Müsavat-AXCP (i), “KAXCP”-”Azadlıq, “Ümid”-ADP və “VİP”-ALP birləşmələri nə səbəbə baş tutmur?

Əli Əliyev:

Mirmahmudla Əhməd iki yoluqdu,

Əli İsa ilə dolu tuluqdu,

"VİP"-in liberalla işi şuluqdu,

Bambaşqa tiplərdi İqballa Sərdar.

Əhməd Oruc:

Lider var qovrulur əzab içində,

Çoxusu gəzməkdə qəzəb içində,

Radikal liderlər əsəb içində,

Biri o biriylə edir pis rəftar.

Əli Əliyev:

Bir vaxt bəziləri xeyli tüklənib,

Lider var qulağı Qərbə şəklənib,

Radikal liderlər qəmlə yüklənib,

Bunların yükünü çəkməz yüz qatar.

Əhməd Oruc:

Lider var itirib öz vicdanını,

Bəzisi qoruyur ancaq canını,

Sədr var doldurar cibişdanını,

Lider var gizlincə aranı qatar.

Əli Əliyev:

Lider var götürür qrantı hədəf,

Sədr var yığmaqda bürünc və sədəf,

Bəzi halda durur sədrlər səf-səf,

Olur dayanırlar lap qatar-qatar.

Əhməd Oruc:

Sədr var sonuncu nəfəsindədi,

Lider var özünün qəfəsindədi,

Sədr var birləşmək həvəsindədi,

Lider var yerində tutmaqda qərar.

Əli Əliyev:

Elələri var ki, heç üzü gülməz,

Lider var yıxılar, özünə gəlməz,

Sədr var heç cüzi qorxu da bilməz,

Lider var qəlbini dəhşətlər sarar.

Əhməd Oruc:

Mirmahmud üç gündü etməmiş nahar,

İqbal bəy tapmamış hələ ki, axar,

"Yurd" Əli İsanın əlinə baxar,

İsa da xaricdən yardımlar sorar.

Əli Əliyev:

İsada, Əlidə qalmayıb həvəs,

Sərdar Qərbə baxıb almaz heç nəfəs,

Ciddi iş görməyə çəkinər Əvəz,

Əhməd ləng tərpənib adamı yorar.

Əhməd Oruc:

İsanı idarə eyləyən nazdı,

Əli siyasətçi deyil, bir qazdı,

Sərdarda işləmək həvəsi azdı,

"VİP" Əli sakit bir guşə axtarar.

Əli Əliyev:

Əhməd Oruc özü qalıb pis gündə,

İqbal zillət çəkər sakit bir tində,

Əvəz boyun əyər Lalə önündə,

Mirmahmud xəyalən xoş büsat qurar.

Əhməd Oruc:

İqbal qolundakı iflicdən deyir,

Sərdar "bir şey çıxmaz bu gicdən" deyir,

İsa "qrant allam xaricdən" deyir,

Əli vaxsey deyib yaxasın cırar.

Əli Əliyev:

Bişməyib İqbalın ağzının sözü,

Bozarıb hiddətdən Sərdarın üzü,

Yenə yad cibində Əlinin gözü,

İsa bu minvalla heçliyə varar.

Əhməd Oruc:

Əli çarəsizdi, bunu gizləmir,

Radikal durumu İqbal izləmir,

Artıq İsa "İP"-dən heç nə gözləmir,

O, daha möhtəşəm bir qurum arar.

Əli Əliyev:

İsa basabasda Əliyə dəyir,

Mirmahmud bu yerdə ağzını əyir,

Bizimkilər hələ məqam gözləyir,

Fürsət gözləyənlər toçkaya vurar.

Əhməd Oruc:

Titrəşər canavar görən quzular,

Uduzan tərəfə qəbir qazılar,

Pis siyasətçilər küncə qısılar,

Yaxşılar rəqibin bağrını yarar.

Əli Əliyev:

Kimlərdi günahkar: yazaq radikal,

Deyəsən, axtarır mazaq, radikal,

Birləşmə meylindən uzaq radikal,

Bizimkilər isə əlaqə qırar.

Əhməd Oruc:

Bəzisi özünü bənzədib şaha,

Bir kəllə də atır miskin Pənaha,

Cəsarətli tərəf dönüb cərraha,

Xəstə rəqibinin qarnını yarar.

Əli Əliyev:

İqbal da, Sərdar da düşüb qulunca,

Tənhalar baş qoyub yatar balınca,

İsa gedən zaman qrant dalınca,

Əli bir tərəfdə başını darar.

Əhməd Oruc:

"Yurd" Əli papağı lap yerə soxar,

İsanın xumardan gözləri axar,

Əli Əliyevə Mirmahmud baxar,

Bir iş görməsə də ağa şax durar.

Əli Əliyev:

Pis xorna çəkirlər, sanki mal yatıb,

Artıq oyansa da, çoxu kal yatıb,

Sükunət içində radikal yatıb,

Böyük sürət həddi göstərər radar.

Əhməd Oruc:

Düşübdü araya radikal yası,

Yüz faiz işləmir yəqin qafası,

Bizdə birləşməyən sədr tayfası,

Yuxu bişirərək, qıvrılıb yatar.

Mirzə QƏRƏNFİL