Müxalifətin kütləvi aksiyalarına istilər mane olurmuş

Nurəddin Məmmədli:

Sürəti doqquzdan otuza qoyduq,

Maliyyə işini boss tuza qoyduq,

Yürüşü, piketi payıza qoyduq,

Mitinq keçirərdik olmasaydı yay.

Əhməd Oruc:

Sirrini rəqiblə bölməyəcəklər,

Radikal durumlar gülməyəcəklər,

Bunlar birləşə də bilməyəcəklər,

İstər payız olsun, istər sərin may.

Nurəddin Məmmədli:

İstilər bağlayıb qəfəsimizi,

Azaldıb aksiya həvəsimizi,

Qızmar yay kəsibdi nəfəsimizi,

İstərdik ki, alaq bosslardan çox pay.

Əhməd Oruc:

Heç biri olmamış nə Kərəm, Əsli,

Onlar çox aldadıb milləti, nəsli,

Qalıb mitinqlərsiz bütün yay fəsli,

Gedib çayxanada içəcəklər çay.

Nurəddin Məmmədli:

Bosslar göstərsələr küpün ucunu,

Biz ələ verərik "VİP"-in ucunu,

Qaldırarıq göyə "İP"-in ucunu,

İstəməzdik olaq Əhmədlərə tay.

Əhməd Oruc:

Radikallar fikrə dalar uğursuz,

İnşallah, köməksiz qalar uğursuz,

Mitinq sevdaları olar uğursuz,

Radikala verən olmayacaq hay.

Nurəddin Məmmədli:

Doyunca yeyərək balqabaq, kahı,

Çıxararıq önə lider pənahı,

Biz mitinq keçirsək günü sabahı,

Qarşımızı ala bilməz bir alay.

Əhməd Oruc:

Üzlərə yağdırıb zəhər və ağı,

Çəkib ürəklərə nisgili, dağı,

Onlar duran zaman başıaşağı,

Bizlər dövrəsində qurarıq halay.

Nurəddin Məmmədli:

Əhməd Oruc özü külə qalıbdı,

Lağ etmək topala-şilə qalıbdı,

Mitinq həvəsimiz hələ qalıbdı,

Bizimçün münasib, bizimçün qolay.

Əhməd Oruc:

Hay-küylə yalandan "boş-bas" ediblər,

Qərbi pullarından xilas ediblər,

Mitinqdə birlikdə iflas ediblər.

Onlarçün olardı maraqlı olay.

Nurəddin Məmmədli:

Çox bərələ qalmış gözü görmüşük,

Doğrudu, bosslarda üzü görmüşük,

Aksiya deyəndə yüzü görmüşük,

Mitinqdə, piketdə vacib deyil say.

Əhməd Oruc:

Parça ola bilməz bezdən aşağı,

Nurəddinin özü bizdən aşağı,

Həmişə olubdu dizdən aşağı,

Onların keçdiyi arxa oxşar çay.

Nurəddin Məmmədli:

Başa parik qoyub hörük düzəltsin,

İdeya düzəltsə, çürük düzəltsin,

Qoy Əhməd özüyçün körük düzəltsin,

Qab-qacaq götürüb eyləsin qalay.

Əhməd Oruc:

Gücünü sınasın əkin-biçində,

Versin cavabını səyin, gicin də,

Bərkdən eyləməsin "İP"-in içində

Liderləri kimi o, dalay-dalay.

Nurəddin Məmmədli:

Adi qızılgülü qoxlaya bilmir,

Rəqibi əməlli oxlaya bilmir,

Özünü ayaqda saxlaya bilmir,

Əhməd şux dayansın, vurmasın valay.

Əhməd Oruc:

Münasib olmayıb heç xərliyə də,

Yaramaz xeyirə, nə şərliyə də,

Nurəddin getməmiş çimərliyə də,

Əlinin, İsanın beynində Havay.

Nurəddin Məmmədli:

Hissləri tapdanmış yara balayam,

Bossun hüzurunda parabalayam,

Mən Qərb adamı yox, qarabalayam,

Mənə qismət olar, inşallah, Mumbay.

Əhməd Oruc:

Başını bişirdin "İP" buğu altda,

Batdın isaların buyruğu altda,

Yatdın eşşəklərin quyruğu altda,

Küçədə-meydanda bir iş gör, davay.

Nurəddin Məmmədli:

Qərb də silkələyir tələ torumu,

Bosslar dolduracaq qida borumu,

Çox da sən piləmə bizim qurumu,

"İP"-ə üzv yazılır yüzlərlə subay.

Əhməd Oruc:

Yaxın üzünüzə çirkabı, kiri,

Sizin bir qurum da deyildi diri,

Reytinq şkalası dönməkdə geri,

"İP"-də adam yoxdu sizlərdən savay.

Nurəddin Məmmədli:

Bu Əhməd Oruc da yaman dikbaşdı,

"DUİ" daxilində adı dolaşdı,

Sənin işin-peşən dava-dalaşdı,

İrəli gedərsən, oxu dolalay.

Əhməd Oruc:

Orada az için siz araq-çaxır,

Sular gurultayla Xəzərə axır,

"İP"-də liderlərin xaricə baxır,

İmkanın olarsa, sən Qərbə şaqay.

Mirzə QƏRƏNFİL