“ACP” ətrafında sıxlaşma əməliyyatı

Əli Kərimov:

Qərbdən avro, burdan manat umuram,

Mən daha firavan həyat umuram,

Rəsul Quliyevdən imdad umuram,

Arxalanıram həm onun varına.

Rəsul Quliyev:

Düşəydi başına sənin daş rəvan,

Məndə işləməkdə ağıl, baş rəvan,

Mənim "ACP"-mə yaxınlaş rəvan,

Sənə təam verim doldur qarına.

Əli Kərimov:

İnanma işimi qəlp eyləyərəm,

Sənin "ACP"-nə qəlb eyləyərəm,

Çoxlu elektorat cəlb eyləyərəm,

Sən çörək verərsən neçə harına.

Rəsul Quliyev:

Keçir adamları min bir hasardan,

Daim qorunmuşam kəndir hasardan,

Atıla bilmirəm hündür hasardan,

Çalış yaxınlaşım sənin barına.

Əli Kərimov:

Məni qəbul eylə, sanma quduram,

Qrant verən olsa, dərhal uduram,

Viskini, pivəni üstün tuturam,

Cəbhəmi verərəm bircə barına.

Rəsul Quliyev:

Yüngül siyasətçi gələrdi baha,

Xəbərdar edirəm səni bir daha,

Sən mənim tarıma çıxacaqsan, ha,

Mən, əsla, çıxmaram sənin tarına.

Əli Kərimov:

Gözəl təklifimə razıdı hamı,

İnan ki, "Yurd"umun qazıdı hamı,

Hər bir partiyadan çoxlu adamı,

Əlbəttə, salaram, sənin toruna.

Rəsul Quliyev:

Pulu tam alarsan, sən tam gətirsən,

Badam alacaqsan, badam gətirsən,

Mənim "ACP"-mə adam gətirsən,

Qrant tıxayıram qida boruna.

Əli Kərimov:

Uzağam İsanın "İP"-inə görə,

Gedərəm lap pullu kəbinə görə,

Sənə bağlanmışam cibinə görə,

Həm İsa, həm Sərdar tanış zoruna.

Rəsul Quliyev:

Hiss eyləməkdəsən rəqabətimi,

Qazanmaq istəsən sən rəğbətimi,

İstəməsən yemək bol sərvətimi,

Qənaət edərsən yoxsa şoruna.

Əli Kərimov:

Pul və sərvət üzrə əsl silistsən,

İddia edən var Bethoven, Listsən,

İfratlar bilir ki, yaxşı solistsən,

Çox adam salaram sənin xoruna.

Rəsul Quliyev:

Üzüqara gəlsən, əzəli gəlmə,

Sırıyıb pul kimi xəzəli, gəlmə,

Sən mənim yadıma zədəli gəlmə,

Qoyma zərbə dəysin ağız-buruna.

Əli Kərimov:

Məni yanlarında say kərkədan, fil,

Sərdarı, İsanı siyahıdan sil,

İnanan az olsa sağlığında, bil,

Adamlar and içər ölsən, goruna.

Rəsul Quliyev:

Özümdən-pulumdan qalaraq razı,

Nə üçün dibədək basmayım qazı?

Dünyanın malına qalıb tamarzı,

Ümidlimi olum məhşər suruna?

Əli Kərimov:

Ləngimə çoxalıb öz şüurumda,

Xilas yolu yoxdu bu cür durumda,

İndi radikallar lap uçurumda,

Çoxu qurban gedər bircə çoruna.

Rəsul Quliyev:

Ya get Yerevanda keşişə qoşul,

Ya Sərdar, İsa tək leş-lüşə qoşul,

Məni qane edən bir işə qoşul,

Sənə pul verərəm, gələr karına.

Əli Kərimov:

Sözümü dinləyib, baxan olsaydı,

"ACP" tərəfə axan olsaydı,

İsa zülmətindən çıxan olsaydı,

Çoxlu üzv yığardım sənin nuruna.

Rəsul Quliyev:

Mənim mətbəximdə qaynayır qazan,

Yaxın gəlməsin hər yolun azan,

Sən mənə işləyib çoxlu pul qazan,

Hələ çox vaxt qalır seçki turuna.

Əli Kərimov:

Ən müdrik kəlamı yoq da danışıb,

Çoxlu mənim haqda haqq da danışıb,

Mənim pis olduğum haqda danışıb,

Desələr, inanma qulaqlarına.

Rəsul Quliyev:

Təpiklər atıblar hətta sırta da,

Məhəl qoymamışam parta-parta da,

Bir şey olmasa da hələ ortada,

Yaman sancı düşüb dalaqlarına.

Əli Kərimov:

Verməsən də olar hər aldığından,

Qarpızlar sallanır hər qoltuğundan,

Araz aşığından, Kür topuğundan,

Okean çıxmaqda balaqlarına.

Rəsul Quliyev:

Rəsul Nyu-Yorkda da möhkəm, mətindi,

Yığdığım var-dövlət, bil, millətindi,

Doğrunla yalanı seçmək çətindi,

Məəttəl qalmışam qılıqlarına.

Mirzə QƏRƏNFİL