Etibar Məmmədov Londonda Rəsul Quliyevlə saziş bağlayır

Vurğun Əyyubov:

Digər qurumların başlayıb yası,

Əli də, Sərdar da uduzub tası,

"İP"-də Müsavatın diktaturası

Yaxşı, Etibarın sükunətindən.

Yusif Bağırzadə:

"İP"-də püskürməkdə artıq zəlzələ,

Londondan qayıtmır Etibar hələ,

AMİP-də canlara düşür vəlvələ,

Yoxdu bir fərqimiz sütun itindən.

Vurğun Əyyubov:

Dövrün qaydasını Zərdüşt görmədi,

İfrat faydasını gərdiş görmədi,

İsa siyasətdə bir iş görmədi,

Çıxıbdı sümüyü bütün ətindən.

Yusif Bağırzadə:

Diz üstə durmuşuq burda iməkdə,

Orda Rəsul bəyə çox tost deməkdə,

Etibar Londonda kotlet yeməkdə,

Düşbərə də yedik bitin ətindən.

Vurğun Əyyubov:

Burda Pənah kimi qanqal bitirdik,

Qurumda biz neçə lider itirdik,

"İP"-ə iki şaqqa Çindən gətirdik,

Sənə saxlayarıq itin ətindən.

Yusif Bağırzadə:

Bizdə rast gəlməzsiz ağıllı tipə,

Deyəsən, axırda girəcəm "İP"-ə,

Elə ki, yolunuz düşdü AMİP-ə,

Dəymə yarımçığa, götür bütündən.

Vurğun Əyyubov:

Etibar ayılar vaqiəsindən,

Londonda qorxarlar şaqraq səsindən,

Bezib Rəsul ilə əlaqəsindən,

Narıncı köynəkdə gələr sətindən.

Yusif Bağırzadə:

İfratlar üzündə qəm-kədər, vallah,

İsanın təlaşı çox hədər, vallah,

Etibar "İP"-i də hürküdər, vallah,

Rəsulla sıçrayıb çıxar bətndən.

Vurğun Əyyubov:

Etibar Londonda yada inandı,

İsa "İP"-çiləri vaxtında qandı,

Hamı yaxşı bilir asan asandı,

Sən özün dördəlli yapış çətindən.

Yusif Bağırzadə:

Etibar özünü məlul göstərir,

Rəsul həmkarına məhsul göstərir,

Maliyyə dəstəyi Rəsul göstərir,

Etibar dördəlli tutub setindən.

Vurğun Əyyubov:

Çoxları yuxudan durur, ayılır,

İndidən qəribə xəbər yayılır,

Etibar haranın fəxri sayılır,

Siz "fəxri lider"i silin mətndən.

Yusif Bağırzadə:

Hər iki üzündə bir iri ziyil,

Çox lider o "İP"-ə eyləyir meyil,

Ağıllı liderlər qorxulu deyil,

Qorxun bizimki tək xalis kütündən.

Vurğun Əyyubov:

Bizə doğru yönəl meyvə-bar üçün,

O, Rəsula dönüb dövlət-var üçün,

Ünvanla Londona Etibar üçün,

İngilis "no"sundan, rusun "net"indən.

Yusif Bağırzadə:

Etibarım yoxdu, hətta qaynıma,

Sənimi mən sıxım indi qoynuma?

Bizdə mandatlılar çıxır boynuma,

Qorxuram mən "İP"-in bezbiletindən.

Vurğun Əyyubov:

Rəqib qapısına vurmaq çətin qol,

Burda sağlar azdı, əksəriyyət sol,

Burda yığıncaqda demokratlıq bol,

Az qala boğulam tüstü-tütündən.

Yusif Bağırzadə:

AMİP dəb gətirib çiti Londona,

Gəlmişdi Rəsulun iti Londona,

Etibar aparıb biti Londona,

Bizə də pay göndər "İP"-in bitindən.

Vurğun Əyyubov:

Tale ürəkləri daşdan edibdi,

Qəlb bərkiyib gözü yaşdan edibdi,

Rəsul Etibarı başdan edibdi,

Səsləndir sədrinin London xitindən.

Yusif Bağırzadə:

Sağ qalmaq çox çətin cip arasında,

Qalmışam həm iki tip arasında,

Boğuldum AMİP-lə "İP" arasında,

Bundan nə götürər naşükür bəndən?!

Vurğun Əyyubov:

Yaddaşlarda "SİDSUH" - o "beşlər" qalıb,

Yeyilmiş qarpızlar, yemişlər qalıb,

Arxada de hansı xoş işlər qalıb,

Hansı faciələr görünür öndən?

Yusif Bağırzadə:

Yanıb-sönən simürğ kül verməkdədi,

İsa "İP"-çilərə gül verməkdədi,

Etibar Rəsula dil verməkdədi,

Adam eşidəndə partlayır kindən.

Vurğun Əyyubov:

Qiyməti ucuz et, baha gözləmə,

Nyu-Yorkdan Rəsul tək düha gözləmə,

Sən gəl Etibarı daha gözləmə,

Qoşul cəsarətlə "İP"-ə bu gündən.

Yusif Bağırzadə:

Biz-biz dayanıbdı başımda tüküm,

Mənə zəhrimardan ötür bir büküm,

Çox gəncəm, gözləyir məni təlatüm,

Bu işə baxmaq da çətindi gendən.

Mirzə QƏRƏNFİL