Müsavat və “DUİ birliyi heç nə vəd etmir

Mirzə Qərənfil:

Əməlin bişmişi, nə çiyi yoxsa,
Radikal bəylərin birliyi yoxsa,
Birlik olmayanda, dirliyi yoxsa,
Bəs onlar gücənib hara gedirlər?
Çoxları deyirlər bara gedirlər,
İflas sübut edir: gora gedirlər.

Əhməd Oruc:

Bu gün Mirmahmudda əzəmət, qürur,
Sən ifrat liderlər, tez ayağa dur,
"DUİ"-yə-ağamın yanına buyur,
Yenə eşitmirlər, çora gedirlər.

Mirmahmud Fəttayev:

Radikal cinahda qüdrət bizdədi,
Xaricdən axacaq nemət bizdədi,
Zirvəyə aparan sürət bizdədi,
Çoxları qəlbində yara gedirlər.

Arif Hacıyev:

Hər çınqıl gur oda qovuşmalıdı,
Bosslar bizim şota qovuşmalıdı,
"DUİ" Müsavata qovuşmalıdı,
Çoxu deyər, düz ilqara gedirlər.

Vurğun Əyyubov:

İsayla açmışıq biz ulduz falı,
Fərqi yox irəli, ya dalı-dalı,
"DUİ" Müsavata yuvarlanmalı,
Bilərlər dövlətə-vara gedirlər.

Qabil Hüseynli:

Hamımız yığışıb eyləsək təzim,
Mirmahmud tezliklə olardı bizim,
İndiki zamanda var buna lüzum,
Onlar Müsavatda nura gedirlər.

İsa Qəmbərov:

Get-gedə zirvəyə yüksəlir "DUİ",
Bizim qərargaha xoş gəlir "DUİ",
Bir Müsavat olar, həm də bir "DUİ",
Cibdə avro, dollar, para gedirlər.

Əli Kərimov:

İsa boğulmaqda qrant köpündən,
İndi tutmaq istər saman çöpündən,
Bir dartan da yoxdu onun ipindən,
Tələni andıran tora gedirlər.

İqbal Ağazadə:

İsa gücənsə də, ilk və son dəfə,
Heç bir qurum baxmaz onun tərəfə,
Çatmaz nəticədə əli hədəfə,
Yağ-bal uzaq düşər, şora gedirlər.

Əhməd Oruc:

Bütün yer üzünü dolanım, gəzim,
İsa özü, həm də Mirmahmud bizim,
Mümkünsüz onlardan usanım, bezim,
İkisi bir yerdə şura gedirlər.

Mirmahmud Fəttayev:

İsanı qoşaram öz qatarıma,
İlham qatarıma, söz qatarıma,
Altında qalanda, döz qatarıma,
Genişdən bezənlər dara gedirlər.

Arif Hacıyev:

Yerdən ayağını üzüb Mirmahmud,
Ətrafa rəqiblər düzüb Mirmahmud,
Deyəsən, bizlərdən bezib Mirmahmud,
Hər biri mədədə xora gedirlər.

Vurğun Əyyubov:

Çox soyuq olmasa hələ də bayır,
Torpaqdan çıxmamış hətta bir çayır,
Mirmahmud bizləri biganə sayır,
Əllərdə piltəli çıra gedirlər.

Qabil Hüseynli:

Mirmahmud, addımı bərk at, deyirəm,
Bizə gəlişinə həyat deyirəm,
Həm də bu kəlamı çox şad deyirəm,
Çoxları üzləri qara gedirlər.

İsa Qəmbərov:

Bizə qoşulanlar haqq yolundadı,
Kim üzü yoxuşa dağ yolundadı,
O, uzaqgörəndi, maq yolundadı,
Elə bil, növbəti tura gedirlər.

Əli Kərimov:

İsa ricasıyla şındır-şıp olub,
Mirmahmud önündə cındır-cip olub,
Domoklun kəsdiyi yumaq ip olub,
Yəqin "DUİ"-çilər fora gedirlər.

İqbal Ağazadə:

Səhv olar, kim desə dəli haqlıdı,
Həqiqət odur ki, Əli haqlıdı,
Mən təsdiq edirəm: bəli, haqlıdı,
Gedənlər içiboş şara gedirlər.