Müxalif qurumlar iflas astanasında

Tahir Kərimli:

Başlayıb Əlinin, İsanın yası,

Müxalif qurumun çatmır havası,

"İP"-də getməkdədi lider davası,

Qurumlar istefa astanasında.

Qabil Hüseynli:

"İP" öz mövqeyində durubdu qəti,

Biz təmsil edirik müxalifəti,

Meyil, durumunuz hansı səmtədi?

Sizin bu nəticə nə əsasında?

Tahir Kərimli:

Radikal ağıza çəkilib mala,

Onu bənzətməyin yalandan bala,

Sizin qurumlar da qaldılar dala,

Batdınız radikal fırtınasında.

Qabil Hüseynli:

Qədəmlərin gödək, qısadı qolun,

İlişdin yanında daim kos-kolun,

Vəhdətdə həmişə daralıb yolun,

Başını itirdin gen trasında.

Tahir Kərimli:

Məgər azmı atdıq sizin mitili?

Sizləri çox sancdı bizim ditdili,

Həmişə atanda sizlər dütdülü,

Vəhdət çox udubdu nərtaxtasında.

Qabil Hüseynli:

İndi dəyişibdi büsbütün siman,

Daim başın üstə asıldı duman,

Vəhdətin beş yerə bölünən zaman,

Müsavat çox dartdı öz trosunda.

Tahir Kərimli:

Yararlı olmamış dar Kuzbass yolu,

"İP" də yaşamaqda son iflas yolu,

Müsavat güdürdü bir xilas yolu,

"Yurd" boğulan vaxtda Əli tasında.

Qabil Hüseynli:

"Yurd" özü, Müsavat bir an yatmadı,

Sizi dirəngə də heç oyatmadı,

Vəhdət də tez çökdü, sona çatmadı,

Yəqin duz çox olub nəhs yarasında.

Tahir Kərimli:

Qurum çıxmayıbdı sizin sıradan,

Sizə şans vermədi qadir Yaradan,

Artıq "İP" də sönüb çıxır aradan,

Sizləri görmədik ön sırasında.

Qabil Hüseynli:

Xoş ovqat, hətta ev-eşikdə yoxdu,

İziniz-tozunuz deşikdə yoxdu,

Sizin təmsilçilər beşlikdə yoxdu,

Adınız çəkilmir on arasında.

Tahir Kərimli:

Xalqı isitmədi ürək odunuz,

Sübut olunmadı istedadınız,

Pis siyasətçi tək çıxdı adınız,

Batdınız xaricin pul-parasında.

Qabil Hüseynli:

Yer tuta bilmədin ön lider kimi,

Oldun ölülərə tən lider kimi,

Silindin tarixdən sən lider kimi,

Vəhdət öləzidi köz qorasında.

Tahir Kərimli:

Çökdü əksinizə tamam vəziyyət,

Siz "İP"-də çəkdiniz daim əziyyət,

Gerçəyə dönmədi radikal niyyət,

Söndünüz zülmətin zil qarasında.

Qabil Hüseynli:

Xaricə uzanır radikal əli,

Qalıb çox liderlər ikitirəli,

Əli hətta bu gün gedir irəli,

İsa önə çıxıb basa-basında.

Tahir Kərimli:

Dərin xəyallara dalmaqda Əli,

Həyəcan təbili çalmaqda Əli,

Xaricdən təlimat almaqda Əli,

De, nə var İsanın boş qafasında?

Qabil Hüseynli:

Bir sənsən meydanda qalan hərif tək,

İsa da səslənir "İP"-ə rədif tək,

Şikayət etməmiş Əli zəif tək,

Var nicat zərbəsi İsa kosunda.

Tahir Kərimli:

Son vaxtlar heç biri tərpənmədi bic,

Əlinin üzünə həsrətdi ülgüc,

İsa görməyəndə gerçəklikdə güc,

Axtarıb əlacı falda-ovsunda.

Qabil Hüseynli:

Sən indi tənhasan, bizə az iliş,

Sınıbdı ağzında sənin neçə diş,

Olmadı heç zaman irəliləyiş,

Qaldın əlamanda, xosun-xosunda.

Tahir Kərimli:

"İP" özü qan qusa-qusa alçaldı,

Əli də adi bir lisa, alçaldı,

Zirvədə olmayan İsa alçaldı,

Önündə diz çökdü o, Qrossun da.

Qabil Hüseynli:

Açıq de, Qərb sevib hansı dəlini?

Artıb yekəlməkdə qrant yelini,

Əlində gəzdirir xaric Əlini,

İsaya hörməti artıb bossun da.

Tahir Kərimli:

Zaman yıxmaqdadı onlarla kəli,

Çox bəd gətirmişdi onun əvvəli,

Əli də, şübhəsiz, olacaq dəli,

İsa dəmlənəcək "İP"-in yasında.

Qabil Hüseynli:

Daim qovruldunuz əzab içində,

"İP" də, "Altılar" da savab içində,

Vəhdətin qalmışdı çirkab içində,

İtib-batmışdın sən özün yosunda.

Mirzə QƏRƏNFİL