Müasir müxalifət yeniləşməli və sivil keyfiyyətlərə yiyələnməlidir

Etibar Məmmədov:

Nə İsa, nə Əli vurmasın döşə,

Düşməz bir novator heç dilə-dişə,

AMİP dönməyəcək artıq keçmişə,

Olmaz yeniləşmək gözləri bağlı.

Nurəddin Məmmədli:

Mənə aşılayır daxili hisslər,

Bizi sevməyəcək heç vaxt xəbislər,

Bütün yetkililər kemişi pislər,

Qalmayıb meydanda başı papaqlı.

Etibar Məmmədov:

Oturub liderlər dalğın, boş-bekar,

Hamısı olubdu bosslara şikar,

Burda bir həqiqət olunmur aşkar,

Hər biri oturub "İP"-də niqablı.

Nurəddin Məmmədli:

Qərbin qılığına bəzən girərik,

Düşüb əziyyətə əsəb gərərik,

Lazımi məqamda iş də görərik,

Nə olub, hamımız əlli-ayaqlı.

Etibar Məmmədov:

Yedəkçün hələ də çatışmır tros,

Çoxdan yaxasını çəkibdi Qross,

Nə Qərb dəstək verir, nə xarici boss,

İfratlar içində yoxdu dayaqlı.

Nurəddin Məmmədli:

Elə lider var ki, gönə çıxıbdı,

Ancaq yaxşıları yenə çıxıbdı,

Radikal düşüncə önə çıxıbdı,

Həm də yerindədi kamalı, ağlı.

Etibar Məmmədov:

Çoxları özünün içini yeyib,

Çoxu da qocadı, qəddini əyib,

Liderlər köhnədi, yeniləşməyib,

Qrant axtarmaqda əli çıraqlı.

Nurəddin Məmmədli:

Qəbul etmək olar şər birimizi,

O zaman görərsən nər birimizi,

Uğur təqib edir hər birimizi,

Gedir gələcəyə yarlı-yaraqlı.

Etibar Məmmədov:

Əvvəl bir-birini didərək yeyər,

Sizdə tarazlığı liderlər əyər,

Görmürəm mən onda bir sivil dəyər,

"İP" artıq görünür çəkic-oraqlı.

Nurəddin Məmmədli:

Misal gətirirəm onlarla gənci,

Bizim sıramızda onlar bir inci,

Çoxusu xaricə çatıb birinci,

Bizi təmsil edər dəftər-varaqlı.

Etibar Məmmədov:

Başınızda duran uzunqulaqdı,

Yalandan deməyin üzünüz ağdı,

Sivil yeniləşmə sizdən uzaqdı,

Sərxoş liderlər də qaşlı-qabaqlı.

Nurəddin Məmmədli:

Xeyli qabaqdayıq hətta sayda da,

Bizə doğru gəlir var da, fayda da,

Bizdə hər şey yeni, sivil qaydada,

Maşallah, liderlər başlı-qulaqlı.

Etibar Məmmədov:

Maraq dairəniz bidətin himni,

Sizi cəlb etməkdə sərvətin himni,

Yox bir qərargahda dövlətin himni,

Eviniz, damınız deyil bayraqlı.

Nurəddin Məmmədli:

Hamı da dalğındı, dəstək görünmür,

Nə Əli, nə İsa zirək görünmür,

Heç kəsin üzündə fərəh görünmür,

Hamı üzüntülü, həm də fəraqlı.

Etibar Məmmədov:

Düzəliş olmayıb İsa büstündə,

Çox üzlər qarsındı odlu tüstündə,

Sanki gəzmirsiniz asfalt üstündə,

Üzünüz-gözünüz tozlu-torpaqlı.

Nurəddin Məmmədli:

Biz həm Müsavata, cəbhəyə varis,

Hər bir kəs müstəqil olmağa həris,

Hamı da üsyankar, hamı mübariz,

Hər bir üzvümüz də yarlı-yaraqlı.

Etibar Məmmədov:

Sizi dəstəkləyən Tomas, Meqqi var,

Onlarla vəhabi, üç-beş həqqi var,

Sizdə nə inkişaf, nə tərəqqi var,

"İP"-də hər bir kəsin üzü cırmaqlı.

Nurəddin Məmmədli:

Hamı bir-birinə bizlərdə sirdaş,

Kim ki, bizi sevmir başına bir daş,

Bizlərdə yerində hər bir başçı, baş,

Öz yerində əllər, üstü dırnaqlı.

Etibar Məmmədov:

Çıxdığı zirvədən enməyəcəkdi,

Qrant az olsa da dinməyəcəkdi,

Heç bir üzvünüz də çimməyəcəkdi,

Sizə tuşlanmasa şlanq şırnaqlı.

Nurəddin Məmmədli:

Bizə şirin sözün, eşqin iftira,

Həm özün, həm də ki, miskin iftira,

Desən də bizlərə kəskin iftira,

Şükür, hamımız da əlli-barmaqlı.

Etibar Məmmədov:

Çox vaxt olursunuz leşlə də məşğul,

Liderlər Bayılda, Keşlədə məşğul,

Heç vaxt olmursunuz işlə də məşğul,

Süfrəniz həmişə çaxır-araqlı.

Nurəddin Məmmədli:

Ölüb gedəcəyik çatanda əcəl,

Dirçəldik, boss bizə deyəndə dirçəl,

Onların heç biri deyildir keçəl,

Həm Əli, həm İsa başı daraqlı.

Mirzə QƏRƏNFİL