“İP”-in “payız yürüşü” sevdası

Vurğun Əyyubov:

Artır radikalın qorxu-hürküsü,

Qrantı az verdi bossun tülküsü,

Bizi çox təntitdi yayın bürküsü,

Payızda kütləvi aksiya başlar.

Fuad Qəhrəmanlı:

Bizə dönük baxtı tale yazmışdı,

Radikal başları kiflər basmışdı,

Yayın istisində tormozlaşmışdı,

Sərin payız günü işləyər başlar.

Vurğun Əyyubov:

Biri-birisiylə çox pis gənəşib,

İfratlar yorulub küncə dirəşib,

Əli də, İsa da "İP"-də gərnəşib,

Bossun qrantıyla dodağı yaşlar.

Fuad Qəhrəmanlı:

Bizdə problemlər boldu, dərindi,

Radikal birliklər bezib ərindi,

İsti ötüb-keçib indi sərindi,

Bizi dəstəkləyər yəqin əyyaşlar.

Vurğun Əyyubov:

Piket alınmadı nə yayda, yazda,

Qrant göndərmədi Avropa tuz da,

Mitinq alınmasa sərin payızda,

Mısmırıq sallanar, çatılar qaşlar.

Fuad Qəhrəmanlı:

"İP"-ə qoşulubdu hər keçəl, kosa,

Radikal qurumlar batardı yasa,

Payızda aksiya heç alınmasa,

Radikal kəslərin başına daşlar.

Vurğun Əyyubov:

Sərinlik də qədəm qoymaqda yavaş,

İnşallah, yığışıb çıxararıq baş,

Mitinqlər, piketlər baş tutaydı kaş,

Yağardı başlara Qərbdən şabaşlar.

Fuad Qəhrəmanlı:

"İP" də ələkçiyə hədsiz qıl verər,

Mitinq bağçamız da bol məhsul verər,

Boss işləyən görüb bizə pul verər,

Çəkilər süfrəyə plovlar, aşlar.

Vurğun Əyyubov:

Pul Qərbdən liderə, qulama gələr,

Adamlar xoş nitqə, kəlama gələr,

Kütlələr meydana salama gələr,

Sonra da başlayar böyük uduşlar.

Fuad Qəhrəmanlı:

Gərəkdi birlikdə biz məqsəd güdək,

Xaricdən lazımdı bizlərə yedək,

Biri qalaq deyir, o biri gedək,

Yaman haçalanıb bizdə baxışlar.

Vurğun Əyyubov:

Bizlər çox dilədik Allahdan səbir,

Fələk qurumlara bəxş etdi qəbir,

Kütləvi aksiya o gözəl tədbir,

"İP"-ə gətirərdi əlvan naxışlar.

Fuad Qəhrəmanlı:

Yaxşı fikir versək axar-baxara,

O zaman mümkündü sifət ağara,

Bizim yerimizdi zülmət mağara,

Bir də cəngəllikdə rahat koğuşlar.

Vurğun Əyyubov:

Gərəkdi payızda biz olaq sərvaxt,

Yəqin üzümüzə güləcəkdi baxt,

Küçə-meydanlara çıxarıq o vaxt,

Nə vaxt ki, yağacaq leysan yağışlar.

Fuad Qəhrəmanlı:

Radikal qurumlar lap cuşə gələr,

Qrantlar payıza, ya qışa gələr,

Kütlələr yüyürüb alqışa gələr,

Küçə-meydanlarda başlar çıxışlar.

Vurğun Əyyubov:

Yürüşə çağırış çıxış mətnində,

Gəllik öhdəsindən hər bir çətnin də,

Mitinqlər böyüyüb ana bətnində,

Tezliklə başlanır yəqin doğuşlar.

Fuad Qəhrəmanlı:

Radikal qurumlar verməkdədi çat,

Əli məəttəl qalıbİsa olub pat,

Yaman zəifləmiş cəbhə, Müsavat,

"İP"-i də iflasa gömdü qarğışlar.

Vurğun Əyyubov:

Bizə qənimləri əfv etmişik,

Doğma radikalı məhv etmişik,

Etiraf etsək ki, səhv etmişik,

Qüdrətli Yaradan bizi bağışlar.

Fuad Qəhrəmanlı:

Hər lider tutubdu başlarını dik,

Qurumlarındasa yekə bir dəlik,

Güclənir getdikcə mənəm-mənəmlik,

Liderlik üstündə başlar boğuşlar.

Vurğun Əyyubov:

İfratlar sevməmiş öz həmdəmini,

Hərəsi daşıyır dərd-sitəmini,

Basmamış payız da öz qədəmini,

Getməkçün başlanıb yırlar-yığışlar.

Fuad Qəhrəmanlı:

Birinci pilləni umar hər qurum,

Yaman çətinləşib daxildə durum,

Radikal önündə dərin uçurum,

Arxada əlçatmaz uca yoxuşlar.

Vurğun Əyyubov:

Yoxdu bircə kəlmə nitqi, sözü də,

Yaman bərəlibdi Qərbin gözü də,

Müəmmalı tərzdə bossun özü də,

Soyuq nəzərini bizlərə tuşlar.

Fuad Qəhrəmanlı:

"İP"-in başı üstü çox sıx dumandı,

Liderlərin başı arpa-samandı,

Nə qədər ki, bizdə durum yamandı,

Fayda verməyəcək payızlar, qışlar.

Mirzə QƏRƏNFİL