“İP”-də birlik ümidi öləziməyə başlayıb

Sərdar Cəlaloğlu:

Radikal bədəndə hər biri ziyil,

Heç biri millətçi liberal deyil,

"İP"-də azalıbdı birliyə meyil,

İsada, Əlidə ümid itibdi.

İsa Qəmbərov:

Bundan nə qızardıq, nə də ki, pörtdük,

"İP"-ə girə bilməz ideal sürtük,

Birlik bizim üçün adi bir örtük,

Başlıca cəhətlər bizlərdə cibdi.

Sərdar Cəlaloğlu:

İsa kimisinə lazım kal zirvə,

Əli arzulayan pullu lal zirvə,

Sizinçün deyildi liberal zirvə,

Yeriniz əbədi uçurum dibdi.

İsa Qəmbərov:

AXC, Müsavat bir güruh olub,

Boss pulu meydanda bizə ruh olub,

Əvvəl "Demkonqres"lər və "SİDSUH" olub,

İndi əlimizdə vasitə "İP"-di.

Sərdar Cəlaloğlu:

"Yurd" Əli narıncı donlardan qaçıb,

İsa pul aldığı Conlardan qaçıb,

Uğur əbədilik onlardan qaçıb,

Bu qoşa liderlər uğursuz tipdi.

İsa Qəmbərov:

Bosslar tərəfindən tamam əmilər,

Qrant gətirəcək bizə gəmilər,

Birlik arzulayar sənin kimilər,

Daim başımızda limuzin, cipdi.

Sərdar Cəlaloğlu:

İsa sevinir ki, Qərbdən çərəz var,

Üstəlik, Əlidə kin var, qərəz var,

Onlarda yeganə bircə mərəz var,

O da öldürücü məlum qripdi.

İsa Qəmbərov:

Fikirləş əməlli sən öz şərtini,

Biz üstün tuturuq ancaq fərdini,

Çəkən deyilik ki, dünya dərdini,

Bizi duymayanlar süst əhlikefdi.

Sərdar Cəlaloğlu:

Bədi yaladınız xarici miski,

Çox çətin də olsa, deyəcəm reski,

Biz çaxır tapmırıq, içirsiz viski,

Bizimki əziyyət, sizinki kefdi.

İsa Qəmbərov:

Vacib yerinizdə çatışmır kiriş,

Sizinçün bağlıdı xaricə giriş,

Heç vaxt əlinizdən gəlməyib bir iş,

Bu da bizə qarşı ucuz blefdi.

Sərdar Cəlaloğlu:

Radikal eşqimiz gen ümman, dəniz,

Heç məqsədiniz də deyildir təmiz,

Reallıqdan uzaq hər layihəniz,

Taktiki planlar əfsanə, mifdi.

İsa Qəmbərov:

Biz olduq meydanda, bil, boğaz cıran,

Qrant eşqimizi söndürməz boran,

Boss olmaz bizlərə yerindən duran,

Kim bizə pul verir, qüdrətli şefdi.

Sərdar Cəlaloğlu:

Heç vaxt sizi təqdir eyləmirik biz,

Nə "SİDSUH", nə "İP"-lə qoymadınız iz,

Yalnız istefadı sizin çarəniz,

Ürəyiniz xıltlı, qəlbiniz kifdi.

İsa Qəmbərov:

Heç vaxt yapışmadıq miskin pamaldan,

Biz məhrum olsaq da iti kamaldan,

İstər Qərbdən olsun, istər Şimaldan,

Bizə çox xoş gələn ancaq tərifdi.

Sərdar Cəlaloğlu:

Mat olsam, razılıq vermərəm pata,

Nə qədər əlimdən çıxmayıb xata,

Puç vədlər verməyin elektorata,

Sizə inananlar xalis hərifdi.

İsa Qəmbərov:

Boğulduq xaricin şöhrət selində,

Qrant axtarırıq bossun gölündə,

Kəlbəcər qızılı Vartan əlində,

İmkan düşsə Qərbə satardıq nefti.

Sərdar Cəlaloğlu:

Sizi xəcil etdi keçmişin yeli,

Bu gününüz isə xeyli məzəli,

Nə sən lider oldun, nə də ki, Əli,

Öyünmə ki, sizdən çıxardı müfti.

İsa Qəmbərov:

Arxamızca gedən hərifimiz yox,

Burda misterimiz, şerifimiz yox,

Ölkə daxilində qrifimiz yox,

Bizimki xaricdən gələn qrifdi.

Sərdar Cəlaloğlu:

İndi bas səsiniz "İP"-dən yüksəlir,

Sizin marağınız qrantlar, gəlir,

Şriftin özü də xaricdən gəlir,

Toxtaqlıq verənsə sizə şriftdi.

İsa Qəmbərov:

Mənim şirin-şəkər sözüm sifətlər,

Vaxtilə çox verdi dözüm, sifətlər,

İndi padoşlaşıb bizim sifətlər,

Onu qoruyansa möhkəm zirehdi.

Sərdar Cəlaloğlu:

Bosslar da sizlərə söyləyir "piştə",

Möhkəmlik qalmayıb o qoca dişdə,

Əlinizdən gəlmir cüzi bir iş də,

Qərbən aldığınız cüzi bir behdi.

İsa Qəmbərov:

Yerinə yetirdik vədləri haçan?

Biz olduq həmişə sözündən qaçan,

Bizim çöhrələri duruldub açan,

Dəryadan o tayda kükrəyən mehdi.

Mirzə QƏRƏNFİL