Kütləvi aksiyalara çağırışlar gerçəkləşmir

Vurğun Əyyubov:

Rəqib beyinləri min sual alsın,

İstərik ki, xaric bizdən mal alsın,

Mitinqlər, piketlər adi hal alsın,

Küçəyə-meydana dolsun kütlələr.

Tahir Kərimli:

Yük eyləmişdiniz ürəyə qəmi,

Batmışdı xəyalda minlərlə gəmi,

20 il əvvəllər olduğu kimi,

Sizi bürüyəcək yekə qəm-kədər.

Vurğun Əyyubov:

Kütlə ürəyinə dolar şeytan, şər,

Küçə-meydanları doldursaq əgər,

Elektorat bizi tam dəstəkləyər,

Bizim olacaqdır qələbə, zəfər.

Tahir Kərimli:

Sizin hər işiniz çoxdan olub bəd,

Sanki dönüb oldun əsil bədheybət,

Yalançı çağırış, şayiə, qeybət,

Ancaq tələsmisiz həm də bir qədər.

Vurğun Əyyubov:

Töküb camaatı çəkərik qiyyə,

Kütlələr də bədnam adi vurreyə,

Yüksəldi bizlərdə əhval-ruhiyyə,

"İP"-çiyik, "İP" özü sonadək gedər.

Tahir Kərimli:

Eli çökdürdünüz siz bəy əmilər,

Büdcəmiz boşaldı, yandı zəmilər,

İflasa uğrayıb sizin kimilər,

Daima bossların əlini güdər.

Vurğun Əyyubov:

Hər çağırış qiyam, hər yazı qiyam,

Bəyanat verərik, avazı qiyam,

Qiyam qaldırarıq, ən azı qiyam,

Üsyan, inqilaba qüvvəmiz yetər.

Tahir Kərimli:

Axıb qurtarmaqda artıq dolunuz,

Artıq tükənibdi cibdə pulunuz,

Çox qısa olacaq iflas yolunuz,

Sizi yarı yolda qoyacaq Qədər.

Vurğun Əyyubov:

Yellənər narıncı geyim dam üstə,

İçərik qoyaraq camı cam üstə,

Köklənərik üsyan, həm qiyam üstə,

İnqilab bağımız verəcək bəhər.

Tahir Kərimli:

Rast da gəlmisiniz bossun tuşuna,

Heç vaxt gəlmədiniz Qərbin xoşuna,

Danışıb zirvədən sizlər boşuna,

Enişdə görərsiz "İP"-i bir səhər.

Vurğun Əyyubov:

Bizə kübaryana həyat sürdürər,

Ciddi bəyanatlar çox iş gördülər,

Nəfsiniz bosslara qrant verdirər,

Bizim qəzəbimiz bədxahı didər.

Tahir Kərimli:

Hamınız məhkumsuz tutdu-yıxdıya,

Manikunyan salar sıxdı-sıxdıya,

Qərb də salar sizi gözümçıxdıya,

Yollarda-izlərdə iziniz itər.

Vurğun Əyyubov:

Bosslara bol qrant aradanlarıq,

Pisi aramızdan daradanlarıq,

Bizlər "İP"-li-"İP"-siz yaradanlarıq,

Bağlarda narıncı qərənfil bitər.

Tahir Kərimli:

Qalacan xarici bayraqlar altda,

Canın çıxacaqdı dayaqlar altda,

Sən özün düşəcən ayaqlar altda,

İsa da, Əli də alacaq xətər.

Vurğun Əyyubov:

Sənin bizim kimi baxtın da yoxdur,

Bizim iflas yöndə faktın da yoxdur,

Səsini çıxarmaq haqqın da yoxdur,

Biz betər gündəyik, sən bizdən betər.

Tahir Kərimli:

Gedib dincəldiniz həm Havayda da,

Bir arxa gördünüz hər subayda da,

Nicat axtardınız siz Dubayda da,

Guya kömək edər Bəhreyn, Qətər.

Vurğun Əyyubov:

Verə bilməzsiniz bir cavabı da,

Düşüb əlinizdən viski qabı da,

Qaçar altınızdan, hətta yabı da,

Bizdə şahə qalxar hər dürlü kəhər.

Tahir Kərimli:

Gəlin göstərməyin özünüzü tox,

Sizin hər biriniz bacarıqsız lox,

Dərinə getməyə bir lüzum da yox,

Sizi qaşılayan hər bir boss ütər.

Vurğun Əyyubov:

Yalan danışdınız yoxdu düzünüz,

Bədxahlıq içində itdiz özünüz,

Daim pis cəhəti görür gözünüz,

Biz sizdə görmədik tərpəniş, təpər.

Tahir Kərimli:

Yerlərə tökülsün bədxah ətiniz,

Gözə görünmədi əzm, diqqətiniz,

Dağıldı havada hər bir vədiniz,

Qərb yolu üstündə çoxunuz köpər.

Vurğun Əyyubov:

Çöküb önümüzdə zirvələr, diklər,

Üsyan, inqilabdı qəlbdə istəklər,

Biz Qərbdən alarıq yeni dəstəklər,

Bizim arxamızda möhkəmdi sipər.

Tahir Kərimli:

Bəhs də edirsiniz geniş plandan,

Sizi ayrı saldı gərdiş plandan,

Siz çox danışdınız yalan-palandan,

Sizin bəd yeliniz uçurub çəpər.

MİRZƏ QƏRƏNFİL