“İP” müxalifətin güc mərkəzi deyil

Pənah Hüseynov:

Görmədim sənin tək üstünə qoyan,

Ləyaqətin olsun, ay adam, dayan,

Otursun yerində şayiə yayan,

"İP" hazırda əsil güc mərkəzidi.

Sərdar Cəlaloğlu:

Çox da eşələmə, bünövrə qırıq,

İndi "İP"-də qopub tufan, qışqırıq,

Otur AXP-ndə, basma fısqırıq,

Ora güc yox, əsil gic mərkəzidi.

Pənah Hüseynov:

Pərgarsan badalaq atmaqda, pəldə,

Çox asıb-kəsirsən bu gəlhagəldə,

Burda kəsilməkdə əməl də, əl də,

Çünki "İP" olubdu ülgüc mərkəzi.

Sərdar Cəlaloğlu:

Hər dəfə özünün yükünü çəkər,

"İP" geri qalıbdı, fırlanır təkər,

Məni hövsələdən çıxarsan əgər,

Onları sayaram mən bic mərkəzi.

Pənah Hüseynov:

Bura qayıdandan unutdum qəmi,

Qurum xatırladır mənə xoş dəmi,

Radikal fərdlərin "İP" bir həmdəmi,

Son 20 ildə ən dinc mərkəzi.

Sərdar Cəlaloğlu:

Qaraya çevirib qurum ağ yeri,

"İP"-in qalmayıbdı indi sağ yeri,

Bura QHT-nin yığıncaq yeri,

İsayla Əliyçün girinc mərkəzi.

Pənah Hüseynov:

Özünü bənzətmə pələngə, şirə,

Ümidini bağla haqqa, Qədərə,

Sən özün bilərsən, bələn kədərə,

Bizimçün bu qurum sevinc mərkəzi.

Sərdar Cəlaloğlu:

Bosslar atlı olub, sizlər piyada,

Başınız üstündə hələ qan-qada,

"Cırtdan"a dönübsən sən də, İsa da,

Ora "cırtdanlar"çün bir künc mərkəzi.

Pənah Hüseynov:

Get, soyuq havada bir xeyli üşü,

Gizlət sifətində soyuq gülüşü,

Kənara qoyuram qızıl-gümüşü,

Razılaş, "İP" olub bürünc mərkəzi.

Sərdar Cəlaloğlu:

Sizə getdi çoxlu ölkə güzəştə,

Siz isə etdiniz kölgə güzəştə,

Bir az da gedərək bəlkə güzəştə,

Dilinlə deyəsən, "İP" tunc mərkəzi.

Pənah Hüseynov:

Əhvalımız olub çox qəliz yəqin,

Azalıb daraqda həm giliz yəqin,

Qulunclar qatmaqda "İP"-i biz yəqin,

Tezliklə edərik qulunc mərkəzi.

Sərdar Cəlaloğlu:

Sizlərdə yaranıb biganə istək,

Ən ali istəkdi şəhanə istək,

Mən orda olanda yeganə istək,

"İP"-i etmək idi tam pənc mərkəzi.

Pənah Hüseynov:

Genəlibdi burda xeyli bacalar,

Bura gələn gənclər qalıb ucalar,

Bizdə istefaya çıxır qocalar,

"İP" əməlli-başlı bir gənc mərkəzi.

Sərdar Cəlaloğlu:

Qururmda açsanız yeni bir kilsə,

Ermənipərəstlə ara düzəlsə,

Sizə ermənidən qrant çox gəlsə,

Qurum dönüb olar bir "inç" mərkəzi.

Pənah Hüseynov:

İndidən deyirik sənə vidanı,

Atırıq ardınca dərdi-qadanı,

Toplayıb bosslardan gələn qidanı,

"İP"-də düzəldərik bir linç mərkəzi.

Sərdar Cəlaloğlu:

İndi içinizdə artıbdı ağrı,

Daha sən gözləmə, əsla, uğuru,

"İP"-in yönəlibdi iflasa doğru,

Gəlib dərd üstünə kədər mərəzi.

Pənah Hüseynov:

Yenə də bizlərə batmaqda dişin,

Xoşuma gəlmədi sənin gəlişin,

Sənin yaxşılıqla olmamış işin,

Əsla, sən unutma kini, qərəzi.

Sərdar Cəlaloğlu:

Gəlib payınızı xaric böləcək,

Sizin üzünüzə gülər gələcək,

"İP"-də çox oturmaq lazım gələcək,

Boss qidası üstə çox at çərəzi.

Pənah Hüseynov:

Dirçəldər bir meyvə-qarğat bizi,

Liderlər saxlayır farağat bizi,

Mövqeyin eyləmir narahat bizi,

Qurumdan razıyıq biz əlqərəzi.

Sərdar Cəlaloğlu:

Aralı düşübdü özündən masan,

Başına enibdi iri boss kasan,

Sən özün quruyub arıqlayıbsan,

Dadına çatardı qırıq tərəzi.

Pənah Hüseynov:

Getmir nə Muğana, Milə Etibar,

Götürmür "İP" kimi şələ Etibar,

Sizdən kənar qaçır hələ Etibar,

Lalə də buraxmır "İP"-ə Əvəzi.

Sərdar Cəlaloğlu:

Yenə siz başlayın qulam verməyə,

Xaric hazırlaşır xlam verməyə,

Sizə bu qurumda salam verməyə,

Bəlkə də Qrossun gəldi nəvəsi.

MİRZƏ QƏRƏNFİL