Sərdar “Kölgə Kabineti” ilə “İctimai Palata”nı dağıtmaq istəyir

Sərdar Cəlaloğlu:

"Kölgə Kabineti" yaratdım ki, mən,

"İP"-i dağıdanda desinlər əhsən,

Pənah, səninləyəm, bil, hər nə desən,

Kinim-küdurətim "palata"yadı.

İqbal Ağazadə:

"İP"-çilərə çoxlu böhtan desə də,

Pənahdan ideya məngirləsə də,

Sərdar enişlərdə baş girləsə də,

Qalıb damağında liderlik dadı.

Sərdar Cəlaloğlu:

Araq-çaxır düzüb mizləri üstə,

Yedirər həmkarı dizləri üstə,

"Kölgə Kabineti" gözləri üstə,

Qəbul eyləyərdi hər dostu-yadı.

İqbal Ağazadə:

Sərdarın beynində ilan-qurbağa,

İstər ki, enişdən yüksələ dağa,

Layiq deyil Pənah başda durmağa,

Həm də mənasızdı qurumun adı.

Sərdar Cəlaloğlu:

Məndən ilham alır bütün el-mahal,

Yediyim ən yaxşı balıqdı kifal,

Düşür vahiməyə "İP"-çilər dərhal,

Üzə çıxaranda bir şeyi-zadı.

İqbal Ağazadə:

Enişlərdə qoyub Sərdar ürəyi,

Süquta aparır arzu-diləyi,

"KK" tapa bilmir buğda çörəyi,

Gözünə dürtməkdə adicə cadı.

Sərdar Cəlaloğlu:

Edəcəklərini məqbul edəcək,

O, hər bir üzvünü məşğul edəcək,

"Kölgə Kabineti" qəbul edəcək,

Hər bir kədərlini, qəmgini, şadı.

İqbal Ağazadə:

Yaratdığı qurum qalmaz heç yaya,

Çətin əldə etsin bundan bir maya,

Sərdarın meyli də bircə papkaya,

Həm də bir qovluğa, bir çantayadı.

Sərdar Cəlaloğlu:

Beyinlərdə olan cipi dağıtmaq,

Əli, İsa kimi tipi dağıtmaq,

Başlıca məqsədim "İP"-i dağıtmaq,

Ümidim qüdrətim bir bandayadı.

İqbal Ağazadə:

"İP"-çilər bir şirdi, Sərdarsa birə,

Onun bənzəri var lüzumsuz tirə,

"KK"-də sərinlik gətirən şirə,

"Sprayt", "Koko-Kola", bir də "Fanta"ydı.

Sərdar Cəlaloğlu:

Bölərik göndərsə bosslar pay-püşü,

Saf-çürük edirik hər bir görüşü,

Bizi gözləməkdə "Payız yürüşü",

İstiqamətimiz yaxşı ayadı.

İqbal Ağazadə:

İsanı, Əlini təntidən ölüb,

Dəncək ölməmişdən əvvəl dən ölüb,

"Kölgə Kabineti" indidən ölüb,

İflasın müddəti gələn yayadı.

Sərdar Cəlaloğlu:

Qrantı mənim tək havadaca qap,

Arzu eyləyən kəs qurumuma çap,

"6-lar" "şestyorka", "İP" kövrək bir sap,

"Kölgə Kabineti" sərt bir qayadı.

İqbal Ağazadə:

Lap tez iflas edər bicsiz təşkilat,

Bizdə ən müasir gicsiz təşkilat,

"Kölgə Kabineti" vecsiz təşkilat,

"İP"-də əllər açıq, ayaq sayadı.

Sərdar Cəlaloğlu:

"İP"-dən kütlələrə kömək, hay olmaz,

Bizə qoşulanın sonu zay olmaz,

"KK"-yə "altı", nə "İP" tay olmaz,

O, yerə sancılmış adi payadı.

İqbal Ağazadə:

İstər başçı olsun, budur həqiqət,

Sərdarı dindirmir dəyanət, riqqət,

"İP" mənəviyyata verməkdə diqqət,

Onu cəlb eyləyən ancaq mayadı.

Sərdar Cəlaloğlu:

Əli lider deyil, adi tüfeyli,

Çox qrant qoparmaq İsanın meyli,

"Kölgə Kabineti" yaşayar xeyli,

"İP"-in iflas günü gələn mayadı.

İqbal Ağazadə:

"İP"-də çoxlu ölü, həm də leş görə,

İstəyir bir görüb, onu beş görə,

Sərdar qadir deyil ciddi iş görə,

Onunku fitnə-fel, əsil riyadı.

Sərdar Cəlaloğlu:

Keçir sabahları qülü-qal ilə,

Açır işlərini onlar fal ilə,

"İP"-də yaşayırlar ehtimal ilə,

Sözünün əvvəli-sonu guyadı.

İqbal Ağazadə:

İstirahət yeri Nardaran, Quba,

Son vaxtlar olubdu bu adam qaba,

Sərdar meyillənib murdar çirkaba,

Bizim istiqamət o saf suyadı.

Sərdar Cəlaloğlu:

Bizim verdiyimiz əla qiymətdi,

Bossdan istəyimiz puldu, nemətdi,

İsanın, Əlinin, "İP"-i zülmətdi,

"Kölgə Kabineti" şəfəq, ziyadı.

İqbal Ağazadə:

Zilləyib gözünü ən uca dağa,

Özü burnunacan batıbdı lığa,

Özünü vurubdu həyasızlığa,

Sərdarda olmayan bu hiss həyadı.

MİRZƏ QƏRƏNFİL