Radikallar maliyyə qaynaqlarını itiriblər

Əli Kərimov:

Bossun qrantları bizim olacaq,

Lazımi məqamda bədxah solacaq,

Biz pul istəyirik xaricdən ancaq,

Almaq ehtimalı enib sıfıra.

İsa Qəmbərov:

Bizi istəməyən saralsın-solsun,

İstərik çoxları bizə qoşulsun,

Təki pullu olaq, cibimiz dolsun,

Bosslar istəsələr olluq fırfıra.

Əli Kərimov:

Yaxına qoymadıq biz boyatını,

Rep sevdik, sevmədik heç bayatını,

Biz daddıqdan sonra Qərb qrantını,

Saldıq özümüzü əbədi tora.

İsa Qəmbərov:

Yerə qoymaqdayıq artıq biz dizi,

Bir çox bədxahlar da itirir izi,

Beş-üç avro ilə aldadıb bizi,

Xaric göməcəkdi bizləri gora.

Əli Kərimov:

Vurub qəlbimizə sağalmaz dağı,

Bossun özü olub bizlərə yağı,

Başımız altına qoyub yastığı,

Möhtac qoyacaqdı Qərb bizi şora.

İsa Qəmbərov:

Verdik biz ayları - illəri yelə,

Yığılmamış qalıb çox şələ-külə,

Keçirə bilmirik bir piket belə,

Çıxıb əlimizdən artıq pul-para.

Əli Kərimov:

Üzdük əlimizi Xarı bülbüldən,

Nagahan çıxmışıq torpaqdan, küldən,

Marks, Lenin olmaq keçdi könüldən,

İstədik bənzəyək həm Tomas Mora.

İsa Qəmbərov:

Xaricin pulundan çətin ki, hürkəm,

Qabımı partladar mənim də sirkəm,

Əvvəl alacağıq məzlum bir görkəm,

Tabe olacağıq axırda zora.

Əli Kərimov:

Bizdən üz döndərir meydan, səkilər,

Çətin ki, yollara kütlə tökülər,

Əvvəl pul vəd edib, geri çəkilər,

Bosslar qəlbimizə çox vurar yara.

İsa Qəmbərov:

Düşər başımızdan çox baş dövlətlər,

Olmaq istəmirlər sirdaş dövlətlər,

Kənara çəkilər qardaş dövlətlər,

Bizdən üz döndərir ulduz, aypara.

Əli Kərimov:

Bossun simasına uyğundu simam,

Çimməyə tapmırıq xudmani hamam,

Acından qarnımız boşalıb tamam,

Aparan da yoxdu ən ucuz bara.

İsa Qəmbərov:

Deyirlər sədrliyi unut bu ildən,

Pis bir başqan kimi düşmürəm dildən,

Varlı sponsorlar çıxacaq əldən,

Urcah olacağıq topala, kora.

Əli Kərimov:

Günümüz gələcək xoş çağa getmir,

Bizlərə qoyulan qadağa getmir,

Çəkiclə vursam da qabağa getmir,

Divar daşlarına ilişib kora.

İsa Qəmbərov:

Şığıdıq qarğa tək biz leşə doğru,

Heç zaman çatmarıq finişə doğru,

Üzümüz dayanıb enişə doğru,

Qorxuram sərt yamac bizləri yora.

Əli Kərimov:

Xaricdən bizlərə mal vermədilər,

Bosslar buza dönmüş yal vermədilər,

Solo oxumağa yol vermədilər,

İstədik qoşulaq lüzumsuz xora.

İsa Qəmbərov:

Daxildə kəsildi dost dayağımız,

Xaricdə dayandı boss dayağımız,

Soyudu qorxudan əl-ayağımız,

İstərlər bizlərə verələr fora.

Əli Kərimov:

Baxmır üzümüzə bizi görənlər,

Artıb aramızda pərən-pərənlər,

Bizdən üz çevirir dəstək verənlər,

İnanmaq çətindi əhdə-ilqara.

İsa Qəmbərov:

Qərb vermək istəmir bizlərə aman,

Ötüb getməkdədi sürətlə zaman,

Bizə kömək etmir nə saz, nə kaman,

Dərdə çarə deyil nə də gitara.

Əli Kərimov:

20 il nə gəldi biz çəkdik dişə,

Bizi qoymadılar çıxaq girişə,

Bizi cəlb etmədi boss da bir işə,

Qaldıq yerimizdə aciz-avara.

İsa Qəmbərov:

Qurtula bilmədik qara niyyətdən,

Danışmaq səhv olar nailiyyətdən,

Qaldıq işdən-gücdən, fəaliyyətdən,

Yaman çox dayandıq üzü divara.

Əli Kərimov:

Xaricdən kəsilib tamam pulumuz,

Möhkəm bağlanıbdı həm əl-qolumuz,

Bilirik ki, yoxdu xilas yolumuz,

Mübtəla olmuşuq ağır azara.

İsa Qəmbərov:

Pullu yer də yoxdu lövbər salmağa,

Məcburuq birlikdə fikrə dalmağa,

Pulumuz qalmayıb nəsə almağa,

Hamımız olsaq da üzü bazara.

Mirzə QƏRƏNFİL