Sərdar Cəlaloğlu Pənah Hüseynovu “lüzumsuz əşya” adlandırır

Sərdar Cəlaloğlu:

Daim arzulayıb qərbli tuz əşya,

AXP-nin sədri xalis buz əşya,

Pənah bu halıyla lüzumsuz əşya,

Ondan radikala bir fayda olmaz.

Pənah Hüseynov:

Radikal qurumlar qıc olub gedər,

Qazanc eşqi tamam heç olub gedər,

"İP"-iniz "6-lar" puç olub gedər,

Mənim ideyamın mənası solmaz.

Sərdar Cəlaloğlu:

Bir kəs bəyənmədi səni xoşundan,

Sən öz qüdrətini sil yaddaşından,

Bizə kömək çıxmaz o boş başından,

Səfeh ideyanla cibişdan dolmaz.

Pənah Hüseynov:

"İP" lüzumsuz qurum, ya his parçası,

Sən Sərdar adicə xəbis parçası,

Sizlərin hamınız bir mis parçası,

Mənsə cilalanmış nadir bir almaz.

Sərdar Cəlaloğlu:

Səndən heç çıxmadı adi masabəy,

Bizlər çox ucaboy, sənsə qısa bəy,

Bundan sonra Əli, nə də İsa bəy,

Səni görsə belə heç salam almaz.

Pənah Hüseynov:

Fayda qazanmadım sizin tək "dostdan",

İstefa verdim hər tutduğum postdan,

Qazanc götürməkçün xarici bossdan,

Çıxış yolu tapan xəyala dalmaz.

Sərdar Cəlaloğlu:

Hələ qalmaqdadı başda dumanın,

Həyata keçmədi bircə gümanın,

Sənin ideyandan dəstək umanın,

Arzusu-istəyi sabaha qalmaz.

Pənah Hüseynov:

Kimin nəyi varsa özündə qalar,

Mitinqlər dərənin düzündə qalar,

Adamın arzusu gözündə qalar,

Sizə arxalanan qələbə çalmaz.

Sərdar Cəlaloğlu:

Çoxu qəbul edir çox vaxt can kimi,

Pamidor rəngini görür qan kimi,

Aparır özünü müsəlman kimi,

Vacib günlərdə də o, namaz qılmaz.

Pənah Hüseynov:

Yüksəlməz əbədi alçalan insan,

Liberal cinahda qocalan insan,

Şəstlə zirvələrə ucalan insan,

Heç vaxt əksik düşməz, nə də qısılmaz.

Sərdar Cəlaloğlu:

Bu gün o kövrəldir hər fağırı da,

Boynuna götürür ən ağırı da,

Pənahın olmamış bir uğuru da,

Uğur qazanan kəs saçını yolmaz.

Pənah Hüseynov:

Onun arxasında durur klanlar,

Mənim əleyhimə qurur planlar,

Sərdar uydurmaqda yalan-palanlar,

Bu cür ifratlar düzə yozulmaz.

Sərdar Cəlaloğlu:

Xəbislər gözünə hər bir sözüm köz,

Yalanım yalandı, düzüm xalis düz,

Pənahda görmədim mən qızarmış üz,

O, bir aksioma, əsla, pozulmaz.

Pənah Hüseynov:

Təravət gəlməkdə tər ideyama,

Sərdar çox yaxsa da şər ideyama,

Rişxənd etsə belə hər ideyama,

Mənası sonra da heç vaxt azalmaz.

Sərdar Cəlaloğlu:

Belələri ilə aram çox sərin,

Vallah, bu adamda rəzillik dərin,

Pənaha nə qədər desəm də nifrin,

Kinim və nifrətim qəti az olmaz.

Pənah Hüseynov:

Deyirlər ki, guya çox acı şəxsəm,

Düz olmaz, desəm ki, onuncu şəxsəm,

Yaxud meydanlarda sonuncu şəxsəm,

Sərdar təsdiq etsə, sözsüz, düz olmaz.

Sərdar Cəlaloğlu:

Pənahı zülmətə gömdü əşşilər,

Köksünün altında yara deşilər,

Başqaları desə, başa düşülər,

Əgər Pənah desə, onda düz olmaz.

Pənah Hüseynov:

Təşviqat aparın əksimə qızğın,

O, qarğa, özünü saymaqda quzğun,

Sərdarın həmişə əhvalı pozğun,

Məni pisləyənin kefi saz olmaz.

Sərdar Cəlaloğlu:

Heç qane olmadı bu adam aza,

Pənah diri çıxmaz heç gələn yaza,

Bütün ifratları yığıb boğaza,

Onu gorda görsəm, ömrüm qısalmaz.

Pənah Hüseynov:

Gələcək görünməz xülya olsa dar,

Əlbəttə, Sərdardan bir gileyim var,

Daim ona dedim mən təkrar-təkrar,

Mənə sataşan kəs bir xeyir bulmaz.

Sərdar Cəlaloğlu:

Baxıb gözümə çər, ağrı deyibsə,

Mənim kimi şəxsə oğru deyibsə,

Əgər o, "FƏTH"-çiyə doğru deyibsə,

Fikrindən döndərməz Sərdarı "HƏMAS".

Pənah Hüseynov:

Anlamaz, közərtsən közü, Pənahçün,

Demək də artıqdı sözü Pənahçün,

O, "FƏTH"-i sevmirsə, düzü, Pənahçün,

Bir fayda verməzdi "HƏMAS"la təmas.

MİRZƏ QƏRƏNFİL