Müxalifətin taktika seçimi uğursuzluğa məhkumdur

Pənah Hüseynov:

"İP"-in işləridi hey gətirən bəd,

Yaxşı olacaqdır, veribdilər vəd,

Sonsuzdu, əlbəttə, strateji xətt,

Taktiki gediş də kifayət qədər.

Araz Əlizadə:

Mitinq keçirməyə hamısı qorxdu,

Radikal durumda küy-kələk çoxdu,

İş görmək lazımdı, o da ki, yoxdu,

Lazım deyil burda danışmaq hədər.

Pənah Hüseynov:

Taktikada işlər gətirməyib bəd,

Bizə Qərb özü də qoymayıbdı hədd,

Bizdə çox güclüdü strateji xətt,

Bossu üstümüzdə saxlayıb Qədər.

Araz Əlizadə:

Nə kəfənin olub, nə də ki, gorun,

Onun öləziyən işığı korun,

Çoxdan sönüb sənin "generator"un,

Radikal kəslərə üz verib kədər.

Pənah Hüseynov:

İblis, şeytan kimi çox şər tökərdik,

Küçəyə, meydana zəhər tökərdik,

Bir vaxtlar mitinqdə çox tər tökərdik,

İndi qazanırıq axıtmadan tər.

Araz Əlizadə:

Onların əlindən gəlmisiz zara,

Qovmağa layiqdi çoxu mal-qara,

İsa, Əli kimi lider-avara,

Hər zaman bir məqsəd, bir maraq güdər.

Pənah Hüseynov:

Xaric öz biziylə bizləri bizlər,

Daim işləyirik, əyilməz dizlər,

Taktiki gedişlər edirik bizlər,

Radikallar bizi daim şad edər.

Araz Əlizadə:

Strateji sizdə çox axmaq fənndir,

Qırılmaq üzrədir nazilmiş kəndir,

Çox pis qurulubdu taktiki təndir,

Bişən əməllərin çoxu küt gedər.

Pənah Hüseynov:

Sevməzdi deyirlər taktikamızı,

Əvvəlki dövrlər taktikamızı,

Xaricdə sevirlər taktikamızı,

Odur ki, Qərb pulu vaxtında ödər.

Araz Əlizadə:

Çətin Qərbə getmək bu cür teç ilə,

Sizi doğrayırlar saz ülgüc ilə,

Siz bu potensialsız az güc ilə,

Verə bilməzsiniz rəqibə xətər.

Pənah Hüseynov:

Bizlərin düşməni, öcü kifayət,

Sözsüz, bizi sancan cücü kifayət,

Bizim taktikanın gücü kifayət,

Qərbli sponsora və bizə yetər.

Araz Əlizadə:

Didişdiz narıncı bir boyaq üstə,

Saxlamaq istərdi boss dayaq üstə,

Birtəhər durubsuz dörd ayaq üstə,

Gününüz keçəcək bundan da betər.

Pənah Hüseynov:

Təkliyi qrantsız vaxtlar anlarıq,

Xaricdən jest görüb vüqarlanarıq,

Biz ondan vaxtında yararlanarıq,

Bossun bağçasında bol məhsul bitər.

Araz Əlizadə:

Boss öz tərsliyilə düşəndə bəndə,

Qrantlar sürüşüb əldən gedəndə,

Qərb sizlərdən cavab tələb edəndə,

Sizin radikallar ümidsiz itər.

Pənah Hüseynov:

Qrant yox, bizləri qəm-kədər boğur,

Qərb pul verməsə də deyir yap-yoğur,

Yaxşı günlər bizə gətirər uğur,

Pis günlər bizlərin üstündən ötər.

Araz Əlizadə:

Bossdan da azalıb tulapayınız,

Sizə yardım etmir qərbli dayınız,

Sizi öz daxili hay-harayınız,

Xaricdən zədələr, daxildən didər.

Pənah Hüseynov:

Taktika olmasa daxılda belə,

Həsəd yaradarıq paxılda belə,

Dəstək artar, hətta daxildə belə,

Bizə balıq verər hər böyük vətər.

Araz Əlizadə:

Dəmir əvəzinə pis şüşə gedər,

İnanma radikal dönüşə gedər,

Reytinqlər günbəgün enişə gedər,

Yalançı cazibə sizləri ütər.

Pənah Hüseynov:

Zaman qarışardı məntiq olmasa,

Adam darıxardı tənqid olmasa,

Şərait nə qədər münbit olmasa,

İşləmək istəyər, nərildəyən nər.

Araz Əlizadə:

Baha başa gələr bəd niyyətiniz,

Gözə də görünmür əziyyətiniz,

Çox da yaxşı deyil vəziyyətiniz,

Süquta uğradar radikalı şər.

Pənah Hüseynov:

Qərbi dəstəkçi tək tez gətirərək,

Bossun qrantından çox götürərək,

O zaman dərindən köks ötürərək,

İnamla deyərik Allahu-Əkbər.

Araz Əlizadə:

Siz çox sallandınız güman çöpündən,

Yapışmaq lüzumsuz aman çöpündən,

Əliniz sürüşər saman çöpündən,

Sizə həmdəm olar yenə bəd xəbər.

Mirzə QƏRƏNFİL