Ayaz Mütəllibovu “İP”-ə cəlb etmək cəhdi

Qabil Hüseynli:

Ondan fayda gələr "İP"-ə sən, anla,

Onu cəlb edərik məntiq, qanunla,

Danışıq aparıb İsa onunla,

"İP"-çi olacaqdır tezliklə Ayaz.

Araz Əlizadə:

Ayaz Mütəllibov İsadan iri,

Bizdə qalacaqdı neçə ki, diri,

Ayaz ASDP-nin sadiq həmsədri,

O, "İP"-ə qoşulmaz, fikriniz dayaz...

Qabil Hüseynli:

Ayaza Müsavat bol sərvət verər,

Qrantla qarışıq çörək-ət verər,

"İP" ona daha çox mənfəət verər,

Bizə ondan fayda yəqin olar az.

Araz Əlizadə:

İsa təklifində, əsla, ar etməz,

Sizin yerinizi heç vaxt dar etməz,

Ayaz daha sizə etibar etməz,

O, heç vaxt inanmaz, etsəniz də naz.

Qabil Hüseynli:

Ayaz son qoymalı əsirliyinə,

Bir əlac taparıq kəsirliyinə,

Gərək bizlər gələk iş birliyinə,

O, qara niyyətli, bizlərsə bəyaz.

Araz Əlizadə:

"İP"-ə girmək ona gələrdi baha,

Bu fikrə düşməyin, əsla, bir daha,

Ayaz siyasətdə əsil əjdaha,

İsa da, Əli də qabağında qaz.

Qabil Hüseynli:

Bilirik qürbətdə hövsələ dardı,

Çox möhkəm olardı bizlərdə ardı,

Gəlsəydi, onunçün yaxşı olardı,

Şəninə açardıq retro klub "Caz".

Araz Əlizadə:

Təbliğ etməkdəsiz sizlər xaçı çox,

"İP" udar həddindən artıq acı çox,

Çox yaşlı olsa da Ayaz saçı çox,

İsanın, Əlinin başları çox daz.

Qabil Hüseynli:

Həmişə biz yaxşı sifət etmişik,

Ayaz "İP"-ə gəlsin, biz qət etmişik,

Biz onu dördəlli dəvət etmişik,

Qoy təşrif buyursun eyləyib niyaz.

Araz Əlizadə:

Sizin qəlbinizin qısa arzusu,

Sizi tərk etməyib masa arzusu,

Gözündə qalacaq İsa arzusu,

Siz uduzan tərəf, onun keyfi saz.

Qabil Hüseynli:

Onun gələcəyi qəlbimə damdı,

Siyasətdən uzaq, bir az da xamdı,

Ayaz, İsa kimi, bizim adamdı,

O, "İP"-ə gələcək, hövsələni bas.

Araz Əlizadə:

İsalı-Əlili ağzınız yırtıq,

O, qoymaz vurasız ona bir çırtıq,

Ayaz heç bir fala inanmır artıq,

Axmaq falçı kimi qurma nahaq tas.

Qabil Hüseynli:

Əli Qərb bağından gül dərə bilmir,

Boss həndəvərinə o, girə bilmir,

İsa bəy Ayazsız iş görə bilmir,

Qoy qismət olmasın bizə ölüm, yas.

Araz Əlizadə:

Dəvət olunmamış, yuxa cırmayın,

Nahaqdan narıncı çuxa cırmayın,

Siz bihudə yerə yaxa cırmayın,

Ayaz qurmayacaq sizinlə təmas.

Qabil Hüseynli:

"İP" qəbul eyləyib narıncı boya,

Olub radikala əsil paz, paya,

Əlimiz yetişmir "Əl-Qaida"ya,

Yetər dadımıza o zaman "HƏMAS".

Araz Əlizadə:

Ayaz dərin dərya, adi dəniz siz,

Qərb dindirən zaman dinibsiniz siz,

Həyatın dibinə enibsiniz siz,

Sizi hətta Ayaz eyləməz xilas.

Qabil Hüseynli:

Həsrət də qalmışıq mətin duruma,

Xilas etmək üçün yetin duruma,

"İP"-çilər düşüblər çətin duruma,

Səbətin altından tökülmür gilas.

Araz Əlizadə:

Sizi xilas etməz xarici töhfə,

Sizin gözünüzdə qaralıb lövhə,

Çoxdan süqut edib Müsavat, Cəbhə,

Sizin "İP"-inizi haqlayıb iflas.

Qabil Hüseynli:

İsanın, Əlinin dostu şərab, mey,

Bizim deşik bədən bənd-bənd olmuş ney,

Bizim liderlərdən çıxmadı bir şey,

Ayaz ola bilər bizlərə miras.

Araz Əlizadə:

Əbədi kədərdi-qəmdi bəd siman,

Zülmət qaranlıqdı işıqsız səman,

Ayaz ASDP-dən getməz heç zaman,

"İP"-ə gəlməsiyçün yoxdu bir əsas.

Qabil Hüseynli:

Yəqin üzümüzə güləcəkdi baxt,

Odur ki, daima durmuşuq sərvaxt,

"İP"-ə cəlb edərik Ayazı bir vaxt,

İndidən sevinib-gülməyin qas-qas.

Araz Əlizadə:

Atın başınızdan xülya, xam eşqi,

Sizi Xəyyam verib viski, cam eşqi,

Sizin qəlbinizdə intiqam eşqi,

Qəbrə göməcəkdi sizləri qisas.

Mirzə QƏRƏNFİL