“İP” payızda mitinq keçirmək istəyir, “6-lar” isə bunu istəmir

Əli Kərimov:

Küçə yürüşündən murad alarıq,

Aksiya olmasa irad alarıq,

Xaricdən çox böyük qrant alarıq,

Mitinqlə açılır payız yürüşü.

İqbal Ağazadə:

Mənəm, AMİP Yusif, "VİP" Əlini gəz,

İçimizdə Sərdar, Mirmahmud, Əvəz,

Biz altı nəfərik, çıxarmayın səs,

Çox yükləmək olmaz qəti örüşü.

Əli Kərimov:

Mitinqlər qranta vahid açardı,

Aksiya olsaydı, qəlb dil açardı,

Piketlər, yürüşlər könül açardı,

Mitinq tezləşdirər bossla görüşü.

İqbal Ağazadə:

Məhəl də qoymadan gecə-gündüzə,

Vurmaqda özünü gah oda-közə,

"İP"-in ciddi-cəhdi görünmür gözə,

Bossları cəlb etmir xəfif hürüşü.

Əli Kərimov:

Qərb yükü daşıdıq, sındı belimiz,

Mitinq söyləməkdən yandı dilimiz,

Çatmır qrantçıya, bossa əlimiz,

"6-lar" tutubdu bütöv girişi.

İqbal Ağazadə:

Yürüş-mitinq üçün ulayır çaqqal,

"İP"-in liderləri boşboğaz naqqal,

Yuxarıda bığlar, aşağı saqqal,

"İP" üstün tutubdu geri sürüşü.

Əli Kərimov:

Çoxu siyasətdə yetişməmiş kal,

Danışmaq məqamı çoxu olur lal,

Bizdən öyrənməkdə cümlə liberal,

Bizə gəlməkdədi çoxu gəlişi.

İqbal Ağazadə:

Ancaq yaşamısan sən öz dünyançün,

"İP"-sən, çalışmısan yalnız mayançün,

Qərbə gedər İsoş Manukunyançün,

Erməniyə dayı deyər Əlişi.

Əli Kərimov:

Sevinərik bossdan qrantlar alsaq,

Narahat olmarıq xeyli alçalsaq,

Əgər təsadüfdən səhrada qalsaq,

Hazırlaya billik, hətta biş-düşü.

İqbal Ağazadə:

"İP"-in liderləri qaldı maketdə,

Bircə təklif də yox plan-paketdə,

Yayda baş tutmadı bircə piket də,

Payızdı, meydanda doyunca üşü.

Əli Kərimov:

Qrantdan kefimiz saz olsa belə,

İsanın başında daz olsa belə,

"İP"-in maliyyəsi az olsa belə,

Sən bizdə görməzsən üzdə bürüşü.

İqbal Ağazadə:

Ümidlər bağlıdı cüt qoşa zərə,

Burada dəyişir tez-tez mənzərə,

Birində aktivlik çarpsa nəzərə,

Geridə qalmaqda "İP"-çinin beşi.

Əli Kərimov:

Hazırlaşanı çox Mərvə qaçışda,

Rəqiblər alacaq zərbə qaçışda,

"İP" birinci yerdə Qərbə qaçışda,

"6-lar" bacarmır adi yerişi.

İqbal Ağazadə:

Lama dəstək verir "İP"-ə Tibetdən,

Çıxmır bir ağıllı təklif paketdən,

İsa dəm vurmaqda daim piketdən,

Mitinq eşidəndə qabarır döşü.

Əli Kərimov:

Heç biri atılan topdan oyanmır,

Avam olduğunu heç biri danmır,

"6-lar" kütləvi aksiya qanmır,

Düzgün aparmırlar əsla bölüşü.

İqbal Ağazadə:

Əli də, İsa da bəhs edir camdan,

"İP"-də pay istərlər bütövdən, tamdan,

Onlar yapışıblar qalın təamdan,

Buna heç birinin batmayır dişi.

Əli Kərimov:

Bu altı liderlər arzular xaşı,

Məqsədi əridər dəmiri-daşı,

Guya yaxşı çıxır hər şeydən başı,

İqbal da danışır lap kişi-kişi.

İqbal Ağazadə:

Burda liderlərin tükü bölünüb,

Həm də ağır-yüngül çəki bölünüb,

Qeyzə gəlmiş "İP" də iki bölünüb,

Başı bir yandadı, bir yanda leşi.

Əli Kərimov:

Sarsaqlamaq altı tipdə şükürdü,

Qalıb daldalanmaq küpdə şükürdü,

İkiyə bölünmə "İP"-də şükürdü,

Düz altı olacaq onların leşi.

İqbal Ağazadə:

Qərbdən gözləməkdə onlar bal, beçə,

Boss ayağı altda salınmır keçə,

Bir təşkilat kimi "İP" dönüb heçə,

İsanın, Əlinin çıxıbdı heçi.

Əli Kərimov:

Bizim məclislərdə viski içdilər,

Hamısı yöndəmsiz, həm də gicdilər,

"6-lar", əslində, çox vecsizdilər,

Sanki "İP" üstünə mələşir keçi.

İqbal Ağazadə:

Yalan sözlərini məntiq göstərir,

Sayt da başlarını əntiq göstərir,

Üzdən özlərini natiq göstərir,

Əlinin-İsanın bomboşdu içi.

MİRZƏ QƏRƏNFİL