Radikallar “palata”nın reanimasiya şöbəsinə köçürülmüşlər

Əvəz Temirxan:

Çoxu başsız qoyub indi naxırı,

Artıq "6-lar"dı basan axuru,

Bu gün "İP"-çilərin çatıb axırı,

"Palata" adi bir meyit yığnağı.

Əli Orucov:

Biz "6-lar" kimi önə çıxmışıq,

Əlidən, İsadan yaman bıqmışıq,

Artıq "palata"nı çoxdan yıxmışıq,

"İP"-i təhdid edir kütlə qınağı.

Əvəz Temirxan:

İndi "palata"da düşüncələr dar,

Mirmahmud bizlərə məxsus bir tavar,

Sıramızda "VİP" var, Sərdar, İqbal var,

Yalnız biz keçirə billik sınağı.

Əli Orucov:

Ağır daş altında "palata" başı,

"İP"-çilər başında ağır başdaşı,

"Yurd" Əli üsullu tökür göz yaşı,

Amma tək qızarır İsa yanağı.

Əvəz Temirxan:

Ağrı, xışıltı var qulaqlarında,

Çatmır nəfəsləri otaqlarında,

"İP"-çilər öz ölüm yataqlarında,

Bu gün hər birinin sınıb çanağı.

Əli Orucov:

"Palata"nın içi lap qazıq-qazıq,

Adamlar süstləşib bezib azacıq,

O qədər pulsuzluq çəkib ki, yazıq,

Sürüşüb sol yana çanaq oynağı.

Əvəz Temirxan:

Liderlik etməkdə könlüqırıqlar,

Onları məhv edib şəxsi maraqlar,

Artıb "palata"da üzdəniraqlar,

Olub üzdəniraq xaric qonağı.

Əli Orucov:

Müftə pul almağa ediblər vərdiş,

Çoxdan çökdürübdü onları gərdiş,

Bunlar qrant alır, görmürlər bir iş,

Başları üstündə bossun danlağı.

Əvəz Temirxan:

Bizim "6-lar"ın bir itkisi yox,

Daxildə "İP"-çi tək bircə pisi yox,

İçində faydalı bir bitkisi yox,

Onlar xatırladır qalın alağı.

Əli Orucov:

"İP"-in təpəsinə zərbə sancılıb,

Fikirlər piketə, hərbə sancılıb,

Əlinin nəzəri Qərbə sancılıb,

Burda yer süpürür İsa balağı.

Əvəz Temirxan:

Qarın ağrısına düşüb bu yandan,

"İP"-çilər tamamən boğulub qandan,

Reanimasiya olunan andan,

Eşitmir nə Əli, İsa qulağı.

Əli Orucov:

Onların məkanı uçurum dibdi,

"İP"-in liderləri əldən gedibdi,

O qədər diz çöküb süqut edibdi,

Andırır yük çəkən arıq ulağı.

Əvəz Temirxan:

Qollarda qüvvə yox, nə təpər zərbdə,

Çarə axtarırlar mitinqdə, hərbdə,

Ondan üz döndərib bosslar da, Qərb də,

Artıq boşalmaqda "İP"-in yalağı.

Əli Orucov:

Alçaqboylulara rost neyləyəcək,

Boğazdan yuxarı tost neyləyəcək,

Ölüm ayağında boss neyləyəcək

Ki, xilas eyləsin xəbis, yaltağı.

Əvəz Temirxan:

Bosslardan istərlər həmişə şapka,

Ayaqlar altında olub tryapka,

Onlardan çıxmamış baş üçün şapka,

"İP"-in liderləri ayaq dolağı.

Əli Orucov:

"Palata"dan çıxan qırılmaqdadı,

Bizimçün zirvələr qurulmaqdadı,

"6-lar" bulağı durulmaqdadı,

"İP"-in çirklənibdi duru bulağı.

Əvəz Temirxan:

20 il ərzində yuyulmur kiri,

İstilik də vermir onun təndiri,

Kəsilib quyuda "İP"-in kəndiri,

Əlinin, İsanın sancır dalağı.

Əli Orucov:

İsagil dalcasız bir dənizdilər,

"6-lar" daha pak, tərtəmizdilər,

"İP"-çilər bizlərdən natəmizdilər,

Təmizlik götürmür heç bir alçağı.

Əvəz Temirxan:

Onlar məğlubdular döyüşqabağı,

Hər biri andırır kal balqabağı,

"6-lar" zəngin bir qızıl tabağı,

"İP"-çilər qoxulu təzək qalağı.

Əli Orucov:

Onlar adi qısqac, bizlər kəlbətin,

Onlar daha zəif, biz daha mətin,

Xaric "6-lar"la kəsməli kəbin,

Geri oxunmalı "İP"-in talağı.

Əvəz Temirxan:

Qan ağlasa, gözdən yaşları çıxmır,

Bosslardan xörəyi, aşları çıxmır,

Mürəkkəb işlərdən başları çıxmır,

"İP" apara bilməz adi qaynağı.

Əli Orucov:

O, elə bilirdi tülü kəsilib,

Qanı çox olana zəli kəsilib,

Əlinin danışan dili kəsilib,

Çatmır heç bir yana İsa caynağı.

MİRZƏ QƏRƏNFİL