Ən böyük lider mübahisəsi

Mirmahmud Fəttayev:

Yenidən sədr seçdi məni qurultay,

Mənə ruh verməkdə yeni qurultay,

Qarşımdan qovmaqda çəni qurultay,

"KAXCP" yenə əlimdə qaldı.

Mübariz Əhmədoğlu:

Sən sədr seçildin, gəl az düyün düy,

Hələ çənənizdə lax durmaqda çüy,

Ölçüyəgəlməzdir burdakı hay-küy,

Məqsəd-məramınız xeyli daraldı.

Mirmahmud Fəttayev:

Özümü seçdilər gözüm uşaqlar,

Göstərdi bolluca dözüm uşaqlar,

Yaxşı danışırdı bizim uşaqlar,

Sənin çıxışından qanım qaraldı.

Mübariz Əhmədoğlu:

Bildim dərdinizin min olduğunu,

Gördüm qəlbinizdə kin olduğunu,

Mən milli liderin kim olduğunu,

Sərt dedim, hamının üzü saraldı.

Mirmahmud Fəttayev:

Bizim "klassiklər" yan-yörə, böyür,

Demədim üstümə təpilib yüyür,

Bizim istəyimiz gur, ceyran, cüyür,

Sənin dediyinsə ali maraldı.

Mübariz Əhmədoğlu:

Reallıq çulğaşıb ruhumu bəzər,

Sənin xəyalların buludda gəzər,

Bakı sahilini yalayır Xəzər,

Deyirsən yalandı, bu göl Araldı.

Mirmahmud Fəttayev:

Sənin, mənim kimi adi lider çox,

Bizlər də, sizlər də fərasətsiz, lox,

"Ən böyük Elçibəy, başqa lider yox",

Başqa lider dedin, sənə "halaldı".

Mübariz Əhmədoğlu:

Sizinki hay-küydü, yalandı, şərdi,

O lider vətənə, yurda sipərdi,

Ümummilli Lider bircə nəfərdi,

Sizinki gopçuluq və qilu-qaldı.

Mirmahmud Fəttayev:

Bizimlə nisbətdə güclü biləkdin,

Sən arzuolunan real diləkdin,

Elə bir liderin adını çəkdin,

Bütün "klassiklər" xəyala daldı.

Mübariz Əhmədoğlu:

Prezident qaçdı, arqument varmı?

Kimsə bu liderə yaxşı baxarmı?

Sizin lideriniz yaddan çıxarmı?

Dörd il Kələkidə o, məskən saldı.

Mirmahmud Fəttayev:

Boss dəvət edəndə cipə giririk,

Elə bilirik ki, küpə giririk,

O ki biz candərdi "İP"-ə giririk,

İstək çoxlu qrant, boss verən yaldı.

Mübariz Əhmədoğlu:

Sizə qənim olsun qadir Yaradan,

Keçir əlinizə puldan-paradan,

Real bir iş görmək qalxıb aradan,

İşiniz-gücünüz rəmldi, faldı.

Mirmahmud Fəttayev:

Danışma, qorxuruq böyük kəslərdən,

İlham almaqdayıq şərdən, pislərdən,

Sən dəm vurmaqdasan ali hisslərdən,

Vacib qoyun-keçi, mülklərdi, maldı.

Mübariz Əhmədoğlu:

Gedib Kələkidə gözü qaraldı,

Düz dörd il pəjmürdə xəyala daldı,

Bir ildə sizinki duruxub qaldı,

Mən dediyim gəldi, qələbə çaldı.

Mirmahmud Fəttayev:

Burdan Qərbin qrant əli, Kərimov,

Qəmbərovu dəli, dəli Kərimov,

Çökdürdü bizləri Əli Kərimov,

Elçibəy bizlərə bir çarə qıldı.

Mübariz Əhmədoğlu:

Dirilik suyunu içmişlər udub,

Həqiqət yolunu keçmişlər udub,

Siyasətdə daim bişmişlər udub,

"İP"-dəki, cipdəki liderlər kaldı.

Mirmahmud Fəttayev:

Qarşında xeyirxah amac durubdu,

Önümüzdə yoxuş, yamac durubdu,

Reallıq gözünü qamaşdırıbdı,

Bizi məşğul edən xortdandı, haldı.

Mübariz Əhmədoğlu:

Şadam, sizlərisə boğmaqda qəhər,

Mindiyiniz yabı, mindiyim kəhər,

İşiniz xata-şər, içkiniz zəhər,

Azad vətənimdə yediyim baldı.

Mirmahmud Fəttayev:

Çox zəif görmüşəm sizi uçuşda,

Gözünüz sentlərdə, qəpik-quruşda,

Soyuqdan qoruyan bizləri qışda,

Sizin çiyninizə salınan şaldı.

Mübariz Əhmədoğlu:

Xaric əlinizlə sağılmaqdadı,

Səsiniz keyləşib boğulmaqdadı,

Qurumunuz içdən dağılmaqdadı,

Sizin "İP"-inizdə problem boldu.

Mirmahmud Fəttayev:

Bizlər maliyyəçi xariclə şərik,

Elçibəy deyərik, həm büzüşmərik,

Biz relsdən çıxmışıq, relsdən dönmərik,

Siz sağçılarsınız, yolumuz soldu.

Mübariz Əhmədoğlu:

Qrantlardan qanad açacaqsınız,

Bossunuza doğru uçacaqsınız,

Çətin məqamlarda qaçacaqsınız,

Əlbəttə, bu, sənin girdiyin koldu.

MİRZƏ QƏRƏNFİL