Qurban Məmmədov “İP”-çiləri fəallaşmağa və onun “Vətəndaş Hərəkatı Forumu” ətrafında birləşməyə çağırır

Qurban Məmmədov:

Özgə atlarına saxta nal olun,

Bosslarla, xariclə əhli-hal olun,

Ya "İP"-də bərkiyib radikal olun,

Ya da "VHF"-mə təşrif buyurun.

Sərdar Cəlaloğlu:

Başlara baş qoşub çox salma haray,

Meydanda-küçədə sən olmusan zay,

Qardaş, "VHF"-ni "İP"-ə tutma tay,

Gəl bu yoxuşlarda sındırma burun.

Qurban Məmmədov:

Səndə yenə loyal bir vəziyyətdi,

Səninki həmişə zülm, əziyyətdi,

Nə vaxtdan, de, yaxşı xüsusiyyətdi,

Rəsula əl açıb, otarmaq qarın.

Sərdar Cəlaloğlu:

Sənə çağırış yox, yaraşır giley,

Əlinə götürmə bundan sonra ney,

Deməklə eyləmək başqa-başqa şey,

Artıq içindəsən özün sərt torun.

Qurban Məmmədov:

Qardaşım da olsan, Sərdar, az qudur,

İş görülməyibsə, zaman unudur,

Məni öyrətmə ki, siyasət budur,

Deyilsən içində repvari xorun.

Sərdar Cəlaloğlu:

Zamanı çevirmə, valın deyildir,

Polad kimi möhkəm dalın deyildir,

Saqın ki, sərbəstlik malın deyildir,

Gəl sən bal axtarma içində şorun.

Qurban Məmmədov:

Baxmısan çox şeyə ənənə kimi,

Topladın başına zənənə kimi,

Rəsuldan pul umdun dünənə kimi,

Atalar demişkən, çatlasın gorun.

Sərdar Cəlaloğlu:

Fırtına gözlənmir sizin dənizdə,

Müəmma oxunur üzlərinizdə,

Bir qəpiyə dəyməz üzvləriniz də,

Gedib forumunda bayquş uçurun.

Qurban Məmmədov:

Sizə xarici boss qol-qanad verib,

Onlar nə veribsə, tam babat verib,

Mitinq, piket deyə bəyanat verib,

Hara gedirsiniz, dayanın, durun?!

Sərdar Cəlaloğlu:

Səsiniz aləmi bürüyüb gedib,

"VHF" sizləri sürüyüb gedib,

Sizin arabanız çürüyüb gedib,

Siz nə edirsiniz, bir "İP"-dən sorun?!

Qurban Məmmədov:

Qüssə yığın-yığın, dərd yığın-yığın,

Batıbsan içində palçığın, lığın,

Nə qazanıbsan, get "İP"-inə sığın,

Hansı mətləblər var könlündə korun?!

Sərdar Cəlaloğlu:

Əvvəl yerinizi eyləyin təyin,

Sonra ruzinizi bölüşüb yeyin,

Eyni təbili siz az döyəcləyin,

Siz eyni nöqtəni gəlin az vurun.

Qurban Məmmədov:

Boss da ala bilməz götürdüyünü,

Çalış ki, qaytarma ötürdüyünü,

Qaytara bilməzsən itirdiyini,

"İP"-in təzyiqindən, a yazıq, qorun.

Sərdar Cəlaloğlu:

Biz az bel bağladıq "TASS"-a ürəkdən,

Axır bədənə də massa ürəkdən,

Mən də ağız açdım bossa ürəkdən,

"İP" də xahiş edir: bizi doyurun!

Qurban Məmmədov:

Gəlin az danışın bossdan, xörəkdən,

Sizə arxa çıxmaz adi dirəkdən,

Açın düyününü "İP"-in ürəkdən,

Xalq üçün münasib qurum qayırın.

Sərdar Cəlaloğlu:

Həmişə bol oldu bol əziyyətin,

Yenə düzəlmədi heç vəziyyətin,

Duymaq daxilini çətindən çətin,

Ondan da mürəkkəb sənin bayırın.

Qurban Məmmədov:

Qatmayın aranı gəlin siz qəsdən,

Biz də oxumayaq bəyanat pəsdən,

Heç zaman tutmayın dördəlli pisdən,

Əvvəl siz yaxşını pisdən ayırın.

Sərdar Cəlaloğlu:

Artıq gedərisiz, yeriniz nəmiş,

Daim qoyulmaqda sizə bir qəmiş,

Güclü rəqib "İP"-i süqut etməmiş,

Siz də qarşıduran cəbhəni yarın.

Qurban Məmmədov:

Yalandan deməyin yeyirsiz kabab,

Sonra da edirsiz onlarla savab,

Bosslar hayınıza verməyir cavab,

Boğulun içində namusun-arın.

Sərdar Cəlaloğlu:

"İP"-in planları yaxşıdı, vallah,

Burda İsa, Əli, burdadı Pənah,

Boss da pul göndərər bizə, inşallah,

Tezliklə üzərik içində varın.

Qurban Məmmədov:

"İP" səfil, sizlərin hamısı səfil,

"İP"-i "VHF"-yə eyləyin təslim,

Qışın soyuğunda donmusuz qəfil,

Bizə kömək etdi odu baharın.

Sərdar Cəlaloğlu:

Zənci lider verər bizə Mərv özü,

Bizi canlandırıb sizlə hərb özü,

"İP"-i dəstəkləyir bütöv Qərb özü,

Sizlər qurbanısız iti axarın.

Mirzə QƏRƏNFİL