Əli Kərimov İsa Qəmbərovun başqanlıqdan getməsini istəmir

Əli Kərimov:

Həmkarlar məni də "Yurd"dan atacaq,

Lider cərgəsinə mütləq qatacaq,

Səndən sonra növbə mənə çatacaq,

Amandı, İsa bəy, postunu atma.

İsa Qəmbərov:

Qrantı bosslardan özüm alaram,

Daha iri qablar dibi yalaram,

Müsavatda vahid lider olaram,

Üz vurma, Əli bəy, mən gedər oldum.

Əli Kərimov:

Məni əzizləyən bir bəyim yoxdu,

Ciddi bir əməlim, bir səyim yoxdu,

Sədrlikdən getmək istəyim yoxdu,

Amandı, İsa bəy, postunu atma.

İsa Qəmbərov:

Çox etdim Qərb cibi mən ələk-vələk,

Gələ bilməmişəm bir üzvə kələk,

Həyata keçmədi bir arzu-dilək,

Üz vurma, Əli bəy, mən gedər oldum.

Əli Kərimov:

Sənə gəlsə belə adi iş kimi,

Qəlbim gizildəyər göynər diş kimi,

Bu, qəbul edilər pis vərdiş kimi,

Amandı, İsa bəy, postunu atma.

İsa Qəmbərov:

Məni dirigözlü batil edərlər,

Qırıb ayağımı, həm şil edərlər,

Qurultayda məni mitil edərlər,

Üz vurma, Əli bəy, mən gedər oldum.

Əli Kərimov:

Mən təkid etdikcə, gəl daza vermə,

Tormozla dedikcə, sən qaza vermə,

Məni dirigözlü güdaza vermə,

Amandı İsa bəy, postunu atma.

İsa Qəmbərov:

Yığdığın gümüşü bürünc eyləmə,

Bossu da, Qərbi də girinc eyləmə,

Özünü cəbhədə gülünc eyləmə,

Üz vurma, Əli bəy, mən gedər oldum.

Əli Kərimov:

Ayaqda sürünmək zülüm deməkdir,

Yetkiliyə güzəşt bölüm deməkdir,

Postu tərk eyləmək ölüm deməkdir,

Amandı, İsa bəy, postunu atma.

İsa Qəmbərov:

Könüllü atıram postu, fərəhli,

Getməsəm, qovarlar ikitərəfli,

Üzüsulu getmək daha şərəfli,

Üz vurma, Əli bəy, mən gedər oldum.

Əli Kərimov:

Canımı verərdim bossun uğrunda,

Özünü qurban ver dostun uğrunda,

Mübarizə apar postun uğrunda,

Amandı, İsa bəy, postunu atma.

İsa Qəmbərov:

Kimə dəstək verdim, üstümə qalxdı,

İndi Müsavatda bir qəmxar yoxdu,

Başqanlıq həvəsi olanlar çoxdu,

Üz vurma, Əli bəy, mən gedər oldum.

Əli Kərimov:

Elə özümünkü kəsilər qənim,

Od tutub, cızhacız yanar bədənim,

Sən getsən, kitabım bağlanar mənim,

Amandı, İsa bəy, postunu atma.

İsa Qəmbərov:

Keçibdi zamanım, çatıb momentim,

Yox əldə keçəri bir dokumentim,

Yerimdə qalmağa yox arqumentim,

Üz vurma, Əli bəy, mən gedər oldum.

Əli Kərimov:

İstərəm, postumda qalıb qocalam,

Arzumdu, mən "Yurd"da daim ucalam,

İstərəm, sədrlik postunda qalam,

Amandı, İsa bəy, postunu atma.

İsa Qəmbərov:

İndi Qərb tərəfdən azalıb saman,

Sıxlaşıb kəlləmin üstündə duman,

Artıq getməliyəm, yetişib zaman,

Üz vurma, Əli bəy, mən gedər oldum.

Əli Kərimov:

Cəbhədə bir-iki üzvə tavanam,

Qərbdən də, bossdan da hələ yavanam,

Axı hələ səndən xeyli cavanam,

Amandı, İsa bəy, postunu atma.

İsa Qəmbərov:

Hər bir üzv, müavinim sıxmaqda məni,

Hər yerindən duran yıxmaqda məni,

Hər nadan saxlayar çaxmaqda məni,

Üz vurma, Əli bəy, mən gedər oldum.

Əli Kərimov:

Gücü çaqqalda yox, sən axtar fildə,

Güc səndəkindən çox topalda, şildə,

Dayan öz postunda bir-iki il də,

Amandı İsa bəy, postunu atma.

İsa Qəmbərov:

Cümlə liberalda mən tək rəhbər yox,

Hazırda bir qətrə məndə təpər yox,

Böyrümdə-başımda çünki sipər yox,

Üz vurma, Əli bəy, mən gedər oldum.

Əli Kərimov:

Başını sən nə tez qoydun balınca,

Məni də apardın öz zavalınca,

Gərək sədrliyi atım dalınca,

Amandı, İsa bəy, postunu atma.

İsa Qəmbərov:

Bəlkə əlləşəcək biri kəfənnən,

Sənin nə işin var, söylə bir mənnən?

Sən qal öz postunda, canın cəhənnəm,

Üz vurma, Əli bəy mən gedər oldum.

MİRZƏ QƏRƏNFİL