ADP “ana müxalifət” sevdasına düşüb

Sərdar Cəlaloğlu:

İfratçün hər tərəf sərt uçurumdu,

Bu gün çox münasib, yaxşı durumdu,

ADP klassik köhnə qurumdu,

"Ana müxalifət" ola bilərdik.

Əhməd Oruc:

Çalışın siz üzə bu gün az çıxın,

Radikal tərəfə olanda axın,

Heç vaxt biz tərəfə gəlmədin yaxın,

Biz bunu yadına sala bilərdik.

Sərdar Cəlaloğlu:

Bizə də mesajla gəlinir hədə,

Radikal deyildi hər gədə-güdə,

Bir valideyn tək müxalifətə,

"Ana" laylasını çala bilərdik.

Əhməd Oruc:

Ünvana dubinka, həm də zopa bas,

Səni tanıyırıq, gəl az gopa bas,

Ola bilməz bizə ADP əsas,

Səni də hörmətdən sala bilərdik.

Sərdar Cəlaloğlu:

Titrəyiş duyuram batmış səsində,

Nərə azalıbdı gur nəfəsində,

"Ana müxalifət" vəzifəsində,

Meydanda birinci qala bilərdik.

Əhməd Oruc:

Sən gedə bilmirsən iriyə doğru,

Addımın çox zəif diriyə doğru,

Hücum sürətini geriyə doğru,

Qaçış sürətini dala bilərdik.

Sərdar Cəlaloğlu:

Sənin də inkişaf etmədi zəkan,

Daldan gözləyirik adi bir təkan,

Bizə lazım deyil geniş bir məkan,

Kiçik qərargahı qala bilərdik.

Əhməd Oruc:

Acımır xəmirin, turşuyub xaman,

Səni öz kürsündə qocaltdı zaman,

Başında saçın da seyrəkdi yaman,

Xeyli sıx olsaydı, yola bilərdik.

Sərdar Cəlaloğlu:

Gecikib, tükənib olsaq biz xərif,

Tutar yerimizi hər azğın hərif,

"Ana müxaliflik" olsaydı zəif,

Xiffətdən saralıb-sola bilərdik.

Əhməd Oruc:

A Sərdar, sən özün adi bir xəstə,

Artıq qalaqlanıb kədər qəm üstə,

Bu adı sizlərə getsək güzəştə,

Zərif xülyalara dala bilərdik.

Sərdar Cəlaloğlu:

Yolu üstündəyik biz ədalətin,

Hər yolu keçərik, bizlər çox mətin,

Sağa getmək bizə olsaydı çətin,

Getməyə, şübhəsiz, sola, bilərdik.

Əhməd Oruc:

Dürüst şəxs qəlbində saf mənlik durar,

ADP önündə tənbəllik durar,

Daim qarşınızda cəngəllik durar,

Sizin yolunuzu tala bilərdik.

Sərdar Cəlaloğlu:

Danışma, adamın tökülür əti,

Geri çəkilmirik, sözümüz qəti,

Ana alınmasa, müxalifəti,

Sözsüz, özümüzə xala bilərdik.

Əhməd Oruc:

Artıq başa çatdı dözümün sonu,

Budu məsələdə sözümün sonu,

Çəkdik gündəliyə "DUİ"-də bunu,

Yekun qərar: sizi bala bilərdik.

Sərdar Cəlaloğlu:

Partiyam bənzəyir şəkərə-qəndə,

ADP mənimdi, sirlər var məndə,

Zərgər işi görən biz zərif rəndə,

Sizi suvaq vuran mala bilərdik.

Əhməd Oruc:

Sizlər çox qapıda sındırdınız diş,

Gəlmir əlinizdən bir əməlli iş,

Sizlərdən çox uzaq hər bir yetişmiş,

Bənzəriniz vardır kala, bilərdik.

Sərdar Cəlaloğlu:

Pul verib o qərbli lotunu alsaq,

Sizin gözünüzün odunu alsaq,

"Ana müxalifət" adını alsaq,

Düşərdiniz hansı hala, bilərdik.

Əhməd Oruc:

Gəl çatma uzaqdan öz qaşlarını,

Hellə öz başına sal daşlarını,

Sizin ADP-nin boşbaşlarını,

Soxduqdan sonra biz kola, bilərdik.

Sərdar Cəlaloğlu:

Özümüz çevrilib lev heyvanına,

Daim güvənərək dev heyvanına,

Nə vaxt çevrilsəniz ev heyvanına,

Qatardıq naxırda mala, bilərdik.

Əhməd Oruc:

Tezləşdirmək üçün gəlişinizi,

Gəlin siz genəldin girişinizi,

Dayandırsaydınız yerişinizi,

Sizi keçirməyə qola bilərdik.

Sərdar Cəlaloğlu:

Eşitdik ildırım nərələri də,

Sal kimi bərkitdik bərələri də,

Dəf etdik biz dərin dərələri də,

"DUİ" keçidini çala bilərdik.

Əhməd Oruc:

Siz Qərbin canında parazit gənə,

Odur ki, düşübsüz indi bu günə,

Gözləyin bossunuz gətirər yenə,

Əgər geciksəniz yala, bilərdik.

Mirzə QƏRƏNFİL