“İctimai Palata”da inhisarçılıq meyilləri müşahidə edilməkdədir”

Nurəddin Məmmədli:

"İP"-də demokratik meyillər çoxdu,

Burda qruplaşma həvəsi yoxdu,

İsayla Əliyə sataşan loxdu,

Bədxahlar ətrafda sıxlaşıb yaman.

Fərəc Quliyev:

Dikbaşlar burada bir bazar qurub,

"Yurd" Müsavat ilə bir hasar qurub,

İsa Əli ilə inhisar qurub,

"İP"-in üzərinə çökübdü duman.

Nurəddin Məmmədli:

Quzunu verirlər qurda bərabər,

Üzvlər qüvvədə, zorda bərabər,

Hamının hüququ burda bərabər,

Doğru dediyimi göstərər zaman.

Fərəc Quliyev:

Belə müdhiş xoru görməmisənsə,

O kobud qüsuru görməmisənsə,

"İP"-də vurhavuru görməmisənsə,

Bundan xəbər verir aşkarca siman.

Nurəddin Məmmədli:

Gələnlərin üzü solmayıb hələ,

Əsəblər kükrəyib dolmayıb hələ,

"İP"-də heç bir "ÇP" olmayıb hələ,

Yalandan nə üçün çəkirsən aman?

Fərəc Quliyev:

Gəl, səninlə birgə biz bir püşk ataq,

Sən nə danışırsan vaxtından qabaq,

Yayda, de, nə vaxtdan soyuyub otaq?

"İP"-də nə zamandan qızıbdı soban?

Nurəddin Məmmədli:

Səni heç saxlamaq olmaz, qudursan,

Hamı yaxşı bilir dayaz şüursan,

Sən harada gəlib irad tutursan,

Harada qalıbdı vətənin, oban?

Fərəc Quliyev:

Dediyin tək olsun təki liderin,

İsadı, Əlidi, pəki, liderin?

Bir-birini didən iki liderin,

Biri donuz kimi, o biri qaban.

Nurəddin Məmmədli:

"İP" kobud görünür, hə, gözlərinə,

Get söylə sözünü sən özlərinə,

Təkcə mən gülmürəm bu sözlərinə,

Onlara qəşş edib gülərdi Şaban.

Fərəc Quliyev:

Nəqd "Zaparoj" nisiyə cipdən yaxşıdı,

Az qrant, sent o boş küpdən yaxşıdı,

"MDH", əlbəttə, "İP"-dən yaxşıdı,

Sizin o quruma atmaram daban.

Nurəddin Məmmədli:

Fikrin vertolyotu, ya "MiQ"i olsun,

Çalış iftiranın dəqiqi olsun,

Böhtanı elə de, həqiqi olsun,

Sən boş danışmaqdan çıxardım çiban.

Fərəc Quliyev:

Güclü axarınız əsrarəngiz Nil,

Deyirsən İsa da, Əli də bir fil,

Əlində tutmusan rəmzi qərənfil,

Narıncı olmağa başlayıb əban.

Nurəddin Məmmədli:

Rəqib papağını yerə soxdular,

Sənin kimiləri vurub yıxdılar,

Əli də, İsa da haqlı çıxdılar,

Yenə də hədəfdən yan sapdı yaban.

Fərəc Quliyev:

Bossa deyirsiniz sən qida gəti,

Basıb yeyirsiniz birəni-biti,

İsa bəy acıqlı bir qoyun iti,

Sənin Əli bəyin təkrarsız çoban.

Nurəddin Məmmədli:

Cəbhədən bu yana gərdiş görmüsən,

Sınan və sınmayan çox diş görmüsən,

Nə özün əməlli bir iş görmüsən,

Bir işə yaramaz "MBH" topan.

Fərəc Quliyev:

Daim itirdiyin mayalardan çıx,

İsa uydurduğu röyalardan çıx,

Özündə qüvvə tap, xülyalardan çıx,

"İP"-əmi yüyürür yerindən qopan?

Nurəddin Məmmədli:

Liderlər səni tez eyləyərlər əfv,

İdeal birliyi gəl eyləmə məhv,

"İP"-də yürütdüyün mülahizən səhv,

Yalançı bir səmtə tuşlanıb zopan.

Fərəc Quliyev:

Dərin ideyalar çatışmır bakda,

Çoxlu problemlər vardır qabaqda,

"İP" dərin çuxura yuvarlanmaqda,

Sizdən uzaqlaşar düz yolu tapan.

Nurəddin Məmmədli:

Mənə Dəli Domrul, Beyrək göstərmə,

Qalın qabırğasan, göyrək göstərmə,

Gəl sən də özünü yüyrək göstərmə,

İsa, Əli deyil hər atı çapan.

Fərəc Quliyev:

Vətən kərpicini, daşını yeyib,

Bossun göndərdiyi maşını yeyib,

Onlar üzvlərin başını yeyib,

İsadı, Əlidi o "İP"-də papan.

Nurəddin Məmmədli:

Sözsüz, filankəsdən-filandan uzaq,

Hər biri beşillik plandan uzaq,

Elə hər ikisi yalandan uzaq,

İsanın, Əlinin meyarı qapan.

Fərəc Quliyev:

Gəl qov sən bu səfər cüvəllağını,

Boynuma atma tər cüvəllağını,

Açma başıma hər cüvəllağını,

Yadın ruzisini onlardı qapan.

MİRZƏ QƏRƏNFİL