Radikalları dəstəkləyən yoxdur

Əhməd Oruc:

İfrat xəyalında qurur Turanı,

Ya da ki, dağıdır cümlə İranı,

"İP"-in nə daxildə arxa duranı,

Nə də ki, xaricdə dəstəyi vardır.

Arzu Səmədbəyli:

Gəlsin "6-lar"a nifrinim, qadam,

Bossu xatırlayıb sevinir adam,

Qərb dəstək veribdi bizlərə müdam,

"İP"-in boss qəlbində istəyi vardır.

Əhməd Oruc:

İfratların çatır hər bir yarağı,

"İP"-də çatışmır bir saqqal darağı,

Qərbin də Bakıda böyük marağı,

Hər bossun da "İP"-də öz bəyi vardır.

Arzu Səmədbəyli:

Siyasətdə ömür sürməsi üçün,

"İP"-in də meydana girməsi üçün,

Qərbin bizə dəstək verməsi üçün,

Xüsusi marağı, həm səyi vardır.

Əhməd Oruc:

"İP"-də olanların hər şeyi haqda,

İsadan, Əlidən gileyi haqda,

Sizlərin çox mənfi mövqeyi haqda,

Qərbin və ABŞ-ın pis rəyi vardır.

Arzu Səmədbəyli:

Durulma getməkdə İsa felində,

Bosslara məhəbbət Əli dilində,

Müalicə üçün "İP"-in əlində,

Bir arqument kimi çox zəyi vardır.

Əhməd Oruc:

Əvvəl döşəyini tül edəcəkdir,

Sonra çolaq, topal, şil edəcəkdir,

Sizləri yandırıb kül edəcəkdir,

Yandırıcı səmum küləyi vardır.

Arzu Səmədbəyli:

Bossla çox yaxınıq hələ beşikdən,

Xoş ab-hava gəlir bizə eşikdən,

Biz təmizlənərik keçib deşikdən,

"İP"-in gur ələyən ələyi vardır.

Əhməd Oruc:

Liderlərin kimi artır təlaşın,

Çox tez hazır olar yəqin başdaşın,

Zərbənin gücündən partlayıb qaşın,

Çöhrəndə bossların biləyi vardır.

Arzu Səmədbəyli:

Tezliklə çatacaq, sözsüz, sonların,

Qərbdə dəyişiblər bosslar donların,

Bosslar can yandırır bizə, onların,

Bizi bükmək üçün bələyi vardır.

Əhməd Oruc:

Canyanan bildiyin qəlbli bossların,

Sizə fikirləri fərqli, bossların,

Qrantverənlərin, qərbli bossların,

Sizdən uzaqlaşmaq diləyi vardır.

Arzu Səmədbəyli:

Bir büst qoyacaqlar bosslar bizə tunc,

"İP" bel sütunundan olubdu qulunc,

Əlinin əlində Zülfüqar qılınc,

İsada İisus xaç vəhyi vardır.

Əhməd Oruc:

"İP" liderləriylə qalıbdı darda,

Bundan sonra yerin olacaq barda,

Bosslar da dururlar sizdən kənarda,

Sizin liderlərin kələyi vardır.

Arzu Səmədbəyli:

Sənin arqumentin artıq solubdu,

O, bir müsəlmandı, yaşa dolubdu,

Bilirsən ki, İsa Həccdə olubdu,

Onun başı üstə fələyi vardır.

Əhməd Oruc:

"İP"-dən üz döndərir sadiq dostların,

Onlara gərəkmi süni tostların?!

Qrantverənlərin, qərbli bossların,

Sizləri sevməyən ürəyi vardır.

Arzu Səmədbəyli:

Hələ bundan sonra olacaq keflər,

Özündən yalandan uydurma miflər,

Kəsməz əlaqəni bizimlə şeflər,

"İP"-in xaric kimi dirəyi vardır.

Əhməd Oruc:

Sən elə bilirsən çöldən ov gedir,

Sizin evinizə xan plov gedir,

Sənə elə gəlir boss sinov gedir,

Sizlərin onlara gərəyi vardır.

Arzu Səmədbəyli:

Çox ələ almışıq hər növ dünyanı,

Kəsə bilməz iti bülöv dünyanı,

"İP" cəlb eyləməkdə bütöv dünyanı,

Bizim içimizdə zirəyi vardır.

Əhməd Oruc:

Hamınız qaldınız işsiz-əməksiz,

Əli də, İsa da qalıb köməksiz,

Tezliklə "İP" qalar duzsuz-çörəksiz,

Əhmədin yeməyə çörəyi vardır.

Arzu Səmədbəyli:

Əhməd Oruc, batdın öz kədərində,

Qurumun kökləri itib dərində,

Əlbəttə, dünyanın hər bir yerində,

"İP"-in öz məxsusi özəyi vardır.

Əhməd Oruc:

Hopdunuz yaddaşa rişxənd, lağ üçün,

Gəldiniz siz tufan qoparmaq üçün,

Sizi son mənzilə aparmaq üçün,

Xaricin həddən çox xərəyi vardır.

Arzu Səmədbəyli:

Heç vaxt olmadınız siz üzübəri,

Qaldınız bir sümük, həm də bir dəri,

Həmişə siz təmsil etdiniz şəri,

"İP"-in öz xilaskar mələyi vardır.

Mirzə QƏRƏNFİL