Əli Əliyev “Azadlığ”ı zamanın ən fəal radikal bloku hesab edir

"VİP" sədri Əli Əliyev "Azadlıq" blokunu günün ən güclü radikal qurumu hesab edir. O, "DUİ" sıralarında birləşən partiyaları, Müsavatı, AMİP-i, eləcə də, "Ümid", "ANİF" kimi digər partiya və qurumları təmsilçisi olduğu "Azadlıq" blokundan qat-qat zəif hesab edir. Xülasə, biz Ə.Əliyevlə meyxana mücadiləmizdə müxalifətdaxili prosesləri saf-çürük edəcəyik. Qafiyəni Ə.Əliyev heç cür quraşdıra bilmədi. Ona kömək etməli oldum. Qafiyənin məzmunu belə idi:

Gülər üzümüzə bir vaxt uğur da,
O zaman azalar çağır-bağır da.

Mirzə Qərənfil:

Sizlərdə ən güclü blok hansıdı?
Gözlənilməzlik nə, de, şok hansıdı?
Seçkidə gözlənməz iqot hansıdı?
Cavab ver, nə qədər olsa ağır da.

Əli Əliyev:

Güclü siyasətçi sayılmıram mən,
Ancaq xülyalardan ayılmıram mən,
Çətinə düşəndə bayılmıram mən,
İçirəm arabir şirin çaxır da.

Mirzə Qərənfil:

Hər radikal lider qədəmi böhran,
Onun alabəzək aləmi böhran,
Mürəkkəbi böhran, qələmi böhran,
İflasdı, süqutdu əvvəl-axır da.

Əli Əliyev:

Mənim partiyamın dəbi AMİP-dən,
Kəndiri AMİP-dən, ipi AMİP-dən,
Qoparıb çıxardım "VİP"-i AMİP-dən,
Gəldi arxasınca zibil, paxır da.

Mirzə Qərənfil:

Heç tuta bilmirsən əldə kərkini,
Yeyibdi birələr ifrat kürkünü,
De, neyçün AMİP-dən çəkdin "VİP"-ini?
Burda hərdən səni qəhər boğur da.

Əli Əliyev:

Elə ki, Etibar mənə inandı,
Çəkdim ön plana pulu, qrantı,
Bir buna görə də unutdum andı,
Kin, nifrət çox olar mən tək fağırda.

Mirzə Qərənfil:

Pənahın təklifi boşuna gəldi,
İsa da qaşına-qaşına gəldi,
Bəs Lalənin nəyi xoşuna gəldi?
Nə tapdın Əlidə, "Yurd"da-çuxurda?

Əli Əliyev:

İsa bəy gedəndə bitdi "Azadlıq",
Bizim simamızda ciddi "Azadlıq",
Məni siyasətçi etdi "Azadlıq",
Qurbanəli bəydim yatan axurda.

Mirzə Qərənfil:

De, kimə gərəkdi Laləylə Əli?
Onlarda natamam reyinq cədvəli,
Özün nə qazandın bura gələli?
Son vaxtlar bu blok səni sıxır da.

Əli Əliyev:

AMİP-də əllərdə bir təbil oldum,
Orda uzun illər bir səfil oldum,
Nəhayət, blokda müstəqil oldum,
Tapdım öz yolumu axır naxırda.

Mirzə Qərənfil:

Danış, de, nə zaman hal vurdu səni?
Etibar göylərə qaldırdı səni,
"Azadlıq" zirvədən saldırdı səni,
Sənə yas tutardı tənha fağır da.

Əli Əliyev:

Qurumlar, qruplar, birliklər çoxdur,
Bu gün bizimkindən yaxşısı yoxdur,
"Azadlıq" yeganə ifrat blokdur,
Ondan ilham alır naqis dılğır da.

Mirzə Qərənfil:

Əlində dəyənək, payan da yoxdur,
Səndən heç bir kəsə ziyan da yoxdur,
Səni siyasətçi sayan da yoxdur,
İstər yıxıl, dur, qaç, istər fınxır da.

Əli Əliyev:

Əlinin gözündə fərdiyyətçi mən,
Lalə nəzərində qətiyyətçi mən,
Blokda üçüncü siyasətçi mən,
Gəlin böyütməyək, problem xırda.

Mirzə Qərənfil:

Sən çox gücənərək axıtdın təri,
Səndən kənar qaçdı siyasi pəri,
Oldun blokunun adi nökəri,
Kiçik arxlar kimi itdin arxada.

Əli Əliyev:

Olsam da blokun adi nökəri,
Təmsil etməmişəm qətiyyən şəri,
İsadan, Pənahdan qalmıram geri,
Məni yad edirlər şamda, naharda.