Nəzərlərdə qəhrəmanlar adi adam,
Onlar üçün mərd igidlər və Həzilər.

Çingiz Sadıxov:

Çoxu əsdi səmum bahar yeli kimi,
Bəziləri bağırırdı dəli kimi,
Bir çoxları susdu İsa, Əli kimi,
İslamçılar səs vermədi səsimizə.

Əvəz Temirxan:

Sağ gedərlər, sol gedərlər inanc üçün,
Avropada sinov gedir bir lanç üçün,
Düzü, çoxu qaçışırdı qazanc üçün,
İslamçılar bələndilər hisimizə.

Çingiz Sadıxov:

O, yeridir hətta xəbis qızılını,
Yalnız atmaz yerə naqis, qızılını,
Hər islamçı atar xalis qızılını,
Tamah salar bizim adi misimizə.

Əvəz Temirxan:

Hər birində, həzm etməkdən qalıb mədə.
Həm İsaya, həm Əliyə gəlir hədə,
İslamçılar İran ilə əlaqədə,
Yaxşımızı qoyub baxır pisimizə.

Çingiz Sadıxov:

Adam var ki, bir zarafata işləyir,
Koroğluluq edənlər ata işləyir,
İslamçılar ETALLAT-a işləyir,
Radikallar yanmaqdadı közümüzə.

Əvəz Temirxan:

İslamçılar əl atmaqda bu gün şərə,
Sifətləri bənzəsə də zebrə, xərə,
Əgər Tehran silah versə əbləhlərə,
Cavab verməyə qadirdi yüzümüzə.

Çingiz Sadıxov:

O mələkdən nəşə tapıb və "saf" içir,
Damarlara iynə vurur və mak içir,
İslamçılar rus arağı, konyak içir,
Qoşulmağa hazır meyə- məzəmizə.

Əvəz Temirxan:

İbrət alsın bu sözümdən qoyun hərə,
Bu gün yenə düzlər köhnə, köhnə dərə,
Deyirəm ki, qoy qəhr olsun köhnələrə,
Onlar qənim kəsiliblər təzəmizə.

Çingiz Sadıxov:

Bəxtlərinə ölüm, süqut yazılıbdı,
Naqislərin sifətləri sozalıbdı,
Gədalarda ali hisslər azalıbdı,
Hər birisi daraşmaqda kisəmizə.